Ulua’i Aso
Setema 22
1. GALUE MATAALIA I LE FA’ATA’ALISEINA O LE GALUEGA
a. I lo tatou iloaina o le afi sili ona mata’utia, o le a se mea ua vala’auina i tatou ia tatou faia?
“O le taimi lenei, a’o le’i toe afio mai le Atalii o le tagata, o le tala lelei e tatau ona tala’iina atu ‘i mālō uma, ituaiga, ma gagana, ma tagata.’ Fa’aaliga 14:6, 14. O le Atua ‘ua Ia filifilia se aso, o le a Ia fa’asalaina ai le lalolagi.’ Galuega 17:31. Ua ta’u mai e Keriso ia i tatou le taimi o le a o’o mai ai lena taimi. Na te lē o fai mai o le a liua uma le lalolagi, ae peita’i ‘o lenei tala lelei o le malo o le a tala’iina atu i le lalolagi atoa e fai ma molimau i malo uma; ona o’o mai ai lea o le lalolagi.’ O le tu’uina atu o le tala lelei i le lalolagi, ua i lo tatou malosi le fa’avaveina o le toe afio mai o lo tatou Alii. E lē gata e tatau ona tatou va’ava’ai atu, peita’i e tatau fo’i ona tatou fa’avaveina le o’o mai o le aso o le Atua. 2 Peteru 3:12.. Ana fa’apea na faia e le ekalesia a Keriso lana galuega filifilia na tu’uina atu i ai e le Alii, semanu ua uma ona lapata’iina le lalolagi atoa a’o le’i o’o i lenei taimi, ma semanu ua afio mai le Alii o Iesu i lo tatou lalolagi i le mana ma le mamalu tele. . . .
“O i latou o loo va’ava’ai atu mo le Alii o loo latou fa’amamāina o latou agaga e ala i le usita’i i le upu moni. O le mataala vilivilita’i latou te tu’ufa’atasia ai le galue finafinau. Talu ai ona ua latou iloa ua i faitoto’a le Alii, o lea ua fafaguina ai lo latou naunauta’i ina ia fa’atasi ma mea faigaluega fa’alelagi i le galulue mo le fa’aolataga o tagata.” – The Desire of Ages, pp. 633, 634.
Aso Gafua
Setema 23
2. OKA SE AVANOA SILI ONA TĀUA!
a. E fa’apefea ona tatau ona fa’avaveina e i tatou ta’ito’atasi le toe afio mai o Keriso? Failauga 11:1, 2, 6.
“Ua tu’uina mai e Keriso i le ekalesia se tiute paia. O tagatā ekalesia ta’itasi uma e tatau ona avea ma auala e mafai ona foa’i atu ai e le Atua i le lalolagi oa o Lona alofa tunoa, o oa lē masu’esu’eina a Keriso. E leai se mea e sili ona fa’anaunau tele i ai le Fa’aola nai lo le avea ma mea faigaluega o le a fa’ailoaina atu i le lalolagi Lona Agaga ma Lana amio. E leai se mea e sili atu ona mana’omia e le lalolagi nai lo le fa’aaliga o le alofa o le Fa’aola e ala atu i le aiga tagata. O le lagi uma lava o loo fa’atali mo tane ma tama’ita’i e mafai ona ala atu ai le fa’aaliaina e le Atua o le mana o le fa’akerisiano.
“O le ekalesia o le mea faigaluega lea a le Atua mo le tala’iina o le upu moni, fa’amalosia e Ia ina ia faia se galuega fa’apitoa; ma afai e fa’amaoni le ekalesia ia te Ia, ma usita’i i Ana poloa’iga uma, o le a nofo i totonu ia te ia le silisiliese atoatoa o le alofa tunoa. Afai o le a ia fa’amaoni i lona usita’i fa’amaoni, afai o le a ia vi’ia le Alii le Atua o Isaraelu, e leai se malosi e mafai ona tete’e mai ia te ia.
O le vilivilita’i mo le Atua ma Lona finagalo na osofia ai le au so’o ina ia latou molimau i le tala lelei ma le mana mata’utia lava. E lē tatau ea ona musaesae se afi i o tatou loto i se finafinauga ina ia ta’u atu le tala o le alofa e toe fa’atauina mai ai, le tala e fa’atatau ia Keriso ma Ia na fa’asatauroina? O le avanoa sili ona taua o kerisiano ta’itasi uma lava, e lē gata ina ia va’ava’ai atu, ae ‘ia ia fa’avaveina fo’i le afio mai o le Fa’aola.” – The Acts of the Apostles, p. 600.
b. E fa’apefea ona fa’amatala e le Atua Lana sini mo i tatou? Pese a Solomona 6:10; Salamo 60:4.
“O le upu moni ma le mea sese, ua la lata atu lava i le la finauga mulimuli. Ia tatou savavali i lalo o le fu’a-pisia i le toto a Perenise Emanuelu, . . . auā o le upu moni o le a manumalo.” – Christian Service, p. 77.
“Afai o le a ofuina e le ekalesia le ofu talaloa o le amiotonu a Keriso, ma vavae ese mai i le usita’i uma i le lalolagi, o loo i ai i ona luma le malama o se aso pupula ma le matagofie. O le folafolaga a le Atua ia te ia o le a tumau mausali e fa’avavau. O le a Ia faia o ia o se fa’asilisiliga e fa’avavau, o se olioliga o augatupulaga e tele. O le upu moni, o lona lē amanaiaina o i latou e inoino ia te ia ma te’ena o ia, o le a manumalo. E ui lava ina foliga mai i nisi o taimi ua fa’avaivaia, peita’i o lona aga’i i luma e lē’i taofia lava. A fetaia’i loa le feau a le Atua ma itu tete’e mai, Na te tu’uina atu i ai le malosi fa’aopoopoina, ina ia mafai ai ona ia tu’uina atu le a’afiaga sili atu ona tele. O le fa’amalosia o le feau i le malosi mai i le Atua, o lea o le a ia tipiina atu ai lona ala i totonu o pa puipui sili ona malolosi ma manumalo ai i faigata uma lava.” – The Acts of the Apostles, p. 601.
Aso Lua
Setema 24
3. MALOSI MA LE FA’AMOEMOE
a. O le a se mea na te aumaia le malosi i tagata talitonu ta’itasi uma o loo fa’anaunau e fa’ataunu’uina le tiute o le lavea’iina o agaga? Isaia 53:11; 2 Korinito 5:14, 15; 12:9.
“O loo i ai galuega faigata ma fete’ena’iga, o le fa’afitia e le tagata o ia lava ma tofotofoga lilo o le loto mo i tatou uma ia fetaia’i ma tauaveina. O le a i ai le fa’anoanoa ma loimata mo a tatou agasala; o le a i ai tauiviga ma le matāala i taimi uma, e tu’ufa’atasia ma le salamo ma le mā ona o ō tatou vaivaiga. . . .
“Ia fa’atauanauina i tatou e le alofa o Keriso ina ia tatou matuā mutimutivale ma agalelei, ina ia mafai ona tatou fetagisi ona o tagata sese ma i latou ua solomuli i tua mai i le Atua. O le tagata e lē mafaitaulia lona tau. O lona tāua e na o le tau lava na totogiina e toe fa’atauina mai ai le tagata, e mafai ona fuaina ai. O Kalevario! Kalevario! Kalevario! o le a fa’amatalaina le tau moni o le tagata. . . .
“A aunoa ma le mana o le alofa tunoa i le loto, ma fesoasoani ai i a tatou taumafaiga ma fa’apaiaina ai a tatou galuega, o le a lē mafai ona tatou lavea’iina o tatou lava agaga ma agaga o isi. O so’otaga o vaega eseese ma fa’atulagaga e matuā aoga lava, ae aua ne’i manatu se tasi e fa’apea, o nei mea o le a latou faia le galuega e aunoa ma le alofa tunoa ma le mana o le Atua o loo galue i le mafaufau ma le loto. O le loto ma le tino a’ano o le a to’ilalo i le fa’asologa o sauniga, ma le fa’ataunu’uina o a tatou fuafuaga, e aunoa ma le mana o le Atua e osofiaina ma foa’iina mai le loto tele e fa’atino ai.” – Testimonies for the Church, vol. 3, pp. 187, 188.
b. Aisea e matuā fa’amalosia ai le loto i le fa’amoemoe i le olaga e fa’avavau? 2 Peteru 3:13; Salamo 149:4.
“O ē agamalu ‘o le a fai mo i latou le laueleele.’ O le fa’anaunauga mo le si’itiaina e le tagata o ia lava, lea na mafua ai ona ulufale mai le agasala i le lalolagi, ma lē maua ai e o tatou ulua’i matua le pule i lenei lalolagi matagofie, lo latou mālō. O le fa’afitia e le tagata o ia lava, lea na toe fa’atauina mai ai e Keriso le tagata na leiloa. Ma ua Ia fetalai mai e tatau ona tatou manumalo e fa’apei ona Ia manumalo. Fa’aaliga 3:21. E ala i le fa’amaulalo ma le gaua’iina atu e le tagata o ia lava, e mafai ai ona avea i tatou ma suli fa’atasi ma ia, pe a ‘fai mo ē agamalu le laueleele.’ Salamo 37:11.
“O le laueleele ua folafolaina mai i ē agamalu, o le a lē fa’apei o lenei laueleele, fa’apogisaina i le pogisa lafoia mai o le oti ma le mala. ‘O i tatou, e tusa ma Lana folafolaga, e va’ava’ai atu mo lagi fou ma se laueleele fou, e nofo ai lē amiotonu.’ . . .
“E leai se fa’ato’ilaloina, leai se fa’anoanoa, leai se agasala, leai se isi o le a fai mai fa’apea, Ua ou ma’i; e lē o i ai ni solo o tagata mo falelauasiga, leai se auē, leai se oti, e lē toe fa’amavae ai, leai ni loto momomo; peita’i o Iesu o loo i ai iina, o loo i ai fo’i le filemu.” – Thoughts From the Mount of Blessing, p. 17.
Aso Lulu
Setema 25
4. O SE VALA’AU TĀUA TELE
a. O le a se mea o loo fa’amamafa mai e Peteru i lana tusi – ma aisea? 2 Peteru 3:14.
“Tatou te lē iloa i le aso e tasi le malosi o le a i ai la tatou tauiviga i le aso e soso’o ai. O loo ola Satani, ma o loo ia galue, ma o aso ta’itasi tatou te mana’omia ai tatou te alalaga a’e i le Atua ma le finafinau tele mo le fesoasoani ma le malosi e tete’e ai ia Satani. O le umi lava e pule ai Satani, o le a tatou mana’omia fo’i ina ia tatou fa’ato’ilaloina i tatou lava, o osofa’iga e tatau ona tatou manumalo mai ai, ma e leai se nofoaga e malolo ai, e leai se taunu’uga e mafai ona tatou o’o i ai ma tatou fa’apea ifo, ua tatou maua atoatoa.
“Filipi 3:12: ‘E lē peisea’i ua ou maua nei, po ua ou atoatoa ona lelei nei: ae ou te tausisi atu pea, pe mafai ona ou maua o le mea na maua ai a’u e Keriso Iesu.’
“O le olaga kerisiano o se savaliga lea aga’i i luma i taimi uma lava. O Iesu o loo Ia afio o Ia o Lē o loo fufuluina ma fa’amamāina Ona tagata; ma a atoatoa loa ona lafoia atu lona fa’atusa i totonu ia i latou, ua atoatoa fo’i i latou ma paia, ma ua saunia mo le aveina a’e i le lagi. O se galuega tele lava o loo mana’omia mai i kerisiano. Ua apoapoa’iina i tatou ina ia fufuluina i tatou mai i mea leaga uma o le tino ma le agaga, ma fa’aatoatoaina ai ma fa’apaiaina i le mata’u i le Atua.” – Testimonies for the Church, vol. 1, p. 340.
b. Aisea e matuā tāua tele ai le onosa’i i lo tatou fa’apaiaina? 2 Peteru 3:15, 16; Luka 21:19.
“O loo i ai i totonu o le Tusi Paia ni mea e faigata ona malamalama i ai, ma, e tusa ai ma le gagana a Peteru, o ē e lē’i a’oa’oina ma lē mausalī, ua latou fa’auigaseseina e o’o ai lo latou lava malaia. Atonu tatou te lē mafai, i lenei olaga, ona fa’amatalaina le uiga o fuaiupu ta’itasi o le Tusi Paia; peita’i e lē o i ai ni vaega sili ona tāua o le upu moni fa’atinoina o le a fa’anenefuina i mea lilo. Pe a o’o mai le taimi, i le ta’ita’iga a le Atua, o le a tofotofoina ai le lalolagi i le upu moni mo lena taimi, o le a osofia mafaufau e Lona Agaga ina ia su’esu’e le Tusi Paia, ma le anapogi ma le tatalo, se’ia o’o ina maua lea so’otaga ma lea so’otaga, ma tu’ufa’atasia ai i se filifili atoatoa ona lelei. O mea moni uma e mo le fa’aolataga o tagata o le a fa’amaninoina, o lea, o le a leai se isi e mana’omia e sese pe savali i le pogisa.
“A’o tatou mulimuli i lalo i le filifili o le valoaga, o le upu moni ua fa’aalia mo lo tatou taimi ua va’aia manino lava ma fa’amatalaina. E fa’amasinoina i tatou i avanoa sili ona taua o loo tatou olioli ai ma le malamalama fo’i o loo susulu mai i luga o lo tatou ala.” – Ibid., vol. 2, p. 692.
“ ‘O le finagalo lenei o le Atua’ e fa’atatau ia te outou, ‘o lo outou fa’apaiaina.’
1 Tesalonia 4:3. Po’o lou loto ea fo’i lea?” – The Acts of the Apostles, p. 566.
Aso Tofi
Setema 26
5. MAUSALI I LE FA’AMOEMOE
a. O fa’apefea ona apoapoa’i mai Peteru ia i tatou i le finafinau mataala? 2 Peteru 3:17.
“O fa’atonuga ua tu’uina mai i totonu o le upu a le Atua, e lē o tu’ua ai se avanoa mo le maliēga ina ia fa’atagaina ai le agasala. O le Alo o le Atua na fa’aalia ina ia Ia tosina uma atu tagata ia te Ia lava. Na te lē’i afio mai ina ia fa’amoeina le lalolagi, ae ia fa’asino mai le ala vāiti e tatau ona faimalaga ai tagata uma o ē o le a taunu’u mulimuli atu lava i faitoto’a o le Aai a le Atua. O Lana fanau e tatau ona mulimuli i le taula’iga ua Ia ta’ita’iina atu i ai le ala; i so’o se taulaga fasia lava e fa’aumatia ai le fa’afifilemu poo le fa’amalieina o tu’inanau fa’apito, i so’o se tau lava o galuega poo puapuaga, e tatau lava ona latou fa’atumauina se tauiviga i taimi uma lava ma le tagata lava ia.” – The Acts of the Apostles, p. 565.
b. I le fa’ai’uga o le tusi, o le a le olega mulimuli a le aposetolo? 2 Peteru 3:18.
“O au agasala atonu e fa’apei o mauga i ou luma; peita’i afai e fa’amaulalo lou loto ma fa’aali au agasala, ma talitonu fa’atuatua i le amiotonu a le Fa’aola na fa’asatauroina ma ua toe soifua mai, o le a Ia fa’amagaloina ma fa’amamāina oe mai i amiolētonu uma lava. E mana’omia e le Atua mai ia te oe lou gaua’i atoatoa i Lana tulafono. O lenei tulafono o le ata lea o Lona si’ufofoga o loo fetalai atu ia te oe, Ia sili atu ona paia, ioe, ia sili atu pea ona paia. Ia ē fa’anaunau i le atoaga o le alofa tunoa o Keriso. Ia fa’atumulia lou loto i se fa’anaunauga malosi lava mo Lana amiotonu, o le galuega a Lana amiotonu, ua fa’ailoa mai e Lana afioga, o le filemu lea, ma o lona a’afiaga o le to’a filemu lea ma le mautinoaga e fa’avavau.
“A’o fa’ananau atu lou loto mo le Atua, o le a ē maua le sili atu ma sili atu pea o le tele o oa lē masu’esu’eina o Lona alofa tunoa. A’o ē manatunatu i nei oa, o le a ē maua i latou ma o le a ē fa’aalia le amiotonu o le maliu o le Fa’aola, o le puipuiga a Lana amiotonu, o le atoaga o Lona poto, ma Lona mana e tu’uina atu ai oe i luma o le Tamā ‘e aunoa ma se ila, ma lē mata’uleagaina.’” – Ibid., pp. 566, 567.
Aso Faraile
Setema 27
FESILI TOE FA’AMANATU
1. O le a se mea na te aumaia se fa’amaoniga e iloa ai, o lo tatou vilivilita’i ua toe fanaufouina?
2. O a la’asaga fa’atinoina e mafai ona ou faia ina ia fa’avaveina ai le toe afio mai o le Ali’i?
3. E ui lava i sauāga uma ma le fa’amata’u mai, o ai o le a fai mo i latou lenei paneta?
4. Aisea ou te mana’omia ai ina ia ou matuā manatu loloto lava e fa’atatau i le fa’asologa o le fa’apaiaina?
5. A’o o’u va’aia le loloto o lo’u agasala tele, o le a se mea e tatau ona ou faia?