1. AGALELEI Ulua’i Aso Iulai 14

a. O le a se mea e tatau ona tafe atu o le i’uga fa’alenatura lea o se mafutaga mafana moni ma le Atua? 2 Peteru 1:7 (vaega muamua); Mareko 12:28-31. “Ia si’itia i luga le tapula’a, ia si’itia i luga, ia maualuga ma ia sili atu ona maualuga. Ia fa’asino atu tagata i le mataupu lona lua sefulu o Esoto, lea o loo tusia ai iina le tulafono a le Atua. O ulua’i poloa’iga e fa o poloa’iga e sefulu, o loo fa’amatala mai ai lo tatou tiute i lo tatou Atua-foafoa. O le tagata e lē fa’amaoni i lona Atua, e lē mafai ona ia fa’amaoni i lona tuaoi. O lē e alofa silisili i le Atua, o le a ia alofa i lona tuaoi e fa’apei o ia lava. O le fa’amaualuga na te si’itia a’e o ia i le fa’alialiavale, ma ta’ita’ia ai le mea faigaluega fa’aletagata ina ia faia o ia ma atua. O le tala lelei a Keriso e fa’apaiaina ai le agaga, ma tuliesea ai le alofa o le tagata ia te ia lava.” – Testimonies for the Church, vol. 9, pp. 211, 212. [Author’s emphasis.]“E leai se tasi e mafai ona alofa ia Keriso ae lē alofa i Lana fanau. A tatou fa’atasi atu loa ia Keriso, ua ia i tatou loa le mafaufau o Keriso. O le olaga mamā ma le alofa ua susulu atu i le amio, o le agamalu ma le upu moni ua puleaina ai le olaga. O uiga tonu lava o foliga, ua suia. O Keriso lea ua afio tumau i totonu o le loto, ua Ia tu’uina maia se mana e liua ai, ma o foliga i fafo, e molimau i le filemu ma le olioli o loo pule aoao i totonu. Tatou te feinu i le alofa o Keriso, e fa’apei ona maua mai e le lālā le meaai mai i le vine. Afai ua fa’atasia atu i tatou i totonu ia Keriso, afai o le filo i lea filo ua fa’atasia atu ai i tatou i le Vine ola, o le a tatou tu’uina atu le fa’amaoniga o lea mea moni e ala i lo tatou fuaina mai o fuifui vine matagofie o fua ola. Afai ua fa’atasia atu i tatou i le Malamalama, o le a avea fo’i i tatou ma mea faigaluega o le malamalama, ma i a tatou upu ma galuega, o le a tatou lafoia atu ai le malamalama i le lalolagi.” – Selected Messages, bk. 1, p. 337.

---

2. AGALELEI MAI I LE LOTO Aso Gafua Iulai 15

a. E fa’apefea ona feso’ota’i vāvālalata atu lava le agalelei fa’aleuso i le fa’atuatua moni i le Atua – ma se molimau sa’o mo Keriso? 1 Ioane 4:20, 21; Iakopo 3:17. “Ua apoapoa’iina i tatou ina ia fa’aopoopo le amioatua, le agalelei fa’aleuso. Oka lo tatou mana’omia tele ia tatou la’asiaina lenei sitepu, ina ia fa’aopoopo lenei uiga i a tatou amio! I totonu o le tele o ō tatou aiga, o loo fa’aalia ai se uiga faigatā, finau, fai taua. O upu faitio ma gaioiga lē agalelei e inosia e le Atua. O fa’atonuga fia pule ma uiga fa’amaualuga fia pule e lē taliaina e le Atua. O le mafua’aga o le tele o eseesega o lo o i ai i le va o le au uso, ona ua latou lē fa’aopoopoina le agalelei fa’aleuso. E tatau ona i ai ia i tatou lena alofa mo isi, lea sa iā Keriso mo i tatou. O le tagata e fuaina e le Ali’i o le lagi i lona tau moni. Afai e lē agalelei o ia i totonu o lona aiga i le lalolagi lenei, e lē agava’a fo’i o ia mo le aiga i le lagi. Afai na te mana’o e fai lava lona lava loto, tusa lava po’o ai e tiga ai, o le a ia lē loto malie fo’i i le lagi, se’ivagana ua ia pule ai iina. O le alofa o Keriso e tatau ona puleaina ai o tatou loto, ma o le filemu o le Atua o le a afio tumau i totonu o ō tatou aiga. Sa’ili le Atua ma se loto nutimomoia ma le salamō, ma o le a fa’aliusuavaiina oe i le alofa mutimutivale aga’i i lou au uso.” – The Review and Herald, February 21, 1888. b. Ta’u mai se sitepu fa’avae i le fausiaina a’e o le agalelei fa’ale-uso. Mataio 6:12, 14, 15; Efeso 4:32. “Tatou te ole atu ina ‘ia fuaina mai e le Atua Lona alofa tunoa mo i tatou, e tusa ma le alofa tunoa tatou te foa’iina atu i isi. Ua fa’ailoa mai e Keriso, o le tulafono lea o le a foa’iina mai ai e le Atua ia i tatou Lona alofa tunoa. [Mataio 6:14, 15.] Oka se matagofie o aiaiga! peita’i e matuā itiiti lava le malamalama o loo i ai nei, po’o le taliaina fo’i o nei aiaiga. O le tasi o agasala sili ona ta’atele, ma o le agasala lea e faia ma ona i’uga e sili ona fa’aumatiaina ai, o le fa’atagaina lea o se uiga lē fa’amagalo. E matuā to’atele lava tagata o le a teufatuina le ita poo le tauimasui fo’i, ae mulimuli ane ona latou ifo lea i luma o le Atua ma ole atu ina ia fa’amagaloina i latou a’o latou fa’amagalo atu fo’i. E mautinoa lava, e lē mafai ona latou maua se iloa moni o le tāua o lenei tatalo, ana latou iloa, semanu latou te fefefe e tautalagia i lenei tatalo i o latou laugutu. O loo tatou fa’alagolago i le alofa tunoa fa’amagalo o le Atua i aso ta’itasi ma itula ta’itasi; e fa’apefea la ona mafai ona tatou teufatuina le ita tele ma le loto leaga aga’i i o tatou uso a tagata agasala! Afai, i feso’ota’iga uma lava a kerisiano i aso ta’itasi, o le a latou tauaveina ma fa’atinoina ai tapula’a o lenei tatalo, oka se suiga matagofie o le a faia i totonu o le ekalesia ma le lalolagi! O le molimau sili lea ona mafai ona fa’atalitonuina ai, e mafai ona tu’uina atu i le moni o le tapua’iga fa’ale-Tusi Paia.” – Testimonies for the Church, vol. 5, pp. 170, 171.

---

3. FA’ATO’ILALOINA O MEA E FA’ALAVELAVE I LE AGALELEI FA’ALEUSO Aso Lua Iulai 16

a. Fa’amatala le lautele ma le loloto o le agalelei fa’aleuso moni. Roma 12:9, 10; Filipi 2:3. “E mana’o Paulo ina ia tatou iloa le eseesega i le va o le alofa mamā, lē fa’apito, lea e osofia e le Agaga o Keriso, ma le uiga fa’atagā alofa leai se uiga, taufa’asese lea o loo tumu ai le lalolagi. O lenei alofa pepelo fa’afoliga, ua ta’ita’iseseina ai le tele o tagata. O le a soloiesea ai le eseesega i le va o le sa’o ma le sese, e ala i le loto gatasi fa’atasi ma le tagata solitulafono, e aunoa ma le fa’ailoaina atu ma le fa’amaoni ia te ia o ona sese. O se alofa fa’apea, e lē puna a’e lava mai i fefa’auoa’iga moni. O le agaga o loo osofia ai, e na o le loto fa’aletino lava e nofo ai. A’o agalelei i taimi uma le kerisiano, mutimutivale, ma fa’amagalo, e lē mafai ona ia lagona se loto gatasi ma le agasala. O le a ia inoino i le agasala ma pipi’i atu i mea lelei, i le lafoa’ia ai o feso’ota’iga po’o faigā uo fo’i ma i latou e lē amio atua. O le Agaga o Keriso o le a ta’ita’ia ai i tatou ina ia tatou inoino i le agasala, a’o loo tatou naunau ai e faia so’o se taulaga lava e fa’afitia ai i tatou, ina ia lavea’iina le tagata agasala.” – Testimonies for the Church, vol. 5, p. 171. b. O le a se mea e masani ona fa’aleagaina ai le agalelei fa’aleuso – ma e fa’apefea ona mafai ona lavea’iina i tatou mai i se mailei fa’apea? Luka 6:45; Eperu 12:15. “O upu uigā ua lafoina atu, ma faitioga ma’ama’ai o le tasi i le isi, peita’i o le taimi lava lea e tasi, o i latou tonu lava ia o loo lafoina atu nei fa’aupuga uigā ma faitioga, o lo o tauaso i o latou lava vaivaiga.” – Ibid., vol. 4, p. 222.“O le tautala i upu taufa’aleaga, o se mala fa’aluaina lea, e sili atu le mamafa o lona pa’ū mai i lē e tautalagia ia upu tau fa’aleaga nai lo lē o loo fa’alogo i ai. O lē na te fa’asalalauina fatu o fevaevaea’iga ma fefinaua’iga, na te seleseleina i totonu o lona lava agaga fua e oti ai. E matuā pagatia lava le tagata na te fela’ula’ua’i solo tala, le tagata e manatunatu ma fa’atupu fa’amatalaga leaga e fa’atatau i mea leaga na te masalosalo o loo faia e isi! . . .“O le agasala o le faia o tala taufa’aleaga, e amata i le teufatuina o manatu leaga. O le pepelo fa’aoleole taufa’asese fa’alata, e aofia ai le amio lē mamā i ona foliga uma lava. O se manatu lē mamā e fa’atagaina, o se fa’anaunauga lē paia ua teufatuina, ma ua fa’a’ele’eleaina ai loa le loto, o lona fa’amaoni ua fa’aleagaina. . . . Afai tatou te lē manana’o tatou te faia le agasala, e tatau ona tatou inoino i ona amataga tonu lava. O lagona ma fa’anaunauga ta’itasi uma lava, e tatau ona taofia ia usita’i atu i le manatunatuga poto ma le malosi fai filifiliga o le mafaufau. O manatu lē paia ta’itasi uma lava e tatau ona te’ena i le taimi lava e o’o mai ai. So’o o Keriso, ō atu i ō outou afeafe. Ia outou tatalo ai i le fa’atuatua ma ō outou loto atoa lava. O loo va’ava’ai mai Satani ina ia maileia ō outou vae. E tatau ona outou maua le fesoasoani mai i lugā pe afai tou te manana’o tou te sao ese mai i ana mailei.” – Ibid., vol. 5, pp. 176, 177.

---

4. FA’AMAONIGA MAUTINOA O LE AVEA MA SO’O Aso Lulu Iulai 17

a. A’o ma’alili le alofa o le to’atele, o le a le tapula’a fa’ale-Tusi Paia e masani lava ona galo ia i tatou? Tito 3:2. O le a le mea o le a tupu pe afai tatou te amanaiaina lea tapula’a? Ioane 13:35. “Ia fa’ataga ‘lē o loo tu’ua’ia le au uso’ na te ulufale atu i totonu o le loto o se tasi o nei tane [i latou e tutusa o latou fa’atuatuaga], ma puleaina ai le mafaufau ma manatunatuga, ma foafoaina ai loa manatu fuā loto leaga, ma ua teufatuina loa le masalosalo ma le anovale; ma o lē na manatu o loo saogalemu o ia i le alofa ma le uiga fa’auo o lona uso, ua ia iloa ua lē talitonuina o ia, ma o ana sini ua fa’amasinoseseina. O le uso pepelo ua galo ia te ia ona lava vaivaiga fa’aletagata, ua galo ia te ia lona matafaioi ia aua na te manatu pe tautala e fa’atatau i se mea leaga, ne’i ia lē vi’ia le Atua ma ia fa’amanu’alia ai Keriso, i peresona o Lana au paia, ma o uiga leaga ta’itasi uma e mafai ona manatu i ai pe va’aia fa’alemafaufau fo’i, ua faia aga’i i ai fa’amatalaga e aunoa ma le alofa, ma o le amio a se tuagane ua manatu i ai e pogisa ma fesiligia.“Ua fa’alataina matafaioi paia. O mea sa tautalagia i le fa’atuatuaga fa’aleuso, ua toe fa’amatalaina ma ua fa’auigaseseina; ma o upu ta’itasi, o gaioiga ta’itasi, tusa lava po’o le a le fa’amaoni ma le lelei o manatu na tautalagia ai, ua va’ili’iliina e le faitioga lē alofa fuā loto leaga a i latou sa manatu i ai e amiotonu tele, ma fa’aaloalogia tele o lea latou te lē fa’aaogāseseina ai, i se tulaga sili ona itiiti, so’otaga fa’auo poo le talitonuga fo’i fa’ale-uso. O loto ua punitia ese mai i le alofa tunoa, ma le fa’amasinoga, ma le alofa o le Atua; ma ua fa’aalia mai ai le uiga lē alofa, ‘ata’ata fa’atauemu, fa’a’amuamu fa’aulaula lea e lafoia mai e Satani i lē ua ia maileia.“O le Fa’aola o le lalolagi na fa’apena ona tauemuina o Ia, ma ua lamatia fo’i i tatou i le a’afiaga o le agaga sauā lava lea e tasi. Ua o’o mai le taimi e lē o toe saogalemu ai ona toe tu’u lou fa’atuatuaga i se uo po o se uso.“E fa’apei o aso o Keriso, o sipai sa mulimuli i Ona ala uma, ma ua fa’apena fo’i ona i ai sipai i o tatou ala i le taimi lenei. Afai e mafai ona fa’aaoga e Satani i latou e ta’utino mai o i latou o tagata talitonu, e galulue e avea ma tagata e tu’ua’iina le au uso, ua ia matuā fiafia lava la; auā o i latou o loo faia lenei tulaga, o loo latou auauna moni lava ia te ia e fa’apei ona faia e Iuta ina ua ia fa’alataina Keriso, e ui lava atonu o loo latou faia ma le lē iloa.” – The Review and Herald, June 3, 1884.“Afai o manino se agasala i se uso, aua ne’i mānavaina atu i se isi lava tagata, peita’i o le alofa mo le agaga o le uso, fa’atasi ai ma se loto e tumu i le alofa mutimutivale, fa’atasi ai ma le tele o le alofa tunoa, ia e ta’u atu ai ia te ia le sese, ona tu’ua lea o le mataupu ia te ia ma le Ali’i. Ua uma ona ē faia lou tiute. E lē tatau ona ē faia se fa’asalaga.“Ua faia o se uiga māmā lava le fa’agutuina o se tuagane, ma faitioina o ia, ma taofia ai o ia i lalo o le fa’asalaga. O loo i ai se naunauta’iga mo le Atua, peita’i e lē tusa ma le iloa. Afai o le a fa’atulaga lelei e tagata ta’itasi uma lona lava loto, a feiloa’i fa’atasi le au uso, o la latou molimau o le a sauni ma o le a aumaia mai i se loto tumu atoatoa, ma o tagata e lē talitonu i le upu moni o loo si’omia mai, o le a latou lagonaina. O le fa’aaliga a le Agaga o le Atua o le a ta’uina atu i o latou loto o outou o fanau a le Atua.” – Testimonies for the Church, vol. 1, p. 165.

---

5. I LE ALA ATOA LAVA E O’O I LE I’UGA Aso Tofi Iulai 18

a. O le a le olega ua faia mai i le ekalesia se’ia o’o i le i’uga o le taimi? Eperu 13:1. “O se alofa ma le agalelei lea e fa’ato’a maua pe afai e ioeina o tatou ala e a tatou uo e fa’apea e sa’o, e leai sona aoga moni, auā o se tulaga fa’alenatura lea i le loto lē fa’afouina. O i latou e ta’utino mai o i latou o fanau a le Atua ma o loo savavali i le malamalama, e lē tatau ona latou lē fiafia pe feita fo’i pe a kolosiina lo latou ala e se tagata.“E te fiafia i le upu moni ma e te naunau mo lona tauaveina i luma. O le a tu’uina oe i mea eseese e tutupu ina ia tofotofoina ai oe. Atonu o le a ē fausiaina a’e se amio moni fa’akerisiano pe afai o le a ē gaua’iina atu oe i le koleniga. O ou naunauta’iga e sili ona tāua, ua lamatia. O le mea e sili ona ē mana’omia, o le fa’apaiaina moni lea ma se agaga o le fa’afitia e le tagata o ia lava. Atonu tatou te maua se iloa e fa’atatau i le upu moni, ma tatou faitauina ona mea lilo sili ona natiaina, ma tu’uina atu o tatou tino ina ia susunuina mo le upu moni; peita’i, afai e lē o i ai ia i tatou le alofa ma le agalelei mutimutivale, ua na o i tatou lava o ni apa memea ta’alili ma se sumepalo tagitagi. . . .“E matuā itiiti lava lou iloa e fa’atatau i tofotofoga i loto o tagata mafatia o ē o loo saisaitia i filifili o le pouliuli ma e lē o i ai ni a latou filifiliga mausali ma malosi o le amio. Finafinau ina ia ē malamalama i vaivaiga o isi. Fesoasoani i ē o loo mana’omia le fesoasoani, fa’asatauro e oe, oe lava, ma ia fa’atagaina Iesu na te pulea lou loto, ina ia mafai ai ona ē fa’ataunu’uina tapula’a o le upu moni i lou olaga i aso ta’itasi. O le a avea loa oe, e lē’i fa’apea lava muamua, o se fa’amanuiaga i le ekalesia ma i latou uma lava e te feso’ota’i i ai.” – Testimonies for the Church, vol. 4, pp. `133, 134.“Afai o le a avea o tatou uso ma o tatou tuafafine o ni misionare mo le Atua, ma asiasi atu i ē mama’i ma puapuagatia, ma galulue ai ma le onosa’i ma le agalelei mo ē o loo sese – i se fa’amatalaga pu’upu’u, afai o le a latou fa’aa’oa’o ia Iesu – o le a i ai le manuia i le ekalesia i ona tuaoi uma lava.” – Ibid., vol. 5, p. 176.

FESILI TOE FA’AMANATU Aso Faraile Iulai 19

1. Fa’amatala po’o le a se mea e mafai ona va’aia e isi i le amio a lē e alofa i le Atua. 2. E fa’apefea ona mafai ona ou fausiaina a’e se lagona sili atu ona malosi o le agalelei fa’ale-uso i totonu o lo’u loto? 3. I le lotolotoi o i latou ou te iloa, o ai e tatau ona ou fa’ailoa atu i ai le agalelei sili atu ona loloto? 4. E fa’apefea ona mafai ona ou fa’aigoaina le agasala i lona igoa sa’o ma ou alo ese ai mai i se uiga tu’ua’i? 5. I o’u manatunatuga, aisea e tauau ai ina ou so’ona tu’ua’ia nisi atonu e vaivai?