1. RARAKRA LAYA Sandi Kakamuk kati, 9

a. Dia muni sikniskira ailal Jerusalen ra balikan? Jan 5:2, 3. b. Upla nani diaura kasak lukikan Betesda layara? Jan 5:4. "Mani bilara aima kumra betesda layaba nikwikan, upla nani kasak lukikan baha lika Dawan karnika mita daukisa, bara ya uplika pas liura dimbiaba witin ai sikniska diasat kabiasin bahawina rawikan. Upla sikniskira dusakum pura wala (100+) ailal pali barakan ya kau karnaba pas dimikan, bara upla almuk tuktan an skahwa nani ban bara bila kaiki pyu wihkara takaskikan, sikniskira nani manas ban bahakat pruan pamalika nani saki raitira brihwikan. Bara layaba lamakir utla lupia nani paski bahara lapta an li auhi ba wina yukwi banhwikan, tihmiasin bahara yapiakawikan, bilakaikanka tara brikan yukum aisikniska naniwina rawaia."—— The Desire of Ages, p. 201. c. Nahki Jisas an waikna sikniskira kumwal prawan betesda ra? Jan 5:5-7.

---

2. WAKIA LAWAN SAT SAT Mundi Kakamuk kati, 10

a. Jisas mita waikna wakia lawanra dia daukbia wisata? Jan 5:8, 9. "Jisas mita waikna wakia lawanra wiraskan witinra kasak lukbia. Sakuna nan wisata: ‘Bus, kwalkam brih mahka was’. Waiknika kasak lukan Jisas bilara. Ai wakia karna takan kataba slakwan kainara baku pain aidarawalan kata. Kausin minitkum takaskras Jisas bilakat walan, traikaikan buwaia an pali kwastit buan kata. Nanara aidara walan upla raiakum baku."— Patriarcas y Profetas, pág. 82.Waikna wakia lawanra Jisas mita diarakumisin wiraskan witinra rakaiba tanka. Waiknika sipkan ban namhpara lukaia an baku witin lustiwaiakan. Sakuna Jisas bilawalan an traikaikan buwaia an karnika brin aiminara buwaia."— The Desire of Ages, pp. 202, 203. b. Jisas wina laiura uplika nahkisa spirit lainkara? Aiseya 1:5, 6; Roman 7:24. "Saurka taka Dawan wina wihkara yawan takan. Wan solkaba wakiaba lawan. Selp wan karnikawal lika sipapiasa holi lakara iwaia an wapaia. Upla ailal ao, traikaikisa selp aikarnikawal Dawan wal asla takaia sakuna las aidara walisa witin sipapiaba tanka."— Ibid., p. 203.. c. Spiritra siknis naniba nahki sipsa rawaia? Sturka nani 9:34. "Jisas aitalia manatarani atki wansakanba mita latwan pali wankaikisa: wan makabi walisa: wantsma ki rawaia? Wan wisa minamra bus winam tara an sinskam saunka yamnika bris. Bila kaikpara winam klahwanka dasna takbia kat lika buwaia. Jisas bilara kasak luks, an man kaikma nahki solkam sikniskawina rauram kabiaba. Nahki sat daukankam, aisankam naniba mita mai taibi an maiwilki brikabiasin Jisas karnika brisa bahasut wina mai lanhki primaisakaia. Pruram baku smaba witin raiaka maikbia. Setan albika lakawina primaisakbia an heven suliarka tilara yamnibalanka maikbia"— Ibid.

---

3. RAIAKA RAIARA TAWAUKAIA Tiusdi Kakamuk kati, 11

a. Jisas nahki help wankisa saurka puraluwaia? Epesu 2:1–6. "Waikna kum aikupia lakrasba witin setan bilawalisa sin albakum baku, an sip bahawina dakwi takras Jisas karnikawal baman sipsa albika lakawina prisakaia. Jisas wark tara dusprignira daukanba taka nanara upla sut sipsa setan albika lakawina lanhwi pritakaia. Setan baha pain nusa bara uplara yaban Jisas winankabara walras, balbiakra sia. Upla umpirakum witin Jisas ra winisa pyuara karnika yabisa an sinslaka yabisa setan kuninka lakaba nutakaia an puraluwaiasin" — Testimonies for the Church, vol. 1, p. 341."Jisas wina yawan lantakaiasa. Aidaukanka, aiwapanka nanisut nahkikanba tasbarakan pyuara. Yawan upla kumi bani sipsa dia Jisas kanba baku takaia, kau tasbaranawina, saurka sutwina dakwi takan kaiasa heven suliarka baku. Ao, yakan wan karnikawal lika apia sakuna Spirit Holikira yawanra iwiba mita sipkabia."Spirit Holikira wan tabrisa pyuara, wan daukanka almuk taski an wahra naniba sut sauhki tikisa, nanara wan daukanka nanisutba klin, wapni an holi lakara baman iwisa. Jisas wan raiakara iwisa yu banira an awar banira, bara wal asla wark takisa saurka mapara aiklabi pura luwaia. Apastel Pal aisan baku nanara yangra Jisas iwisa bara brinki almuk nanira sut pruri takrisa." — The Review and Herald, April 24, 1900. b. Jisas karnika mita nahki prilaka wankisa? Roman 8:3–6. "Tuktan kumi bani witin raiasa tasba aisika mita witinra plun dakakiba mita. Yawan Dawan luhpiasa kaka. Jisas raiakaba wankupia iwikaiasa wan aisanka wan daukanka nanisutra marikan kaiasa. 2 Korint 4:11. Baha raiaka taka wan daukanka nanisutba klin, kasak, holi lakara wan brihwan kaiasa. Bara uplaba sipkabia Dawan Lâ ka holikiraba bilawali daukaia. Kau wan iwanka an wan tnatka almuk naniba sut swiaiasa, heven dukia nanira latwan kaikaia an nina blikaiasa." — The Review and Herald, April 24, 1900.

---

4. PARISI NANI KUPIA BAIWANKA Wensdi Kakamuk kati, 12

a. Parisi nani dia muni praut takan waikna sikniskira ra Jisas mita rakan pyuara? Jan 5:9, 10. "Waikna sikniskira wakia lawankanra Jisas mita rakanba aiwatlara auyakan, Dawan ra mayunra yabikan kli witinra rakanba dukiara, yabalra parisi naniwal prawan, bara aisturka wisata nahki Jisas mita rakanba. Ta iwan kan sturkaba parisi nani mita pain walraskan."Praut lakawal aimawan sauhki wisata, diakan sabat yuara ai tuanka twilkisa. Lawidauki win aitani apiasa sabat yuara aikarbanka twilkaia. Waiknika uba liliakan bara auyatiwan sabat yuakanba; sakuna Dawan karnika brikan waiknika adar yaban baku daukbia. Sibriraskira naku wisata: ‘Yangra airakan waiknika mita aiwin: ‘tuankam brih mahka was’. Makabi walan yâ uplika mita witinra rakanba, sakuna waiknika nuapiakan Jisas kanba. Parisi nani pain nukan Jisas baman sipkan baha daukaia. Sakuna witin nani plikikan prubmunaia an baku patmihtara mankaia sabat krakrira baku. Parisi nani aisikan, Jisas ba sabat krikan baman apia, waiknara rakanba sakuna kli bapurkara adar yaban aitwanka brih wabia."— The Desire of Ages, pp. 203, 204. b. Jû nani mita sabat yuara dia daukan? Matyu 23:4. "Jû nani mita Dawan Lâ kara wahra daukan an alba laka baku karbanka wihra daukan. Nesan wala nani yamni kaikraskan bahasat daukanka yabiba dukiara. Kau pali lika sabat yuara daukaia apia dukia nani wisi diara ailal prakankan ban tankas Dawan aisanka wina saitrakan. Sabat yuaba lilia an Dawan ra mayunraskan. Kan parisi nani mita karbanka wihra kum baku daukankan. Sabat yuara pauta mukraskan kiandil sirpikumsin apia. Ba taka Jû ailal gentail nani helpka nitkan aiwarkka nani daukaia kan witin nani sip daukras kanba mita. Jû nani lukikan swak sakan lakaba witin nani baman aidukia gentail nani lika apia, bara witin nani sabat yuara sip daukras dukia naniba gentail nanira yusmunikan daukaia."— The Desire of Ages, pp. 204.

---

5. SABAT YUABA DIA MUNI DAUKAN Tausdi Kakamuk kati, 13

a. Jisas smalkankaba nahki aslakan Lâ an Sabat wal? Aiseya 42:21. "Jisas tasbara balan ai Lâ kaba tara an kulkanka kasak yabaia, mayara batakaia lika apia sakuna purara bukaia. An Jû nani mita karbanka wihra daukankanba wina prisakaia an blesing kaia kataba pliskara latuban daukanba mita. "— The Desire of Ages, p. 206. b. Sabat yuara dia sipsa daukaia an daukaia apia? Impakan sturka 20:8–11. "Betesda laya unra Jisas wahbi sakan waikna kau siknisba, witin airaiakara marikan aikarnika briba, an adar yaban ai twanka twilki brihwabia tawan lilapasku upla nani sut kaikbia waiknika nahki rawankanba. Nahawal Jisas marikaia wantkan sabat yuara diara yamni daukaia aitaniba, an Jû nani lakaba bahki kulkaia dukiara."Jisas wisata: uplara helpmunaiaba lika sabat yuawal aslasa. Dawan ensalka nani heven wina baliwiba uplara helpmunaia dukiara."Yawan upla bani sipsa naha yuara wan walkara helpmunaia, sikniskira nania mainkaikaia. Sabat ba upla helpkara daukan, Dawan brindaukras minit kumirasin sikniskira naniba panis brikabia sabat yua bara sip helpmunras wisi. Smalkaia an wan walkara helpmunaia warkkabawal lika asla palisa sip dakbi sakras kumi wala wal."— The Desire of Ages, p. 206,207.

MAKABANKA LUAN NANI BA LAKI KAIKS Praidi Kakamuk kati, 14

1. Betesda laya dukiara upla nani nahki kasak lukikan? 2. Dia dukia palira Jisas aisinska bahara mankan? 3. Nahki yawan sipsa wan spiritka sikniskawina rawaia? 4. Dia pali dukiara Jû nani uba aikupia baikan? 5. Dia sat warkka sabat yuara daukaiaba yamnisa?