Sandi
Siakwa kati, 26
1. WAIKNA TARAKUM JISASRA PLIKAN
a. Yâ ba Nikudimus kan, tawan uplika mita nahki kulkanka yabikan? Jan 3:1, 10
"Nikudimus lika Jû nani tilara respek waiknika kumkan, witin skultara diman an wark tara brikan, sinskira palikan kuntri uplika tarkika nani tilarakan… ao, lahlakira, skuldiman waiknika kumkan sakuna witin brindaukikan Jisaswal aisaia."— The Desire of Ages, p. 167.
"Witin lika parisikum wapnikan an aimayunra brikan wark yamni daukibawal. Tawan uplika nani mita kulkanka tara yabikan, pris nani mita sinbaku, witinba uba painsa aidara walikan."— Ibid., p. 171.
b. Dia awarka Nikudimus witin Jisas pliki balan? Jan 3:2.
"Nikudimus, turbi kaikan tnatka plikan nahki muni Jisaswal aisaia Olivit ilkara, witin bila kaikan tihmia pat let takanra upla nanisut yapankan awarkara Jisasra pliki balan kata."— Ibíd., tomo 7, p. 942.
Mundi
Siakwa kati, 27
2. JISAS WIHKI NIKUDIMUS WAL AISANBA
a. Jisas nahki tihmia let Nikudimus balanwal aisan? (Lawana nani 31:20, 21).
"Nikudimus, pat pyu wihkawina brindaukikan Jisaswal aisaia, sakuna upla kaiki kaka lika apia. Witin uba mayara iubia baku aidara walikan Jû ta uplika tarakumba Jisasra plikaia. Kan pris nani mita Jisasra kulkanka yabraskanba mita. Witin Jisasra pliki balanba sturka Jû tarkika nani nutakbiasa kaka witin aipurara sipkan trabil bribalaia apiakaka upla walasin witin daukanba baku ainina bliki daukbiara sia."— The Desire of Ages, p. 168.
b. Nahki Nikudimus takrikan aiaisanka Jisaswal? Jan 3:2.
"Jisas mawanra Nikudimus balan pyuara ria sibrin baku daukan, sakuna aisibrinkaba param sakraskan witin upla tarakum bara wisi. ‘Smasmalkra —wisata Jisasra, yawan nusa man Dawan wina balram; kan upla kum man daukismaba baku sip daukras, Dawan witinwal apiasa kaka. Nikudimus aisan Jisas sain tara nani daukiba dukiara, bahawal riditakan ai sturka Jisasra wiaia. Aiaisankabawal marikikan Jisasra kasak lukisa; sakuna witin kasak lukraskan Jisasba Mesaia baku balanba tanka, sakuna smasmalkra kum baman."— Ibíd.
c. Dia aisanka Jisas daukanwal Nikudimus aihka aidarawalan? Jan 3:3.
"Nikudimus mita Jisas painka aisiwal lakula daukanbara Jisas mita tara kulkraskan, ai nakraba Nikudimus kat kaikan airaiaka sturka sitnika sut nubaku. Jisas aisinska laka tarara kaikan Nikudimus lika kasakka sturka plaplikra kum baku. Jisas pain nukan dia mita witin balanba, witin dairik aisi nan wisata: ‘Kasak kasak maiwisna ya kli aisubi takras kaka sip heven kingka lakara dimbia apia’. Jan 3:3.
"Nikudimus witin balanba lika Jisaswal aisaia sakuna Jisas pana tawi kasakka laka bapankaba witinra wisata."— Ibid., pp. 168–171.
Tiusdi
Siakwa kati, 28
3. KLI AISUBI TAKAIABA
a. Dia ansika Nikudimus mita Jisasra yaban, nahki Nikudimus baku yawan sin nitsa kli aisubitakaia? Jan 3:4-8.
"Kli aisubitakaia dukiara Jisas aisanba, Nikudimus pat aitanka brikan diara rayakum apiakan. Baha pyuara Idan nani aidul laka swisi Israel suliarka takisa pyuara prakanka daukikan tuktan kli aisubi takanba baku. Ba mita Jisas aisankaba Nikudimus aitanka brikan yapti biarawina aisubitakaia dukiara aisaras kanba. Sakuna witin Israel baku heven suliarka aidara walikan. An chenstakaia nitapia lukikan. Nikudimus ta iwan Jisas aisanbawal. Pain aidara walraskan witin pali aidukiara dairik aisanba. Parisi tarakum baku uba pain aidara walikan, sakuna aikupia muhtara lika brindaukikan kasakkaba plikaia. Selp aiwinakat makabiwalan, dia muni Jisas witinra respek munraskan.
"Nikudimus praut takan sturi karnna aisiwal Jisasra wisata: Nahki upla almukba sipkabia kli aisubitakaia? Upla ailal bakusa, kasakka lakaba witinra aula pyuara sip aitanka briras kan upla baku wan sinskaba sipapia, Dawan Spiritka ingnikawal baman sipsa wan tanka briaia.
"Jisas sin tnatkara pana ansamunraskan Nikudimusra. Sakuna ai mihta purara buki isi an tawa tnatkara aisi naku wisata: ‘Kasak, kasak maiwisna, ya uplika liwina an Spirit wina kli aisubitakras kaka heven kingka lakaba sip dimbia apia." — The Desire of Ages, p. 171.
b. Ahkia an nahki yawan sipsa kli aisubitakaia? Jan 1:12, 13.
"Dawan ban tasbana latwan kaikan, ai luhpia kumiman kanba yaban, uplaba kli Dawan wal pana daukaia dukiara. Jisas wark tara daukanba taka uplaba kli Dawanwal asla wandaukisa. Wan kupiaba klin an holi wandaukaia. Paskanka raia wandaukisa kli aisubitakisa pyuara, an sipsa heven dimaia." — The Great Controversy, p. 467.
"Jisas ra yawan kasak luki witinra aula pyuara Spirit Holikira mita waikna an mairin raia wandaukisa. Tuktan namika aisubitakan baku heven suliarka." — Steps to Christ, p. 52.
Wensdi
Siakwa kati, 29
4. KLIN AN RAYADAUKAN
a. Kli aisubitakankawal klin an rayadaukiba dia patranka? Mark 16:16.
"Spirit Holikira mita wan brinka ar wan tnatka almuk naniba sipsa chensmunaia; kan gaspel sturka yamniba lika upla kahwanbawina kli bukisa. Baha sika ‘Kli aisubitakaia’ ba." — The Adventist Home, p. 206..
"Heven kingka lakara dimaia dukiara Jisas mita sainkum mankan tahbi takaia lakaba. Baku lika upla kumi bani Dawan Aisa, luhpia Jisas an Spirit Holikira yumhpara kasak luki an wilinsa kaka aimina muhtara balaia nitsa tahbi takan kaia. Kau serts membarska takras kainara, an kau heven suliarka takrasra ai sinskara Jisas briaiasa: ‘Dawan wan kasakka’ Jirimaya 23:6.
"Tahbi sakan lakabawal klermarikisa tasba dukia naniba wan ninara swisuyaba tanka. Upla kumi bani Dawan Aisa, Luhpia Jisas an Spirit Holikira yumhpa ninara aihtabi takiba setan suliarka kau apia nanara heven kingka suliarka takan. Dawan winanka daukiba lika wan wisa: bahawina takibal, saitra taks, diara taski naniba kanpara. Ya uplika bilawalbia nanira pramiskaba wisa: ‘Yang mai brimna Aisa kum baku an man nani lika luhpi waikna an mairin kama, Dawan karnakiraba baku wisa.’ 2 Korint 6:17,18." — Testimonies for the Church, vol. 6, p. 91.
b. Upla baku wankupiaba nahki taskisa, Dawan nahki kli rayadaukaia wantsa? Jan 3:6; Jirimaya 17:9; Epesu 5:26, 27.
"Yakan selp wan karnikawal lika sipapiasa setan albika lakara wan wilki unta paknira wanlulkanbawina baltakaia. Wankupiaba saura an taski. Tasba skulka dimi sinslaka briaiaba saura apiasa sakuna saurkawina pritakaia sipapiasa. Ao, purataia baman lika sipsa wan daukanka ria bitar takaia, sakuna wankupia taskika lika sip chensmunras. Yawan nitsa heven karnika wankupia muhtawina warktakbia. Saurka lakaba swisi holi lakara balaiaba sipsa Spirit Holikira karnikawal baman wan daukanka almuk taski, wahra naniba swisi nanara klin, holi an kasakka lakara iwi lantakaia." — Steps to Christ, p. 18
Tausdi
Siakwa kati, 30
5. PASKANKA RAYA AN KLIN
a. Apastel Jan an Pal wal dia aisan kli aisubi takanwal paskanka raia takiba dukiara? Galisan 2:20; 1 Jan 2:15-17.
"Spirit Holikira karnikaba mita wan daukanka almuk taski naniba sipsa chensmunaia; kan gaspel sturka yamni smalkankaba kahwanbawina kliwanbukisa." — The Adventist Home, p. 206.
"Apastel Pal kasak lukikanba lika Jisas sakripaiska tara daukanba upla swaki sakaia tanka pain wansinskara bribiasa kaka praut laka an tarapulanka laka nanisut wankupiawina sakbia. Taura Pal traikaikisa wantanka bribia Jisasba diakan hevenra kau tasbara balras kainara. Baha ninkara Pal mita wanmarikisa nahki Jisas uplatakanba wilinkira upla swaki sakaia dukiara, mayara pali bawan albakum baku bilawali lantakan pruanba kat, bahasat prurika lika swira, saura al latwan ailal wahwikan. Kristian kumi bani wantanka brisaki Dawan latwanka taraba. Kristian kumi bani spirit nakrawal sipsa kaikaia nahki Jisas sakripais tara daukanba swaki wansakaia prura albika lakawina an nutakaia wan raiakana selp wandukia apiaba tanka " — Testimonies for the Church, vol. 4, p. 458.
"Jisas mita Nikudimus ra wisata baku man nanira maiwisna kumi bani kli aisubitakaia nitsma, heven kingka lakara dimaia. Jisas ra yaka wan kupiara iwaia an witin dia wantba kat yawan daukaia wednis painkira kum kaiasa wan raiaka paliwal. Wan kwalka dimra, wan pata pira, wan aisanka, wan iwanka nanisutbawal idan nanira marikaia Jisas yawanra iwiba tanka. " — Ibíd., vol. 5, pág. 189.
Praidi
Siakwa kati, 31
MAKABANKA LUAN NANI BA LAKI KAIKS
1. Nikudimus witin nahki selp aidarawalikan wark yamni taka?
2. Jisas mawanra Nikudimus dia daukan?
3. Kli aisubi takaia tankaba dia?
4. Nahki uplakum sipsa kli aisubitakaia?
5. Kli aisubi takibawal dia chenstakisa wan raiakara, dia muni?