Ulua’i Aso
Aukuso 25
1. FA’AFITAULI I UIGA
a. O fa’apefea ona fa’amatala e Peteru le i’uga o faia’oga pepelo? 2 Peteru 2:20.
“O faia’oga pepelo, e tula’i mai i totonu o le ekalesia ma ua manatu le to’atele o lo latou au uso i totonu o le fa’atuatuaga, o i latou o ni faia’oga fa’amaoni, ua fa’atusalia i latou e le aposetolo i ‘vai eli e lē o i ai ni vai, o ao ua lelea i le afā; ua tu’ua mo i latou le puao o le pouliuli e fa’avavau.’ Na ia fa’ailoa mai, ‘E sili atu le leaga o lo latou i’uga nai lo lo latou amataga.’” – The Acts of the Apotles, p. 535.
b. O a upu e fa’avavau e fesoasoani ia i tatou ina ia tatou fa’atumauina se talitonuga mausali ma faia filifiliga poto pe a va’ai maulalo mai isi ia i tatou pe latou te tofotofoina fo’i lo tatou onosa’i? Failauga 7:8.
“E toa’tele tagata e manana’o e fa’avi’ivi’iina i latou, ma, o loo latou mata’itu ma le fuā mo uiga fa’alēano poo le lē amanaiaina fo’i o i latou. O loo i ai se agaga faigata lē fa’amagalo. O loo i ai le ‘anovale loto leaga, fete’ena’iga, ma le fa’atautavā. . . .
“A’o ē taumafai finafinau lava ina ia ē muamua, manatua o le a ē mulimuli i le finagalo o le Atua pe afai e te lē teufatuina se uiga agamalu ma le loto maulalo. O le fa’amaualuga o le loto o le a mafua ai ona to’ilalo le to’atele i le tulaga na semanu latou te manuia ai. ‘E muamua le fa’amaulalo i le mamalu,’ ma ‘e sili ona lelei o lē ua onosa’i nai lo lē ua loto fa’amaualuga.’” – Testimonies for the Church, vol. 5, p. 50.
Aso Gafua
Aukuso 26
2. O NI ATA FA’AFA’ATUSA MATAGOFIE
a. O le a se mea o loo fa’asino atu i ai Peteru ina ia fafaguina ai i tatou? Fa’ataoto 26:11; 2 Peteru 2:20-22.
“O le lalolagi ua pula mo lona fa’aumatiaga. E itiiti lava si taimi e mafai ona onosa’i ai le Atua. . . . E tatau ona latou inuina toēga o le ipu o Lona to’asa e lē masuia i le alofa tunoa. . . . O le a lē umi ae iloa loa po’o ai o loo i le itu a le Atua, ae po’o ai fo’i o le a lē mā ona o Iesu. O i latou e leai so latou loto tele fa’aleagaga e filifili ai ma le fa’amaoni i le tulaga latou te tutū ai i le lotolotoi o tagata lē talitonu, ma lafoa’i aga ma tifiga a le lalolagi, ma fa’ata’ita’i i le olaga o Keriso o le fa’afitia e le tagata o ia lava, o loo latou mamā ia te Ia, ma latou te lē fiafia i Lana fa’ata’ita’iga.” – Testimonies for the Church, vol. 1, p. 287.
b. O fa’apefea ona lapata’ia fa’apea e Keriso i tatou i lo tatou to’ilalo i lo tatou lē fa’atumauina o se so’otaga agamalu, fa’alagolago atu ia te Ia? Luka 11:24-26.
“O le fale fa’amatagofieina o loo fa’atusalia mai ai le tagata e ta’uamiotonu e ia, ia lava. O Satani ua tuliesea e Keriso. Peita’i na ia toe fo’i mai, i lona fa’amoemoe na te mafai ona toe ulufale mai. Ua ia maua mai le fale o gaogao, ua uma ona salu fa’amamāina, ma fa’amatagofieina. E na o le ta’uamiotonuina lava e le tagata o ia lava, o loo nofo ai iina. “Ona alu ai lea o ia, ua na aumaia isi agaga e to’a fitu e sili lo latou leaga i lona, ona latou ulufale atu ai lea, ua nonofo ai; ona sili ai lea o le leaga o le i’uga o lea tagata nai lo lona amataga.’
“O le ta’uamiotonuina e le tagata o ia lava o se mala lea, o le fa’afefeteina e le tagata o ia lava, lea e fa’aaoga e Satani mo lona vi’iga. O i latou e fa’amatagofieina le loto i upu fa’avi’ivi’i ma vi’iga o le tagata lava ia, ua latou saunia le ala mo isi agaga leaga e fitu e sili atu ona leaga nai lo le muamua. I lo latou taliaina tonu lava o le upu moni, o nei tagata latou te fa’aseseina i latou lava. O loo latou fausia i luga o se fa’avae o le ta’uamiotonuina e le tagata o ia lava. O tatalo a fa’alapotopotoga atonu e ofoina atu i le Atua ma se fa’asologa o sauniga, peita’i afai o loo ofoina atu i le uiga ta’uamiotonuina e le tagata o ia lava, e lē o vi’ia ai le Atua e i latou. Ua fetalai mai le Ali’i, ‘O le a Ou fa’ailoa atu lau amiotonu, ma au galuega; auā o le a lē fa’amanuiaina ai oe.’ E ui lava i a latou fa’aaliga uma lava, o ō latou tino teuteuina, e sau Satani i totonu fa’atasi ma se vaega o agelu leaga ma nofo ai i totonu o le loto, ina ia fesoasoani i le fa’aseseega. Ua tusi mai le aposetolo, ‘Auā afai na latou sosola mai i mea leaga a le lalolagi ina ua iloa lelei o le Alii o le Fa’aola lea o Iesu Keriso, ae ua toe fa’alavelaveina i latou, ma toilalo ai i nā mea, ona tele ai lea o le leaga o lo latou iuga nai lo lo latou amataga. Auā e lelei pe ana latou lē iloa le ala o le amiotonu, ae leaga ina ua latou iloa, ma toe liliu ese i le poloaiga paia sa tuuina mai ia te i latou.’” — The SDA Bible Commentary [E. G. White Comments], vol. 5, p. 1093.
Aso Lua
Aukuso 27
3. FA’AAUAU PEA I LE FA’ATUATUA
a. Aisea o loo fa’atonuina manino ai i tatou ina ia tatou “aga’i pea i luma” i totonu ia Keriso? Kolose 1:21-23.
“E lē fa’apea se’iloga tatou te filifilia ma le loto i ai, le auaunaga i le mālō o le pouliuli ina ia tatou o mai ai i lalo o lana pule. E na o lo tatou fa’atalalē lava e fa’atasi atu i le mālō o le malamalama. Afai tatou te lē galulue fa’atasi ma mea faigaluega a le lagi, o le a pulea loa e Satani le loto, ma o le a ia faia ma ona nofoaga tumau. E tasi lava le talitā e tete’e atu ai i le ti’apolo, o le afio lea o Keriso i totonu o le loto e ala i le fa’atuatua i Lana amiotonu. Se’ivagana ua tatou matuā feso’ota’i lava ma le Atua, e lē mafai lava ona tatou te’ena a’afiaga lē fa’apaiaina o le alofa o le tagata ia te ia lava, o le so’ona fa’amalieina o tu’inanau o le tagata lava ia, ma fa’aosoosoga ina ia agasala. Atonu tatou te lafoa’ia le tele o masaniga leaga, mo sina taimi atonu tatou te lafoa’ia ai Satani; peita’i a aunoa ma se so’otaga ola ma le Atua, e ala i le gaua’iina atu o i tatou ia te Ia i sekone ta’itasi, o le a fa’ato’ilaloina i tatou. A aunoa ma se mafutaga ta’ito’atasi ma Keriso, ma se talanoaga fai fai pea, ua tatou i lalo loa o le malosi o le fili, ma o le a tatou faia ai ana fa’atonuga i le i’uga.” The Desire of Ages, p. 324.
b. Fa’amatala le paleni matagofie e tatau ona tatou malamalama i ai e ala i le ta’uamiotonuina e ala i le fa’atuatua ia Iesu. Roma 3:24-26; Eperu 6:4-6; 10:26, 27.
“O Lē na fa’amalolo i tagata mama’i ma tuli i fafo temoni ina o Ia savali i le lotolotoi o tagata, o le Fa’aola malosi lava lea e tasi o le taimi lenei. O le fa’atuatua e o’o mai e ala i le upu a le Atua. Taofi mau nei la Lana folafolaga, ‘O lē e sau ia te A’u o le a Ou lē tulia lava i fafo.’ Ioane 6:37. Ia lafo atu nei oe i Ona aao ma le alaga, ‘Le Alii e, ou te talitonu; Ia Ē fesoasoani mai i lo’u lē talitonu.’ E lē mafai ona ē fano a’o ē faia lenei alaga – e lē mafai ona ē fano.” – Ibid., p. 429.
“A’o va’ava’ai atu le tagata agasala i le tulafono, o lona agasala ua fa’amaninoina mai ia te ia, ma ua mamafa mai i le malamalama’aga o lona mafaufau, ma ua fa’asalaina ai o ia. E tasi lava lona fa’amafanafanaga ma lona fa’amoemoe, e maua lea i lona va’ava’ai atu ia Iesu o maliu i Kalevario. A’o ia manatunatu i folafolaga, ma talia ai le upu a le Atua e fa’apei lava ona Ia fetalaia mai, o le mapusaga ma le filemu ua o’o mai i lona loto. Ua ia alaga fa’apea, ‘Le Alii e, ua Ē folafola mai Ē te lavea’i ia i latou uma e o atu ia te Oe i le suafa o Lou Alo. O a’u o se tagata ua lē iloa le ala, leai so’u fesoasoani, leai so’u fa’amoemoe. Le Alii e, lavea’i mai, po’o le a ou fano.’ O lona fa’atuatua ua taofi mau atu ia Keriso, ma ua ta’uamiotonuina o ia i luma o le Atua.
“A’o mafai ona fa’amasino tonu le Atua, ma Ia ta’uamiotonuina le tagata agasala e ala i le amiotonu o Keriso, e leai se tagata e mafai ona ufiufiina lona agaga i ofu o le amiotonu a Keriso a’o ia fa’atinoina agasala o loo iloa, poo lona fa’atalalē fo’i i tiute o loo iloa. E mana’omia e le Atua le gaua’i atoa lava o le loto, a’o le’i mafai ona o’o mai le ta’uamiotonuina; ma o le auala e mafai ai ona fa’atumauina e le tagata le ta’uamiotonuina, e tatau ona i ai le usita’i fa’aauau, e ala i le fa’atuatua galue, ola lea e galuea’iina e le alofa ma fa’amamāina ai le agaga.” – Selected Messages, bk. 1, pp. 365, 366.
Aso Lulu
Aukuso 28
4. OLA E TUSA AI MA LE MALAMALAMA
a. O le fa’amanuiaina o i tatou e pei ona i ai i le taimi lenei i le tele o le malamalama mai i le Lagi, o le a se mea tatou te mana’omia ia manatua pe afai e moni lo tatou naunauta’iga e fa’atatau i lo tatou fa’aolataga? Iakopo 4:17.
“A talanoa atu i tagata e fa’atatau i le mataupu o le ola maloloina, e masani lava ona latou fai mai: ‘E tele lo matou iloa e sili atu nai lo lo matou iloa moni o loo i ai.’ Latou te lē iloa e fa’amasinoina i latou mo ave ta’itasi uma o le malamalama e fa’atatau i lo latou ola maloloina fa’aletino, ma o a latou masaniga ta’itasi uma o loo mātala atu i le auiliiliga a le Atua. O le olaga fa’aletino e lē tatau ona tausia i se uiga fa’atautala. O tōtōga ta’itasi uma, o vaega ta’itasi uma o le tagata ola, e tatau ona leoleoina fa’apaiaina mai i fa’atinoga e fa’amanu’alia ai.” – Testimonies for the Church, vol. 6, p. 372.
b. I le tele o vaega o le upu moni mo le taimi lenei lea e mana’omia ai le toe fuata’iga (o le ola maloloina o le tasi lea o fa’ata’ita’iga), o le a le mamao o o’oo’oga o i’uga o a tatou filifiliga o aso ta’itasi? Roma 14:21; Ieremia 13:20.
“O le mataupu o le toe fuata’iina o le ola maloloina ua fa’ailoaina atu i totonu o ekalesia; peita’i o le malamalama e lē’i taliaina ma le loto atoa. O le tu’inanauga fa’apito e fa’aumatiaina ai le ola maloloina o tane ma fafine, ua latou fa’alēaogaina le a’afiaga o le feau lea e tatau ona saunia ai ni tagata mo le aso tele o le Atua. Afai e mana’o ekalesia i le malosi, e tatau ona latou ola i le upu moni ua tu’uina atu e le Atua ia i latou. Afai e lē amana’ia e tagata o a tatou ekalesia le malamalama i lenei mataupu, o le a latou seleseleina le i’uga mautinoa i le pa’ū maulalo fa’aleagaga ma le fa’aletino. Ma o le a’afiaga o nei tagatā ekalesia sili atu ona matutua, o le a fa’afefeteina ma fa’atumulia ai i latou e fou mai i le fa’atuatuaga. E lē o galue i le taimi lenei le Alii ina ia aumaia ni tagata se to’atele i totonu o le upu moni, talu ai ona o tagata ekalesia e lē’i liua lava, ma i latou sa liua muamua ae ua toe solomuli i tua. O le a le a’afiaga o le a faia e nei tagata lē fa’apaiaina i tagata fou e liua mai? O le a latou lē fa’alēaogaina ea le feau na tu’uina mai e le Atua lea e tatau ona alagaina e Ona tagata?” – Ibid., pp. 370, 371.
c. I lo tatou iloaina o matafaioi mamafa ua i luga nei o i latou uma lava ua tu’uina mai i ai le malamalama na auina mai e le Atua mo le taimi lenei, o le a se olega finafinau ua toe fa’aleoina mai i lalo ia i tatou i le taimi tonu lava lenei? Ieremia 3:12, 13; Salamo 32:5.
Aso Tofi
Aukuso 29
5. AGA’I I LUMA
a. Fa’amatala ni olega mo le ekalesia a le Atua o loo ola i taimi faigata. Eperu 5:13, 14; 6:1; Filipi 2:14, 15.
“I a tatou ekalesia uma lava, e tatau ona i ai se toe liuaga ma le toe tu’u atu fa’apaiaina mo auaunaga. O le a tatou lē loto gatasi ea, i la tatou galuega i le lumana’i ma fa’apotopotoga tatou te faia? O le a tatou lē tauivi ea ma le Atua i le tatalo, ma ole atu mo le Agaga Paia ina ia afio mai i totonu o loto ta’itasi uma? O le Agaga Paia o Keriso, a fa’aalia i le lotolotoi o i tatou, o le a fa’amaloloina ai le lepela o le lē talitonu lea ua matuā fa’avaivaia ma lē mafai ai ona fa’ataunu’uina la tatou auaunaga ona o le lē agava’a. Tatou te mana’omia le mānava o le ola o le Atua ina ia mānāvaina mai i totonu ia i tatou. E tatau ona avea i tatou ma mea faigaluega e auina atu ai e le Ali’i le malamalama ma le alofa tunoa i le lalolagi. O i latou na tu’umuli i tua e tatau ona toe faa’fo’iina mai. E tatau ona tatou tu’ueseina a tatou agasala, e ala i le fa’aalia o a tatou agasala ma le salamo, ma le fa’amaulaloina o ō tatou loto fa’amaualuluga i luma o le Atua. O galu lolo o le mana fa’alēagaga o le a sasa’aina mai i luga o i latou ua saunia ina ia talia lea mana fa’aleagaga.” – Testimonies for the Church, vol. 8, p. 46. [Author’s emphasis.]
“Tusa lava po’o le a lau galuega o le a faia, tuagane pelē ma tuafafine, ia outou faia e peisea’i o loo outou faia mo le Matai, ma ia ē faia le mea sili e te mafaia. Aua e te lē amanaiaina avanoa fa’aauro o le taimi lenei ma ē fa’amaonia mai ai o lou olaga o se to’ilalo, a’o ē nofonofo fa’afifilemu ma ē moe miti ai i se olaga fa’afifilemu ma le fa’amanuiaina i se galuega lea e lē’i saunia lava oe e le Atua e te faia. Ia ē faia le galuega lena e silisili ona latalata ane ia te oe. Ia ē faia, e ui lava ina atonu o loo i le lotolotoi o fa’afanoga ma faigata i totonu o le laueleele fa’amisionare; peita’i, aua, ou te aioi atu ia te oe, aua e te faitio e fa’atatau i faigata ma lou fa’asatauroina ai e oe o oe lava. Va’ai fo’i i tagata Waldenses. Va’ai po’o a fuafuaga na latou fafauina ina ia mafai ai ona susulu atu le malamalama o le tala lelei i totonu o mafaufau pogisa. E lē tatau ona tatou galulue ma le manatu ina ia maua lo tatou taui i le olaga lenei, ae ia tatou galulue ma o tatou mata o taula’i mausali atu i le taui i le i’uga o le tausinioga. O tane ma tama’ita’i o loo mana’omia i le taimi lenei, o ē e mausali i tiute e fa’apei ona mausali o le nila i le pole, o tane ma fafine o le a galulue e aunoa ma le fa’alamolemoleina o lo latou ala, e aunoa fo’i ma le aveesea muamua o mea o loo fa’alavelaveina ai le tauaveina i luma o le galuega.” – Colporteur Ministry, pp. 68, 69.
Aso Faraile
Aukuso 30
FESILI TOE FA’AMANATU
1. Ou te manatu ea o se mea e sili ona leaga pe a foliga mai e lē fa’atāuaina a’u e se tasi?
2. O a auala e fa’aalia ai le ta’uamiotonu e le tagata o ia lava, i aso mulimuli nei?
3. E fa’apefea ona mafai ona ou maua ma fa’atumauina le ta’uamiotonuina e ala i le fa’atuatua i le toto o Keriso?
4. O a vaega o le olaga e mana’omia ia sili atu ona lafoia atu ai e a’u gaioiga, le mea o loo o’u iloa?
5. A fa’aosoosoina a’u ina ia ou faitio, o le a se mea e tatau ona ou manatua?