Sandi
Kakamuk kati, 23
1. SOL NANI PLUN DAUKIBA
a. Galali kabuka bailawala luanra yâ nanisin Jisas kulma wan? Jan 6:1, 2.
"Upla smalki danhtakan ninkara Jisas aidisaipilka aikuki pliskum saitra tawan, ban lukikan minitkum risbriaia wisi, sakuna upla kwaraba pat nutakan bara Jisas nina bliki bahara balan, manas lika tasbak wapi lakunba raun tawan, wala nani lika durira aimaki dairikwan kata. Ensal luan yuaba pat bailakan kuntriwala nani wina upla ailal Jerusalenra balikan Jisas ra kaikaia, kan witin nani Jisas sturka wali banhwan bara brindaukikan kaikaia. Manas kasak lukikan Mesaia baku, wala nani lika baku apia. Bahara sika asla taki banhwankan 5000 tausin matsip pitka waikna baman, mairin an tuktan nani lika kulkraskan."— The Desire of Ages, p. 364.
b. Upla nani aslatakanba nahkikan spirit lainkara? Mark 6:34.
Mundi
Kakamuk kati, 24
2. WAN NITKA NANI PLIKAIA
a. Upla nani dia nitka brikan, Jisas nahki disaipil nani kasakka lakara prub munan? Jan 6:3–6.
"Il plahpiawina Jisas kaikan upla ailal witinra balan kanba, bara witin nanira latwan kaikan. Ao Jisas wantkan ria risbriaia sakuna praut takraskan. Upla ailal witinra baliba kaikikan spirit nitka tara briba swaki sakan sturka yamni walaia, an Mesaia bakura kasak lukaia. Witin nanira latwan kaikan, sip lupia nani main kakaira apu baku yakawikan. Jisas witin risbrikanbawina buan upla naniwal prawaia. Uplika nani balankanba Jû priska nani helpka lika briraskan sakuna Jisas wina aisolka rakaia laya karmawal aibanhwan kata.
"Upla kwara taraba lilia palikan, sin kaikras kaka heven durkaba witin nanira kwawan baku aidarasin walraskan plun piaiara.
"Danh pat yu tutnikan. Pat yu dimaia bailakan waupasara, sakuna uplaba ban aipaswikan. Jisas yu aiska warktakan plun piras an ris sin briras. Swapan an plun pin daukikan. Disaipil nani mita makaban warkba swisi ria risbribia. Sakuna sip upla kwara taraba wina takiwaraskan.
"Jisas mita upla nanira smalkikan prilaka yabalka briaiaba an lilia lakasin baman lika apia sakuna nahki ai spiritka nitka aibanhwaiaba. Upla nanibasin swapankan, yapti manas ai klahlara ai luhpia twilkikan an aiminara buanbakat awar nani luwikan.
"Upla ailal lika plis wihkawina balankan, titan yu baiwanba wina plun piraskan. Tawan sirpi nani lika lamarakan bankra sipkan plun pliki bahara waia… sakuna Jisas wisata: ‘Man nani mita plun yas pibia’. Bara tawi Pilip ra wisata aniwina yawan bred atki uplika nanina dadakbia. Naku aisan Pilip ra prub munaia."— The Desire of Ages, pp. 364, 365.
b. Pilip dia aisan Jisas wisata pyuara? Juan 6:7.
"Pilip, il wina witin tawi upla nanira kaikan sin kabu bakukan uplika lal naniba. Bara Jisas ra naku wisata: Mastar lahla dusawal (200) bred atkbiasin aitani apia kabia nahasat uplika nani sutra plun yaka mas pislupia pan piaia."— Ibid.
Tiusdi
Kakamuk kati, 25
3. DIA DUKIA LIKA BARAKAN
a. Andres mita Jisas ra dia sturka win, dia adarka yaban disaipil nanira? Jan 6:8–10.
"Jisas mita makabiwalan upla ailalba tilara ya uplika plun rialupia pan brisaki. Andres mita wisata: nahara tuktan kum lika bred matsip an inska sirpilupia wal brisa; kuna diasa upla ailal dakakaia? Jisas win bribal. Ninkara disaipil nanira win upla naniba twiura yas iubia. Dakni banira upla 100 ar 50 pitka adarkat kabia an sipkabia tukin tara Jisas daukaiaba kaikaia." — The Desire of Ages, p. 365.
b. Jisas dia daukan plun ailal daukaia, dia lisinka yawan lantakisa bahawina? Matyu 14:19; Mark 6:37–41; Jan 6:11.
"Jisas traikaikras kan upla nanira lahlakira pata baku yabaia. Sakuna upla umpira pata dakakan kata. Upla ailalba swapan an plunpin daukikan yu aiska luanba mita. Bara upla nani naha pata pisata pyuara aikupia pahtakan kata. Jisas mita ainina blablikra nanira pramis munras tasba dukia ailal yabaia; sakuna wan yua pata aima yumhpa yu aiska bilara lika wankisa umpira nani plun piba baku. An diara kau taraba lika aimawan ingnika yawan naniwal bankabia pramiska wankansa." — The Ministry of Healing, pp. 47, 48.
"Naha tukinka tara lika Dawan Aisa mita Jisas ra yaban; Jisas mita tawi disaipil nanira yaban, witin nani tawi upla dakni daknira iwikan ra yaban kata. Disaipil naniba Jisas an upla kwara tara lila pasra buikan. Nahara wan marikisa Jisas witinra ya iwisa kaka raiaka bredka wankaia wilinba tanka." —Ibid., p. 49.
c. Nahki wankupia kraukisa rait aihwa Dawan warkka daukaiaba? Aiseya 61:6.
"Disaipil nani mita tuktan lupiakum bred matsip an inska sirpilupia wal brikanba Jisas ra bribalan; Jisas wiraskan witin nani pibia. Sakuna wisata upla kwara tarara yabia. Bara bredka an inskika lupiawal kau an kau ailal takan kata. Upla kwara taraba sut pin an kausin yuika ailal tawan" —Ibid.
Wensdi
Kakamuk kati, 26
4. WAN KUKANKA SERMUNAIABA
a. Upla kwarara plun dakakan ninkara dia adarka yaban, bahawina yawan dia lantakisa? Jan 6:12, 13.
"Upla kwara tara sut plun pin aikupia pahtakan, kau plun yuika nani ailal barakanba wahban. Upla nani aiwatlarasin brihwaia wantkan aiuplika nani pibia Jisas blismunan bredkaba. Baku lika tawan sirpi nani ra brihwan kata." — The Desire of Ages, p. 368.
"Jisas mita adar yaban aidisaipilka nanira: ‘Plun pin yuika naniba wahbaia, pis sirpi kumisin lulkaia apia’. Jan 6:12. Naha aisanka lika dis basketra mankaia dukiara baman apia. Tanka wal brikan. Diara sirpisin ban lulkaia apia. Wan taimka naniba bahkira yusmunaia apia. Wan uplika wala nanira sipba helpmunaia. Kaisa wahbaia wan watla bila nanira dia sipba wan uplika wala plun pin dauki nanira dakakaia. Sin tnatkara heven bredkaba wan kupiara brikaiasa wan solka pata yabaia. Dawan bila aisanka kumi baniba raiaka wankaiasa. Diara sirpi kumisin ban swiaia apiasa kan sutba nitsa swaki sakan laka briaia dukiara." — The Ministry of Healing, p. 48.
b. Dia kristian daukanka kasak yawan lantakaia nitsa? Aiseya 58:6-8; 1 Pita 4:9.
"Wan nitka kumi banira yawan Dawan helpka plikaiaba aitanisa witin lika blising ailal brisa wankaia.
"Upla umpira, nitka kaikisa pyuara wanwinakat makabi walisa: ‘Yawan diara sirpi daukbiabawal dia helpka kabia wan walka umpira nanira tabaikaia an sipkabia ki ainitka naniba aitanikat yabaia? Yawan bilakaikaia apiasa upla walakum kau sinskira bahasat warkka daukaia tabribia. Jisas wanwisa: ‘Man nani mita yas plun pibia’. Dia mihtamraba, taimkam, sinskam laka yus muns.
"Ban man mihtamra brismaba lika plun ria bamansa mebi upla kumira baman dakakaia aitani pitka, wel baha bribal Jisas mihtara manks bara man kaikma nahki witin ailal dauki upla kwara tara ailalra sipkabia dakakaia. Upla lahlakira nani pata baku lika apia, sakuna umpira baku lika piaia aitani kabiasa."— Ibíd., págs. 49, 50.
Tausdi
Kakamuk kati, 27
5. WAN PAPASKRA AN MAIN WAN KAKAIRA
a. Dia Dawan daukanka wan auyatikaia apiasa? Lawana nani 37:25, 26; Pilipai 4:19.
"Dawan tingkika lakawal diara sirpi lupiaba aitani wanbiara banhkisa. Dawan ai mihta holikirawal karnika brisa diara sirpibawina ailal daukaia. Twi lawan bilara sipsa tibilkum plun wankaia. Wan pata rialupiaba witin sipsa ailal daukaia. Wan auya tikaia apiasa nahki bred matsip an inskalupia wal wina upla tausinra dakakanba.
"Jisas mita disaipil nanira wisata: ‘Man nani mita upla kwarara plun yas pibia’, pana ansa munata: ‘nara yawan bred matsip an inska sirpi wal baman brisa; tawanra plun atkaia pliki wabia lika upla nanira dakakaia’. Luk 9:13. Naha pata sirpi lupia lika diasa upla ailalna pibia?
"Nahara lisin painkira kumsa Dawanra kasak luki nani sutra. Dawan mita warkkum wankisa pyuara, takaski lukaia apiasa nahki daukaiasa sapa. Sakuna wanminara bui wanwinba bilawali daukaia. Lukaia apiasa painkabia sa sapa ar aitanikabiasa sapa.
"Jisas talia holikirawal atki sakan naniba, ai kasakka lakara kau pawaia nitsa. Diara ria briba dukiara saritakaia apiasa kan Dawan mihtara baha aitanisa witin sipsa ailal dauki wankaia. Purataia yawan kaiki dukia naniba sipsa uba rialupia baku kaia. Sakuna wanpura suni Dawanra makabiasa kaka witin karnika brisa bahawina ailal daukaia ai luhpia nani witinra kasak luki nani sut dukiara. Ba mita wark taki ban uba swapaia apiasa witinra bila kaikaia karnika an ai sinska laka wankbia dukiara." — Prophets and Kings, pp. 241–243.
Praidi
Kakamuk kati, 28
MAKABANKA LUAN NANI BA LAKI KAIKS
1. Upla nani dia daukikan Jisas smalkanka walan pyuara?
2. Nahki Jisas mita upla nani plun daukikanba dakakan?
3. Jisas upla ailalra nahki adarkat brikan, bawina yawan dia lantakisa?
4. Walkira plun dakakamna aiwibia kaka dia kupira brikaiasna?
5. Aisas nahki Dawan man raiakamra nitkapram dukia maikanba?