Ulua’i Aso
Iuni 30
1. O SE TUSI E I AI SONA SINI
a. O ai na tusia atu i ai lenei tusi, ma aisea fo’i, ma e fa’apefea ona mafai ona faia atoatoa? 2 Peteru 1:1.
“Oka se autū silisiliese mo manatunatuga – o le amiotonu a le Atua ma lo tatou Fa’aola o Iesu Keriso. O le manatunatu ia Keriso ma Lana amiotonu e lē maua ai se avanoa mo le amiotonu a le tagata lava ia, mo le vi’ia e le tagata o ia lava. I lenei mataupu, e lē o i ai se muta’aga. O loo i ai le la’ala’a pea i luma i taimi uma lava i la’asaga ta’itasi uma o le iloa e fa’atatau ia Keriso.” – The SDA Bible Commentary [E. G. White Comments], vol. 7, p. 942.
b. A’o tatou sa’ilia le Atua ma le fa’amaoni, ma le finafinau i totonu o Lana Upu, o a taui e tafe taumasuasua mai i totonu o ō tatou loto? 2 Peteru 1:2.
“Afai e taofi mau atu le tagata i le natura o le Atua, ma galue ai i le fuafuaga o le fa’aopoopoga, ma fa’aopoopo ai le alofa tunoa i le alofa tunoa i le fa’aatoatoaina o se amio fa’akerisiano, o le a galue le Atua i le fuafuaga o le fa’ateleina. Ua Ia fetalai mai i Lana upu: ‘Ia fa’ateleina ia te outou le alofa tunoa ma le filemu e ala i lo outou iloa e fa’atatau i le Atua, atoa ma lo tatou Ali’i o Iesu.’” – Testimonies for the Church, vol. 6, p. 148.
Aso Gafua
Iulai 1
2. O LE FA’AMANUIAGA O LE ILOAINA O LE ATUA
a. O le a le mautinoaga paia e o’o mai ia i tatou ta’ito’atasi – ma tatou te taliaina fa’apitoa lava i taimi faigata? Ieremia 24:7; Iopu 22:21-23, 29.
“O lo tatou fa’amoemoe e tatau ona fa’amalosia i taimi uma lava e le iloaina, o Keriso o Ia o la tatou amiotonu. Ia fa’alagolago lo tatou fa’atuatua i lenei fa’avae, auā o le a tula’i mausali e fa’avavau. E aunoa ma le manatunatu i le pogisa o Satani ma mata’u ai i lona mana, e tatau ona tatou tatalaina o tatou loto e taliaina ai le malamalama mai ia Keriso ma ia fa’asusulu atu i le lalolagi, ma fa’ailoa atu e sili atu le malosi o Lona mana nai lo le malosi uma lava o Satani, ma o Lona aao tausi o le a lagolagoina ai i latou uma lava e talitonu fa’alagolago atu ia te Ia.” – Testimonies for the Church, vol. 5, p. 742.
b. A’o tatou iloa atili pea lava pea Iesu, o a i’uga e o’o mai? Hosea 13:4; Efeso 3:17-19.
“O manatu lē atoatoa lea o loo i le to’atele o tagata e fa’atatau i le uiga ma le tofiga o Keriso, ua fa’apumo’omo’oina ai lo latou iloa fa’aletapua’iga ma ua matuā fa’aleagaina ai lo latou olaga aga’iga’i i luma i le olaga fa’alelagi. O le tapua’iga a tagata ta’ito’atasi i le lotolotoi o i tatou i le avea o i tatou ma nu’u, ua matuā maulalo lava. O loo matuā tele le fa’afoliga, tele fa’atulagaga, tele tele le tapua’iga faia i le laulaufaiva; peita’i o se mea e sili atu ona loloto ma sili atu ona mausali e tatau ona aumaia i totonu o lo tatou olaga fa’aletapua’iga.” – Ibid., p. 743.
“Fai mai le fetalaiga a Iesu: ‘E alofa mai lava le Tamā ia te outou.’ Afai e fa’atumau atu lo tatou fa’atuatua i le Atua, e ala atu ia Keriso, o le a fa’amaonia ‘e pei o se taula o le agaga, e mautinoa ma mausali, ma o le fa’atuatua fo’i lea e ulufale atu i totonu o le nofoaga o loo i tua atu o le ie puipui; o le nofoaga lea ua afio atu i ai Iesu, o Lē ua muamua atu mo i tatou.’ E moni o le a o’o mai mea e fa’anoanoa ai; ma puapuaga e tatau ona tatou iloa e o’o mai; peita’i e tatau ona tatou si’itia a’e mea uma lava, mea tetele ma laiti, i le Atua. Na te lē femēmēa’i i le tele o a tatou faitioga eseese, e lē fa’ato’ilaloina fo’i o Ia i le mamafa o a tatou avega. O Lana tausiga leoleo e o’o atu i aiga ta’itasi uma lava ma e si’omia ai tagata ta’itasi uma lava; e naunau alofa mai o Ia i a tatou pisinisi uma lava ma o tatou fa’anoanoaga. Na te maitauina loimata ta’itasi uma; na te lagonaina le lagona o ō tatou mafatiaga. O puapuaga ma tofotofoga uma lava e o’o mai ia i tatou iinei, o loo fa’atagaina, ina ia galuea’iina ai Ana sini o le alofa ia i tatou, ‘ina ia tatou tofusia ai i Lana amio paia’ ma fa’apena ona avea ai i tatou o ē tofusia i lena olioli atoatoa lea e maua i Lona fa’atasi mai.
“‘O le atua o le lalolagi lenei ua ia fa’atauasoina mafaufau o i latou e lē talitonu, ne’i susulu atu ia i latou le malamalama o le tala lelei matagofie a Keriso, le fa’atusa o le Atua.’ Peita’i o le Tusi Paia, i upu sili ona malolosi, ua ia tu’uina mai i o tatou luma le tāua o le mauaina o se iloa e fa’atatau i le Atua.” – Ibid., p. 742.
Aso Lua
Iulai 2
3. SA’ILI MA MAUA
a. Fa’amatala le tulaga ua i ai le lalolagi i le taimi lenei. 1 Ioane 5:19. Ae ui i lea, o le a le tele o mea e patino i le ola ma le amioatua ua foa’i mai e le Atua i totonu o Lana Upu? 2 Peteru 1:3.
“O le su’esu’ega a Satani i taimi uma lava le fa’atumulia o mafaufau o tagata i mea ia o le a taofia ai i latou mai i lo latou mauaina o le iloa e fa’atatau i le Atua. Na te sa’ili ina ia fa’atumau lo latou manatunatu i mea o le a fa’apogisaina ai le malamalama’aga ma fa’avaivaia ai le loto. O loo tatou i totonu nei o se lalolagi agasala ma le amio leaga, ma si’omia e a’afiaga e tauau ina tosina ma fa’avaivaia ai so’o o Keriso. Na fetalai mai le Fa’aola: ‘O le a ma’alili fo’i loto o tagata e to’atele, ona o le a tupu tele le amio leaga.’ E to’atele e taula’i la latou va’ai i le amio leaga mata’utia tele o loo i o latou itu uma, o le liliu ese mai i le Atua ma le vaivai i itu uma, mā, latou te talanoa e fa’atatau i nei mea se’ia o’o ina fa’atumulia o latou loto i le fa’anoanoa ma le masalosalo. Latou te fa’asilisiliina i o latou mafaufau le galuega poto a le fili taufa’asese, ma latou manatunatu tumau ai i mea e fa’avaivaia ai, na tutupu i ō latou olaga, a’o le taimi lava fo’i lea ua foliga mai ai ua latou lē iloa le mana o le Tamā oi le lagi ma Lona alofa lē mafuatia. O nei i’uga uma ua o’o mai e fa’apei lava ona mana’o i ai Satani. O se mea sese lo tatou manatu e fa’atatau i le fili o le amiotonu e peisea’i e ofu i le mana matuā tele lava, ae e matuā itiiti lava lo tatou manatunatu e fa’atatau i le alofa o le Atua ma Lona malosi. E tatau ona tatou talanoa e fa’atatau i le malosi o Keriso. E matuā lē mafai lava e i tatou ona lavea’i i tatou lava mai i lima o Satani; peita’i ua filifilia e le Atua se ala tatou te sao mai ai. O le Alo o Lē Silisiliese e i ai Lona malosi e tauina ai le taua mo i tatou, ma ‘e ala ia te Ia o Lē na alofa mai ia i tatou’ e mafai ai ona tatou sao mai ‘e sili atu nai lo tagata manumalo.’” – Testimonies for the Church, vol. 5, pp. 740, 741.
b. E fa’apefea ona feso’ota’i tu’usa’o atu le manumalo fa’aleagaga, i se sa’iliga finafinau o le iloa e sili atu ona tele e fa’atatau i le Atua? Fa’ata’oto 9:10; 15:14 (vaega muamua).
“O se iloa e fa’atatau i le Atua o le fa’avae lea o a’oa’oga moni uma lava ma auaunaga moni uma lava. E na o le pau lava lea o le talipupuni saogalemu moni e tete’e atu ai i fa’aosoosoga. E na o le pau lava lea o le fa’avae e mafai ona faia ai i tatou ia tatou fa’apei o le Atua i le amio.
“O le iloa lenei e mana’omia e i latou uma lava o loo galulue mo le si’itiaina a’e o ō latou uso a tagata. O le liuaga o le amio, o le mamā o le olaga, agava’a i auaunaga, usita’i i tapula’a sa’o, e fa’alagolago uma i se iloa sa’o e fa’atatau i le Atua. O lenei iloa o le sauniuniga aogā tāua lea mo le olaga lenei, ma le olaga oi lumanai.” – The Ministry of Healing, p. 409.
Aso Lulu
Iulai 3
4. FOLAFOLAGA SILISILI ESE MA LE TĀUA
a. O le a se mea atonu o loo tatou manatu fa’atauva’a i ai i se tulaga fa’anoanoa, i lo tatou olaga kerisiano? 2 Peteru 1:4.
“Afai tatou te manana’o tatou te ‘sola ese mai i lo tatou mauaina o se iloa ma’i, e tatau nei ona tatou amata i le finafinau e aunoa ma le fa’atuai, ina ia galuea’iina lo tatou fa’aolataga ma le mata’u ma le gatete. E matuā to’atele lava latou te lē tu’uina mai se fa’amaoniga ma’oti e iloa ai o loo latou fa’amaoni i a latou tautoga o le papatisoga. O lo latou vilivilita’i ua fa’agaseina e le uiga fa’afoliga, ma fa’anaunauga fa’alelalolagi, fa’alialiavale, ma le alofa o le tagata ia te ia lava. O nisi o taimi e osofia ai o latou lagona, peita’i latou te lē pa’u’ū i luga o le Papa, o Iesu Keriso. Latou te lē o mai i le Atua ma loto ua nutimomoia i le salamo ma le fa’aalia o agasala. O i latou e lagonaina le galuega o le liuaga moni i totonu o ō latou loto, o le a latou fa’aalia fua o le Agaga i o latou olaga.” – Testimonies for the Church, vol. 9, p. 155.
“A taula atu loa i tatou ma le mausali i totonu ia Keriso, ua i ai loa ia i tatou se mana e leai se tagata na te mafaia ona aveesea mai ia i tatou. Aisea? Auā ua tatou tofusia i le natura fa’alelagi, ina ua tatou sola ese mai i le amio leaga o loo i le lalolagi e ala i le tu’inanau, o i tatou ua tofusia i le natura o Lē na afio mai i le lalolagi lenei na fa’aofuina i le tino tagata, ina ia mafai ai ona ia tula’i ta’imua i le aigā tagata ma fausia a’e ai se amio e le’i i ai se ila poo se pona o le agasala.
“Aisea ua to’atele ai i tatou e matuā vaivai ma lē agava’a? O le tali ona tatou te va’ava’ai ifo ia i tatou lava, ma a’oa’o ō tatou lava uiga ma tatou manatunatu ai pe fa’apefea ona tatou faia se nofoaga mo i tatou lava, mo lo tatou tagata ma’oti, mo uiga ese fo’i e patino ia i tatou, e suitulaga ai i le su’esu’eina o Keriso ma Lana amio.” – Ibid., vol. 9, p. 187.
b. O le a le suiga e faia i totonu ia i tatou pe a tatou pu’eina moni lava nei folafolaga? Roma 3:31; 8:14.
“I le avea o i tatou ma kerisiano, ua tatou ta’utino ai ua tatou iloa ma fa’ataunu’uina o tatou matafaioi, ma ia fa’ailoa atu i le lalolagi, e i ai la tatou so’otaga vavalalata lava ma le Atua. E fa’apena ona tatau ona fa’ailoaina atu Keriso e ala i upu ma galuega fa’ale-Atua a Ona so’o.
“E mana’omia e le Atua mai ia i tatou le usita’i atoatoa i Lana Tulafono – o le fa’aaliga lea o Lana amio. . . . O lenei Tulafono o le si’ufofoga lea o le Atua ua toe fa’alogoina, o loo fetalai mai ia i tatou fa’apea, Ia sili atu ona paia, ioe ia sili atu pea ona paia. Ia tatou fa’anaunau i le atoatoaga o le alofa tunoa o Keriso; ioe, ia umi – ona fia ‘ai ma fia inu – i le amiotonu. Fai mai le folafolaga, ‘O le a ma’o’ona outou.’ Ia fa’atumulia o outou loto i se fa’anaunauga tele lava mo lenei amiotonu, o le galuega a lenei amiotonu,
ua fa’ailoa mai e le Upu a le Atua, o le filemu lea, ma o lona a’afiaga o le to’a filemu ma le mautinoaga e fa’avavau.
“O lo tatou avanoa sili ona taua lo tatou tofusia i le natura fa’alelagi, ina ua tatou sosola ese mai i le amio leaga o loo i le lalolagi e ala i le tu’inanau.” – Bible Training School, February 1, 1904.
Aso Tofi
Iulai 4
5. VAVAEESEINA I SE TULAGA OFOOFOGIA
a. Fa’amatala le finagalo o le Atua mo fanau ta’itasi uma lava a le aiga tagata. Ioane 17:17; Salamo 119:151.
“E mana’omia e le Atua mai ia i tatou le liua atu i Lona fa’atusa. O le fa’apa’iaina o le malamalama lea o ave pupula o Lona mamalu e lafoia mai i Ona tagata. Peita’i, o le auala e mafai ai ona tatou lafoia atu lenei pupula, e tatau ona tatou galulue fa’atasi ma le Atua. O le loto ma le mafaufau e tatau ona fufulueseina mai ai mea uma lava e ta’ita’ia atu ai i le sese. O le Upu a le Atua e tatau ona faitauina ma su’esu’eina, fa’atasi ma se naunauta’iga finafinau lava ina ia maua mai ai le mana fa’aleagaga. O le areto o le lagi e tatau ona ‘aina ma fa’amalūina e le puta, ina ia mafai ai ona avea ma vaega o le ola. E fa’apena ona tatou maua le ola e fa’avavau. Ona taliina loa lea o le tatalo a le Fa’aola, ‘Ia Ē fa’apaiaina i latou i Lau upu moni; o Lau Upu o le upu moni lea.
“E lē mafai e agelu ona suitulaga ia i tatou; peita’i latou te tula’i sauni e galulue fa’atasi ma i tatou i le tosinaina atu o tagata ia Keriso; ma o loo latou aioi mai ia i tatou ina ia tatou galulue fa’atasi ma i latou.” – Bible Training School, February 1, 1904.
Ua fa’ailoa manino mai lava e le Atua Na te finagalo ia i tatou ina ia tatou atoatoa; talu ai la ona Na te mana’omia lenei atoatoaga, o lea ua Ia faia ai le auala ina ia mafai ai ona tatou tofusia i le natura fa’ale-atua. E na o le pau lava lea o le auala e mafai ai ona fa’amanuiaina i tatou i a tatou taumafaiga mo le ola e fa’avavau. O le mana e foa’iina mai e Keriso.” – Ibid.
b. O le a le vala’au a le Atua ia i tatou i le taimi tonu lava lenei? 2 Korinito 6:15-18; 7:1.
“O le Atua-foafoa o le iunivesa ua Ia fetalai mai ia te oe e pei o se Tamā alofa. Afai e te vavae ese mai i le lalolagi i ou lagona, ma ē tumau sa’oloto mai i ona uiga leaga, ma sola ese ai mai i le amio leaga o loo i le lalolagi e ala i le tu’inanau, o le a avea le Atua ma ou Tamā, o le a Ia fa’atamafaiina atu oe i totonu o Lona aiga, ma o le a avea oe ma Ona suli. O le a Ia foa’i atu ia te oe le malō i lalo o lagi uma, e suitulaga i le lalolagi, mo se olaga o le usita’i. O le a Ia foa’i atu ia te oe se mamalu tele e fa’avavau ma se olaga e tumau e fa’avavau.” – Testimonies for the Church, vol. 2, p. 44.
Aso Faraile
Iulai 5
FESILI TOE FA’AMANATU
1. O fea e sau ai le fa’atuatua sili atu ona tele?
2. O le a se mea atonu ua ou lē fa’atāuaina atoatoa e fa’atatau i le alofa o le Atua mo a’u?
3. O fa’apefea ona tosina ese a’u e “la’au e iloa ai le lelei ma le leaga” o le taimi lenei?
4. O le a le mea o le a tupu pe afai o le a mausali lo’u taula i totonu ia Keriso e lē’i fa’apea lava ona mausali muamua?
5. E tusa ai ma lenei lesona, e fa’apefea ona mafai ona fa’aatoatoaina la’u amio lē atoatoa?