Sandi
Siakwa kati, 19
1. PRIASWATLA TASKI DAUKAN
a. Aisas Jisas tasbarakan pyuara priaswatlaba nahkikan? Jan 2:13, 14
"Jû uplika kumi bani purara kahbankan mani bani ai lal mana wisi aibapaia ‘sol swaki sakaia’...bawina diara walaba upla bani aikupia wilinkira aipresantka bribalikan priaswatla kukanka watlara. Baku sin kuntriwala lahlika bribalbiasa kaka chensmunikan priaswatla lahlikara nina makikan tempel lahlika, tentwatla warkka daukaia dukiara yusmunikan. Lahla chens munikanba tilara implikan barakan, baku lika baha tnatkaba taski an swira laka bisniska kumkan, lahlikaba lika pris nani pakitkara takaskikan.
"Daiwan atki brih an upla walara atkikan naniba mana tara kulkikan, bara dia wentakiba pris an gabamint uplika nani aikuki sermuni brikan."— The Desire of Ages, p. 155
b. Priaswatla warkkara nahki sauhkan? Ezekiel 22:26.
"Ensal luan lilika daukikanba pyuara sakripais ailal pali daukikan. Baku lika lahla tara tempel watlara dimikan. Sakuna upla ailal daiwan bribalikan: sip, guts, bipbul an daiwan walasin, baha nani daiura muhban binkaba tarakan, bara upla aipura sunaia balan naniba sinska saura daukikan, lahla mâ binka an unsaban lakasin barakan aiatkra nani pana pana aitilak lahla dukiara."— The Desire of Ages, p. 155.
Mundi
Siakwa kati, 20
2. DAWAN WATLARA KULKANKA YABAIA
a. Dawanra mayunra yabi pliskaba nahki witin kulkisa, Saina Ilra dia adarka yaban? Impakan sturka 3:1–5; 19:12, 13
"Saina ilra Dawan baliwan aimawan ingnika barakan, baha pliskaba holikan. Baku lika ani pliskara Dawan mawan ingnika barasa kaka pliskaba holisa."— The Desire of Ages, pp. 155, 156.
b. Jisas dia daukan tempel watla taski kaikan pyuara? Jan 2:15, 16
"Jisas jû nani tempelkara baldiman pyuara diara atkikan naniba kaikan kasak kat daukras kanba. Upla umpira nani sari brikanba, sip iki sakripais daukras kaka witin nani padin briras kabiaba aisaurka naniwina. Tempelka lata tanira lika markit saurakan. Bara priaswatla kataba taski daukikan. ."— Ibid., p. 157.
"Tepsku Jisas baliwan tempel watlara siliukum aimihtara brikanba purara bukan an wisata diara aiatkra naniba takiwabia priaswatla wina. Kau kainara Jisas nahasat daukraskan, aiatkra nani tibilka makupan bara lahla nani tasbara yakawan. Upla kumisin Jisas mapara diara aisaraskan, an takaski ai lahlika yakawanbasin wahbraskan. Upla kumirasin Jisas mita siliuwal wipi latwan lika yabraskan, sakuna aimihtara siliu brikanba kaikras kaka surd malikira kum bakukan. Priaswatlara warktakikan nani, pris an daiwan aiatkra nanisut plapi bahwan kan witin nani sibrikan aipurara trabil balbia."— Ibíd., p. 158.
c. Dia tanka Jisas tempel watla klin daukanba? Malakai 3:1-3
"Jerusalen tempelka nahki taski daukan kanbawal marikikan baha pyua Jû ka uplika nani kupia nahki taski kanba. Baha baman lika apia sakuna naiwasin yawan nani wankupia nahki taskibriba. Jisas naha daukanbawal marikaia wantkan nahki witin upla kupia klindaukaia wantkanba saurka albika taskikawina, prisakaia an heven suliarka baku briaia."— Ibid., p. 161.
Tiusdi
Siakwa kati, 21
3. DAWAN MAWAN INGNIKA
a. Dia dukiara Dawan tentwatla bapan Israel luhpia nani tilara? Impakan sturka 25:8.
"Israel nani pyuara Dawan mita ai albika Moses ra adar yaban an marikan tentwala makbia dukiara. Naha wal Dawan wantkan lisinkum landaukaia Israel luhpia nanira baman lika apia sakuna nesan sutra. Kuna Dawan wantba wankupiara iwaia." — The Desire of Ages, p. 161.
b. Dia muni wanwina taraba Dawan tempelka wisa, nahki klin brikaiasa? 1 Korint 3:16, 17; Aiseya 57:15
"Tasbara saurka baldiman taka upla kupiara sip Dawan takaskrankan. Upla kupiaba saurka mita tihmu an taski daukan, Dawan mawan ingnika sipapiakan bahara takaskaia. Sakuna Jisas upla takanba taka mita sipsa nanara wankupia raiakum wankaia an bahara Spirit Holikira paskanka raiakum wandaukaia." — Ibid..
"Tasba tnata balaia bailaba yawan kasak lukisa kaka wan daukanka nanisutba holi lakara iwikaiasa.
"Uplasut aikupia aiskawal Dawan bilara kasak lukisa kaka ai iwankara marikaiasa. Baku lika swapraskira aikupia aiskawal wark takbia sol wenmunaia Jisas dukiara. Rait aihwa wan kupiara Jisas iwisa kaka yawan wednis painkira kum kabia wan uplika wala nani wan kaiki nanira. Taimkana kristian purataia baman kaia lika apiasa, rait aihwa wansinska, wankarnika an lahlika sutba Dawan warkkara mankan kaiasa. Dawan bilaba yawan kumi bani stadi takaiasa wan sinskara briaia yaka bahara takaskaia, kan baku baman sipkabia saurka mapara aiklabaia.
"Upla ailal barasa ao witin nani Jisasra lika kasak lukisa, sakuna ainakraba tasbara kaikisa, prias dimisa ai matawalsip manka aibapisa, presant wala nanisin serts kukanka watlara bribalisa, baha saura apia sakuna aipura sunra an Baibil aisikaiara balantaim aitaimka mankras. Rait heven suliarka takaiasa kaka bilara iwaiasa." — Testimonies for the Church, vol. 5, p. 547.
Wensdi
Siakwa kati, 22
4. TEMPEL RAIABA KLINDAUKAIA
a. Nahki sip yawan yakan wankupia klin daukras? Jirimaya 2:22; Job 14:4.)
"Upla kumisin apusa selp aikarnikawal saurka albika wilki bribawina langwi pritakaia."— The Desire of Ages, p. 161.
b. Yawan dia daukaiasa Dawan mawanra wankupia klin brikaia? Ezekiel 36:25-27; Zakarías 3:3-5.
"Jekob, witin aimuihni Isau mapara saura daukanbawal wihra tara twilkikan; sakuna witin aikupia lakan. Dawan mita witinra padin munan baha saurka sutba wina; bamita witin sipkan Dawan mawan ingnikaba stanmunaia. Sakuna ani uplika aisaurkawal Dawan mawanra balbiasa kaka sauhki tikikan. Jisas kli aimawalra tasbara balbia pyuara, saura dadaukra naniba sut sauhki tikan kabia aibila aisan karnikabawal an aimawan ingnikabawal. 2 Tesalonika 2:8.
"Jan tatabra pyuara, Jisas param takan uplasutra marikan Dawan Aisa daukanka. Jisas mawan ingnikaba uplara marikikan ai saurka naniba. saurka taskika naniwina klin takaia wantsa kaka Jisaswal asla takbia. Kupia klin nani baman aimawanra kabia."— Ibid., p. 108.
"Jisas baman sipsa upla kupia taskikaba klin daukaia, sakuna uplara lika taibi munras. Jû nani tempelka watlara dimi wasata baku lika apia, sakuna witin wan wini naku wisa: ‘Kaiks yang kupiam kurkara kingbisna, ya kwakbiasa kaka bahara dimamna’ Param marikan 3:20. Yu kumi dukiara baman lika witin balras, naku wisa: ‘Bahara takaskamna an witinwal taukamna upliki nani wal. ‘wan saurka naniba bikbia, an kabu tihukara lulkbia wan saurka naniba’ 2 Korint 6:16; Miqueas 7:19. Dawan mawan ingnikaba mita wankupia klin an holi daukbia an Spirit Holikiraba bahara takaskan kabia bankaiara. Epesu 2:21, 22."— Ibid., pp. 161, 162.
"Jisas, witin priswihta aimakisa heven tentka watlara bahara wan helpkara Dawan Aisa mawanra aisisa. Sakuna sintaim Spirit Holikira bak naha tasbara wan solka tempelka nanira aiwarkka daukisa."— Ibid., p. 108.
Tausdi
Siakwa kati, 23
5. NAIWA TEMPEL KLINDAUKAIABA
a. Nahki Dawan mita serts watla tauplika nani pahpaiara swinsa tempel watla kulkaiaba? Habaku 2:20; Ezekiel 44:23.
"Dawan tempelka watlaba holi baku kulkanka yabaiakan, sakuna lahla kau wentakaia dukiara taski daukan kata jû nani mita.
"Pris an tawan taka uplika naniba pahpaiara kahban Dawan pliskara sulialra brih tapakaia, witin nani aimihtarakan tempel watla warkkaba adarkat mankaia. Patran kum yabaiakan tawan uplika nanira kasakka lakara iwaia."— The Desire of Ages, p. 156.
"Naiwa yawan iwina pyuara priaswatlara kulkanka yabras ban diara bahkikum baku brisa. Dawan dukia naniba tanka briras bakusa… Israel luhpia nanira Dawan mita kler wisata nahki tempel watlara kulkanka yabaiaba. Dawan ai lukanka satwala daukansa ki nanara? Dawan klahkla karnakiraba saurka dimras tasbaia nanisut alki brisa. Aitani kabia yawan patitara dia adarka yaban naniba bilawalaia. Yawan naha ingnika painkira wankan brina bahkira lika apia bilawalaiasa."— Testimonies for the Church, vol. 5, pp. 495, 496.
b. Jisas karnikawal yawan nahki sipsa puraluwaia? Matyu 5:8; 1 Jan 3:1–3.
"Dawan luhpia kumi banira kupia kraukisna naha kasakkana aiauya tikbia apia: dia yawan nitsa Spirit Holikiraba wan kupiara bal takaskan kabia an hevenra waia riditakaia. An kau walras nani kiamara brihwaia naha gaspel sturka kasakka ulbanka nanina."— Testimonies to Ministers, p. 442..
Praidi
Siakwa kati, 24
MAKABANKA LUAN NANI BA LAKI KAIKS
1. Jisas pyuara Jû nani tempelka watlara dia atkikan, ya taurakan?
2. Dawan mawanka holikirara aula uplikaba nahki kaiasa?
3. Jerusalen tempelka watlaba spirit lainkara dia tanka brikaiakan?
4. Tempel watla wina aiatkra kanbi sakan pyuara Jisas dia aisan?
5. Nahki tnatkara yawan sipsa wan kupia taskiba klin daukaia?