Ulua’i Aso
Setema 15
1. E LE MAFAI ONA LĒ O’O MAI, E LE MAFAI ONA TAPĒINA
a. O fa’apefea ona fa’ailoa mai le fa’ataunu’uina o le fa’asalaga mulimuli? 2 Peteru 3:10.
“O le lagi fou, ma le lalolagi fou, (Fa’aaliga 21:1. Isaia 65:17. 2 Peteru 3:13.) o le a lē va’aia, se’ivagana ua uma ona toe fa’atutūina mai tagata amio leaga sa feoti, ma fa’aumatiaina, i le i’uga o le 1000 tausaga. Na ou va’aia o Satani na ‘tatalaina mai i lona falepuipui,’ i le i’uga o le 1000 tausaga, i le taimi tonu lava na toe fa’aolaina mai ai tagata amio leaga; ma na fa’aseseina i latou e Satani e ala i lona fa’atalitonuina o i latou e fa’apea, na mafai ona latou ave fa’amalosia le aai paia mai i le au paia. O tagata amio leaga na latou savavali fa’ata’amilo uma atu i le ‘togalauapi a le au paia,’ fa’atasi ai ma Satani o loo ta’imua atu ia i latou; ma ina ua latou sauni e faia se taumafaiga ina ia latou avea le aai, na mānāva mai le Atua e Ou le malosi uma lava mai i Lona nofoali’i maualuga, i luga o le aai, se mānāva o le afi e fa’aumatiaina ai, lea na sau i lalo i luga ia i latou, ma susunuina ai i latou, o‘a’a ma lālā.’
“Ma na ou va’aia, e fa’apei ona avea Keriso ma Vine, ma o Ana fanau o lālā ia: e fa’apena fo’i Satani o ia o le ‘a’a,’ ma o ana fanau o ‘lālā’ ia, ma i le fa’aumatiaga mulimuli o ‘Koku ma Makoku,’ o le ‘au uma o ē amio leaga o le a susunuina, o le ‘a’a ma lālā,’ ma e lē toe feola mai lava.” – A Word to the Little Flock, pp. 11, 12.
Aso Gafua
Setema 16
2. O LE ELEELE UA FA’AMAMĀINA
a. Na fa’apefea ona iloa e perofeta o le Feagaiga Tuai le fa’aumatiaga mulimuli o le agasala ma le fa’amamāina o le eleele? Isaia 34:8-10; Esekielu 28:16-19.
“O le afi ua sau mai i le Atua mai i le lagi. O le eleele ua talepeina a’e. Ua aumaia a’upega sa natia i totonu o ona vaega loloto. O le mumū o le afi e fa’aumatiaina ai, ua pa a’e i luga, mai i vaega mavetevete loloto o le eleele. O papa ua mumū a’e i le afi. Ua o’o mai le aso o le a mū ai e pei o se umu. O le eleele ua liu suavai i le vevela tele, o le eleele fo’i, ma galuega uma o loo i ai ua susunuina uma. Malaki 4;1; 2 Peteru 3:10. O luga o le eleele ua foliga mai o se eleele tele ua liu suavai – o se vai lepa afi tele ua matuā pupuna a’e lava. O le taimi lea o le fa’asalaga ma le fa’afanoga o tagata lē amio Atua – ‘o le aso lea o le tauimasui a Ieova.’ . . .
“O tagata amio leaga ua latou maua lo latou taui i le lalolagi. Fa’ata’oto 11:31. O i latou ‘o le a avea ma tagutugutu o saito: ma o le aso o loo aga’i mai o le a susunuina ai i latou, ua fetalai mai ai Ieova o ‘au.’ Malaki 4:1. O nisi ua fa’aumatiaina e pei o le emo o le mata, a’o isi e puapuagatia i le tele o aso. O i latou uma e fa’asalaina ‘e tusa ai ma a latou amioga.’ O le uma ona tu’uina atu o agasala a ē amiotonu i luga o Satani, o lea ua faia ai o ia ‘ia puapuagatia e lē gata e mo lana lava fouvale, ae mo agasala uma fo’i na ia osofiaina tagata o le Atua latou te faia. O lona fa’asalaga e tatau ona matuā sili atu ona tele nai lo le fa’asalaga o i latou na ia fa’aseseina. Ina ua uma ona fano i latou uma lava o ē na pa’u’ū i ana fa’aseseega, e tatau ona ia ola pea ma puapuagatia pea lava. O afi mumū e fa’amamāina ai, e fa’aumatiaina mulimuli ai lava tagata amio leaga, o le a’a ma lālā – o Satani o le a’a, a’o i latou e mulimuli ia te ia o lālā ia. O le fa’asalaga atoa lava o le tulafono ua fa’ataunu’uina; o mana’oga o le fa’amasinoga tonu ua fa’amalieina; ma o le lagi ma le lalolagi, i lo latou va’ava’ai mai, ua latou fa’ailoa mai ai le amiotonu o Ieova.” – The Great Controversy, pp. 672, 673.
b. Fa’amatala le matagofie o le la’asaga e soso’o ai, a le Atua. Fa’aaliga 20:7-10, 15; 21:1, 2.
“A fa’amamāina mulimuli loa e le Atua le laueleele, o le a foliga mai o se vai lepa afi e leai ni ona tuaoi. E fa’apei ona tausia saogalemu e le Atua le va’a i le lotolotoi o fesoua’iga o le lolo, ona sa i ai i totonu tagata amiotonu e to’a 8, o le a Ia tausia saogalemu fo’i le Ierusalema Fou, o le a i ai i totonu le au fa’amaoni o augatupulaga uma, e amata mai lava ia Apelu amiotonu e o’o mai i le tagata paia mulimuli lava na ola. E ui lava, o le a afifi le eleele atoa i se sami o le afi suavaia, se’ivagana ai lena vaega o le a ta’atia ai le a’ai, ae o le aai o le a malutia saogalemu e fa’apei lava ona puipuia o le va’a, e se vavega o le mana o le Atua e Ona le Malosi uma. O le aai e tula’i e lē fa’aleagaina i le lotolotoi o le afi e fa’aumatiaina ai.” – Spiritual Gifts, vol. 3, pp. 87, 88.
Aso Lua
Setema 17
3. MEA MONI MATA’UTIA
a. O le a se manatunatuga e tatau ona tatou manatunatu i ai, ona o le mea moni mulimuli lava o le a o’o mai i luga o tagata o loo nonofo i luga o le fogaeleele? Salamo 139:23, 24; 2 Peteru 3:11.
“A i ai loa se a’afiaga e fa’apaiaina ai o le upu moni i loto ma olaga, e mafai loa ona tatou tu’uina atu i le Atua auaunaga e taliaina e Ia ma mafai loa ona tatou vi’ia o Ia i luga o le fogaeleele, ina ua tatou tofusia i le natura fa’alelagi ma ua tatou sosola ese mai i le amio leaga o loo i le lalolagi e ala i le tu’inanau.
“Oka, le to’atele o le a maua e lē o sauni pe a afio mai le Matai e fa’amasino i Ana auauna! E to’atele e lē lava o latou manatu e fa’atatau i le avea ma kerisiano. O le amiotonu a le tagata lava ia o le a lē aoga i le taimi lena. E na o i latou lava o le a maua mai o o’ofu i le amiotonu a Keriso, o loo fa’atumuina i Lona agaga, ma savavali e fa’apei ona Ia savali, i le mamā o le loto ma le olaga, o le a mafai ona latou tula’i i le tofotofoga. O talanoaga e tatau ona paia, ma o upu o le a fa’amāiina loa i le alofa tunoa.” – Testimonies for the Church, vol. 2, pp. 317, 318.
b. Fa’amatala le sili ona loloto o le tu’uina atu atoatoa o i tatou lea tatou te mana’omia vave lava. 1 Ioane 2:6.
“O tagata ta’itasi uma lava e talitonu moni lava i le upu moni o le a fa’apena fo’i ana galuega. O tagata uma o le a finafinau ma vilivilita’i, ma lē vaivai i a latou taumafaiga ina ia manumaloina mai tagata ia Keriso. Afai e totō maulaloina muamua le upu moni i totonu o ō latou lava loto, o le a latou saili loa ina ia totōina le upu moni lava lea i totonu o loto o isi. O le upu moni o loo tele lava ina taofia i fafo i le lotoā aupito i fafo. Ia aumai le upu moni i totonu o le malumalu aupito i totonu o le loto, ia faia le loto mona nofoali’i, ma ia puleaina ai le olaga. O le upu a le Atua e tatau ona su’esu’eina ma usita’ia, o le a maua loa e le loto le malologa ma le filemu ma le olioli, ma o fa’anaunauga o le a aga’i i le lagi; peita’i a vavaeeseina le upu moni mai i le olaga, i totonu o le lotoā aupito i fafo, o le loto e lē o fa’amafanafanaina e le afi pupula o le agalelei o le Atua.
“O le tapua’iga a Iesu, o loo taofia e le to’atele mo ni aso fa’apitoa, poo ni mea fa’apitoa fo’i e tutupu, a’o isi taimi e tu’uesea ma fa’atalale i ai. O le tapula’a tumau o le upu moni e lē mo na o ni nai itula itiiti i le Sapati, pe mo ni nai gaioiga iti fo’i o le alofa, peita’i e tatau ona aumaia i totonu o le loto, fa’aleleia ma fa’apaiaina ai le amio. Afai e i ai se taimi e saogalemu ai le tagata e aunoa ma lenei malamalama ma le malosi fa’apitoa mai i le lagi, e mafai la ona ia lafoa’ia le upu moni a le Atua. O le Tusi Paia, le upu paia mamā a le Atua, e tatau ona avea ma ona fautua ma ona ta’iala, o le mana lea e pulea lona olaga. Na te aumaia ona lesona ia i tatou pe afai o le a tatou taliaina ona lesona i o tatou loto.” – Ibid., vol. 5, p. 547.
Aso Lulu
Setema 18
4. AUA NE’I LILIUESEINA
a. Fa’amatala le fuafuaga a le Atua mo Ona tagata – ae po’o le a fo’i le manatu o tagata fa’alotolotolua o loo taula’i i lenei lalolagi, i lena fuafuaga ma i latou o loo sa’ili ina ia ola ai i le fuafuaga lea. Tito 2:11-14; Teuteronome 26:18.
“Ua o’o mai le taimi, o se vaega tele lava o i latou na olioli ma alalaga leo tetele muamua mo le olioli ona o lo latou iloaina o le afio vave mai o le Alii, ua latou tula’i nei i le itu a ekalesia ma le lalolagi, o ē na fa’aa’mu’amu muamua ia i latou ona o lo latou talitonu o le a afio mai Iesu, ma latou fa’asalalauina ai fa’amatalaga sese eseese uma ina ia fa’aosofia ai le fa’ailoga tagata e tete’e ai ia i latou ma fa’aumatia ai lo latou a’afiaga. O le taimi lenei, afai e fa’anaunau atu se tasi i le Atua soifua, ma fia ‘ai ma fia inu mo le amiotonu, ma foa’i atu ai e le Atua ia te ia ina ‘ia ia lagona Lona mana, ma fa’amalie ai fa’anaunauga o lona agaga e ala i Lona fa’asusuluina mai o Lona alofa i totonu o lona loto, ma afai na te fa’amamaluina le Atua e ala i lona vi’ia o Ia, e masani lava ona manatu nei tagata talitonu i ta’utinoga, i le afio vave mai o le Alii, o ia o se tagata fa’aseseina, ma tu’ua’iina i le fa’atosinaina poo lo o i ai fo’i ia i latou se agaga leaga.
“O le to’atele o nei kerisiano i a latou ta’utinoga, latou te oofu, tautala, ma gaioi e fa’apei lava o le lalolagi, ma e tasi lava le mea atonu o loo iloa ai i latou, o la latou ta’utinoga lea. E ui lava ina latou ta’utino mai o loo latou va’ava’ai atu mo Keriso, ae o a latou talanoaga e lē oi le lagi lea, ae o loo i mea fa’alelalolagi. ‘O a ituaiga amioga’ e tatau ona i ai i latou ‘i talanoaga paia uma ma le amio atua,’ o ē o loo ta’utino mai o loo ‘vaavaai ma fa’ata’alise atu i le o’o mai o le aso o le Atua.’ 2 Peteru 3:11, 12. ‘O tagata ta’itasi uma lava o loo i ai lenei fa’amoemoe i totonu ia te ia, na te fa’amamāina o ia lava, e fa’apei o mamā o Ia.’ 1 Ioane 3:3. Peita’i o loo fa’amaonia o le to’atele o loo tauaveina le igoa Aso Fitu O Le Toe Afio Mai, e sili atu lo latou su’esu’e ina ia fa’amatagofieina o latou tino ma ia va’aia i latou i foliga ma teuga lelei i mata o le lalolagi, nai lo lo latou su’esu’e ina ia a’oa’o mai i le Upu a le Atua pe fa’apefea ona taliaina i latou e Ia.” – Early Writings, p. 108.
b. I le eseesega, o le a la tatou sini e tatau ona i ai? 2 Korinito 4:18.
“Ia fa’amuta e fa’avavau au muimuiga e fa’atatau i lenei olaga, a ia fai ma avega o lou agaga le sini lea, pe fa’apefea ona ē fa’amausaliina le olaga e sili atu nai lo lenei olaga, o se igoa i maota ua saunia mo i latou e fa’amaoni ma tumu i le fa’atuatua e o’o i le i’uga. Afai e te faia se mea sese iinei, ua leiloa mea uma lava. Afai e te fa’aaluina le taimi o lou olaga atoa i le fa’amausaliina o oa fa’alelalolagi, ma ē lē maua ai oa fa’alelagi, o le a ē iloa ua ē faia se mea sese mata’utia lava. E lē mafai ona ē maua lalolagi uma e lua.” – Testimonies for the Church, vol. 1, p. 706.
Aso Tofi
Setema 19
5. VA’AVA’AI A’E IA SILI ATU ONA MAUALUGA
a. O fa’apefea ona lapata’iina i tatou i lo tatou talitonu tauaso i le vaivai o ta’ita’i fa’aletagata, ma isi uso a auauna vavalalata e mafai ona sese? Isaia 3:11, 12; Amosa 2:4; 4:12.
“O loo i ai i latou, o ē e ui lava ina manatu i ai fa’apea o loo latou auauna i le Atua, ae o loo latou fa’ata’alise ona fusia i latou i le lē fa’amaoni. Ia i latou, o ala pi’opi’o e foliga mai e sasa’o; o loo latou ola i le soliga fa’aauau pea o le upu moni a le Atua; o tapula’a amio leaga ua lalagaina fa’atasi i totonu o fa’atinoga o ō latou olaga, ma so’o se mea lava latou te ō i ai, latou te lūlūina ai lava fatu leaga. E aunoa ma lo latou ta’ita’iina o isi ia Keriso, o lo latou a’afiaga e mafua ai ona latou tu’ufesili ma masalosalo.” – Testimonies to Ministers, p. 281.
“Ia outou fa’autauta ia i latou e laugaina atu i isi le upu o le ola, ae latou te lē teufatuina le agaga o le loto maulalo ma le fa’afitia o i latou e i latou lava, lea na te a’oa’oina. O tane fa’apena e lē mafai ona fa’alagolago i ai i taimi o se fa’afitauli. Latou te lē amanaiaina vave lava le si’ufofoga o le Atua e fa’apei lava ona faia e Saulo, ma e fa’apei o Saulo, e to’atele latou te sauni e ta’uamiotonuina a latou filifiliga. Ina ua a’oa’iina Saulo e le Atua e ala atu i Lana perofeta, na fa’ailoa mai e Saulo ma le lē fefe sa ia usita’i i le si’ufofoga o le Atua; peita’i o le mamoe ma povi fetagisi mai na molimau mai na te lē’i usita’i. O le uiga lava lea e tasi o loo fa’ailoa mai ai e le to’atele i le taimi lenei lo latou fa’amaoni i le Atua, peita’i o a latou konoseti ma isi a latou fa’apotopotoga o fiafiaga, o a latou faigā uo fa’alelalolagi, o lo latou vi’ia e le tagata o ia lava, ma lo latou naunauta’iga finafinau lava mo lo latou ta’uta’ua, e molimau uma mai latou te lē’i usita’i i Lona si’ufofoga. ‘O Lo’u nu’u fo’i, o tamaiti o loo fa’apologaina i latou, e pule fo’i fafine ia te’i latou.’
“O se tapula’a maualuga lena ua tu’uina mai e le tala lelei i o tatou luma. O le kerisiano e usita’i i taimi uma, e lē gata o ia o se tagata fou, ae o ia fo’i o se tagata amio tonu i totonu ia Keriso Iesu. O ia o se malamalama e lē mate ina ia fa’ailoa atu i isi le ala aga’i atu i le lagi ma le Atua. O lē o loo ia aumaia lona ola mai ia Keriso, o le a leai sona fa’anaunauga mo fiafiaga valea a le lalolagi e lē fa’amalieina ai,” – Testimonies for the Church, vol. 5, p. 88.
Aso Faraile
Setema 20
FESILI TOE FA’AMANATU
1. Fa’amatala le upu moni fa’aleTusi Paia o le manatu lea e masani ona fa’aigoaina o le afi o seoli.
2. O le a le vavega e faia e le Atua i le lotolotoi o nā afi mumū e lē mafai ona fa’aumatiaina?
3. E fa’apefea ona mafai ona fa’atuputeleina lo’u iloa fa’akerisiano, ma aisea e tāua ai lenei tulaga?
4. Fa’amatala fa’afanoga o le fa’alagolago i le malosi fa’aletagata e fa’atatau i le fa’aolataga.
5. O a la’asaga e tatau ona ou faia ina ia sili atu lo’u va’ava’ai toto’a i le ola e fa’avavau?