Sandi
Kuswa kati, 23
1. TENT WATLA WARKKA
a. Jisas ba Mesaia ba nutakan pyuara samaritan mairka minitkara dia daukan? Jan 4:28, 29.
"Samaritan mairka witin uba liliatakan Jisas aisanba walan pyuara. Jisas mita diara param saki win ba walan pyuara kau sip stanmunraskan. Aibukitka liwanhta purakat swisi tawan bilara plapi balan aiwalka nanira wiaia. Jisas nukan dia mita mairka wanba. Aibukitka swinba mistik lika takras, Jisas aisanka ba kupiakat saban. Witin nanara brindaukikan raiakaia layaba, aitawanka uplika nanira wih win Jisas mita gaspel sturka ingnika painkira witinra yabanba."— The Desire of Ages, p. 191.
b. Sikar uplika nani mairin wedniska walanra dia dauki banhwan? Jan 4:30.
"Samaritan uplika nani mairin wedniska walan pyuara aikupia nani tatatwan. Nanara mairka mawanba liliakan, satwala takan aidaukanka sutra. Bara uplika nani brindaukikan Jisas ra witin nani palisin selp ainakrawal kaikaia an aikiamawal smalkanka painkiraba walaia."— The Desire of Ages, p. 191.
Mundi
Kuswa kati, 24
2. PLAWAR MÂ AN MA KRAKRIRA
a. Sikar uplika nani aulakan kaiki Jisas dia win aidisaipilka nanira? Jan 4:35–38.
"Insla mâ krikiba ai mana brisa, an saumuk mâ ba raiabankaiara, baku lika saumuk mâ mankan an krikanba walsut ai lilia bribia. Naha aisankana wisa: Upla kum saumuk mâ mankisa, an wala barasa krikaiara. Jisas nahara marikaia wantkan gaspel sturka twatwilkra naniba misaniry kum baku. Upla kumi banira Dawan mita wark yabansa. Mankaiara apiakaka krikaiara. Sipsa sin prakanka daukaia saumuk mâ wahwi yakabiba insla bilara paubia dukiara, sakuna upla wala sipsa balaia mâ krikaiara; mankanba wihki krikanba walsut aimana brisa."— The Desire of Ages, pp. 191, 192.
b. Mairin wedniska taka Sikar uplika nani dia daukan, yawan dia lantakaiasa bahawina? Jan 4:39.
"Jisas yawanra iwisa pyuara witin mita wapni an kasak lakara wan tapaki brihwisa. Klin holi an latwan lakaba wan daukankara marikisa. Bawan lakaba wan raiaka kuntrul munisa. Wan mawanba nahki trabilra kabiasin kikanka kum baman brisa. Spirit Holikira mita waikna an mairin raia wan paskisa pri laka an lilia lakaba wan kupia muhtara barasa. Sin dus tnawa dusa wina wal aslaba baku Jisas wal asla iwisa, raiakaia ba witin wina wankisa bara wan daukanka naniba mâ yamni baman sakisa yu banira an awar banirasin. Wednis painkira kumsa wan kaiki uplika nani mawanra.
"Jisas ra yawan kaikibawal witin aililka kat takisa; aidaukanka holi, kasakbawina yawan lantakisa, bara wan brinkaba lika yu banira witinwal baku takaia sin aililka kat. Naha lika yakan selp wankarnika wal lika apia Spirit Holikira mita sinslaka wankan kaiasa. Saurkara pruankanbawina nanara raiatakan an spirit dukia nani kainara sip wantanka briraskanba nanara wan nakra ilingkan. Heven sinska laka brisa bara diara tihura nanikanba nanara tanka brisa. Wan daukanka, wan iwanka, wan wapanka, wan aisanka nanibasut holi, kasakka lakara bamansa."— Selected Messages, bk. 1, pp. 337, 338.
Tiusdi
Kuswa kati, 25
3. JISAS SAMARIARA WANBA
a. Samaritan uplika nani mita dia makaban Jisas ra, dia muni? Jan 4:40.
b. Jisas, Samariara takaskan taka dia takan? Jan 4:41.
"Jisas mita samaritan mairkara liwanhta purara aisan sturka naniba saumuk mâ yamni bakukan isti pawi ai mâ sakan. Tawan uplika dakra tarakum balan Jisas smalkanka walaia an witinra kasak luki banhwan kata. Liwanhta purakir bali banhwan Jisas ra makabanka nani daukan an painkira witin nanira ansika yaban kata bara diara ailal aitanka briras kanba nanara aitanka brihiakawan. Bahawal baman lika aitani aidara wali banhraskan brin daukikan kau walaia an aiuplika wala nanisin kau balraskan naniba sin walbia dukiara. Bara Jisas ra makaban samariara ria takasbia dukiara. Baku lika yu wal Jisas bahara takaskan an upla ailalapali witinra kasak lukan kata." — The Desire of Ages, p. 192.
"Jisas mita Dawan Aisaba param marikan aidisaipilka nanira bara witin nani aikupiara wark tara daukan, bakusin naiwa Dawan wantsa wankupiara witin bal iwaia an chens wanmunaia. Smalkanka kum baman lika apia sakuna rait aihwa kaiasa. Spirit Holikira mita wan sinska kwakan kaiasa an wan nakra saikaia mankaia bara yu banira yawan sipkabia aimawan ingnikara iwikaia." — Reflecting Christ, p. 302.
c. Samaritan uplika nani dia aisan Jisas ra Mesaia baku kasak lukan ninkara? Jan 4:42.
"Parisi nani mita Jisas ra bahki kulkan, witin skul tara dimraskan wisi. Jisas tukin nani daukiba kaikras bakukan sakuna makabi banhwan sainkum dauki marikbia witin Mesaia baku balanza kaka. Samaritan nanira Jisas sain kumisin daukraskan, kuna smalkankawal baman samaritan tawan ul Jisas ra kasak lukan Mesaia kum baku." — The Desire of Ages, pp. 192, 193.
Wensdi
Kuswa kati, 26
4. PRAPIT AISANKA KARNIKA
a. Ani prapitka ulbankara Samaritan nani kasak lukikan Mesaia balaiaba dukiara? Blasi sturka 49:10.
"Samaritan uplika nani kasak lukikan Mesaia balaiabara Jû nani dukiara baman lika apia sakuna uplasut dukiara. Spirit Holikira mita Moses ku pat kaina manas aisankan Mesaia balaiaba dukiara. Jekob ku Dawan pat maihsapahkankan uplasut witinra asla takbiaba dukiara; an Ebraham kiamkara blismunankan tasbara iwi uplika nani sut dukiara. Baha prapit ulbanka nanira Samaria uplika nani kasak lukikan Mesaia balaiaba. Jû nani pain aitanka briraskan prapit ulbanka Mesaia balaia dukiara aisankanba. Jisas tasbara aimapas an aimawalra balbia nanibasut wahra aitanka brihiakawikan. Jisas balan pyuara Jû nani diara aitanikat smalkraskan dukia naniba klersakan, bara upla ailal nanara aitanka brihiakawan kata heven Kingka laka dukiara. "— The Desire of Ages, p. 193.
b. Naiwa yawan dia lantakaia nitsa Samaritan uplika nani nahki kasak lukanbara? Smasmalkra 11:4, 5.
"Upla ailal tasba aiskara, waikna an mairin nani hevenra kaikisa. Aipura Sunisa, ainakra laya sakikira sol ailal brindaukisa Spirit Holikira tingkika laka an ingnikabasin. Upla ailal Heven Kingka laka durka bilara bilakaikisa aslatakaia."— The Acts of the Apostles, p. 109.
c. Uplakum rait aihwa aikupia lakisa pyuara dia takisa? Mark 5:18–20; 7:31–37.
"Spirit Holikira karnika mita waikna an mairin nani li diran baku kasakka laka pliki banhwiba yaka aibanhwan kabia. Baku lika wan winatara, wan solka an wan sinska sutba holi lakara yaka iwankabia. Upla ailal setan mita ai albika lakara brikan naniba prisakan kabia an heven suliarka tilara brihwabia. Dawan aikarnika tara briba marikbia nahki witinra kasak luki nani raiakara."— The Desire of Ages, p. 341.
Tausdi
Kuswa kati, 27
5. KRISTIAN MISANIRY WARKKA
a. Samaritan mairkawina yawan dia lisinka lantakisa? 1 Jan 1:1–3; 2 Korint 5:14.
"Samaritan mairka Jisas ra sakan pyuara witin aiuplika wala nanisin Jisas ra bribalan kata. Nahawal marikan misaniry warkka dadaukra painkira kum baku. Disaipil nani mita lika samaria uplika naniba Jisas ra kasak lukbia apia lukikan. Ban pyu wihkara lika bahara sipkabia wark daukaia. Nuapiakan samariara pat insla mâ pihwan ba tanka. Sakuna mairinkum upla mita witinra kulkanka yabras kataba nanara witinku tawan uplika sut bribalan kata Jisas ra walbia dukiara. Minitkara witin ingnikaba brihwan aiuplika wala nanira.
"Naha mairkara sipsa kaikaia rait aihwa kasak lalukra kum baku. Jisas nina blablikra kumi baniba witin misaniry warkka dadaukra kaiasa. Raiakaia laya di uplikaba witin aiwinaba raiaka laya karma kaiasa. Ya briba witin mita aiwalkara yabaiasa. Dawan tingkika lakaba wan solkara iwisa pyuara li karma kum bakusa twilawanra, bahawina sipsa diran dauki naniba diaia"— The Desire of Ages, p. 195.
b. Naiwa yawan nahki sin baku daukaiasa? Smasmalkra 11:6.
"Yawan nitapiasa biara kuntrira waia misaniry warkka daukaia. Wan lamakir upla ailal barasa ‘insla mâ pihwan baku ridisa krikaia’, yawan sipsa saumuk mâ ba wahbi briaia bankaia raiaka dukiara’. Kristian ailalra Dawan winisa srinwanman diara daukras naniba rawi buiwabia kan ai naslara warktatakra ailal nitsa. Ao, trabil bara kabiara sin lukaia apia."— Testimonies for the Church, vol. 5, p. 187.
Praidi
Kuswa kati, 28
MAKABANKA LUAN NANI BA LAKI KAIKS
1. Samaritan mairka dia daukan Jisas ra Mesaia baku brin pyuara?
2. Insla mâ pat pihwan dukiara aisiba dia tankasa?
3. Yu an Jisas Samaria tawankara takaskan?
4. Samaritan uplika nani dia wedniska aisan Jisas dukiara?
5. Upla kum airaiakara Jisas brisuya taim witin dia daukisa?