Ulua’i Aso
Setema 8
1. O LE A LE MEA O LOO TATOU VA’AIA?
a. O le a se mea e masani ona ta’u mai e tagata a’amu o se ‘alofaga lea mo ō latou masalosaloga – ma e fa’apefea ona a’afia le to’atele o loo fa’atali mo le Ali’i i lenei uiga? 2 Peteru 3:4; Isaia 56:12.
“O le fiafia i le lalolagi ua matuā fa’atumulia ai lava o tatou manatunatuga, o lea ua lē liliuina ai aga’i i luga o tatou olaga, peita’i ua liliuina aga’i i lalo i le lalolagi. O loo tatou fa’ata’alise solo, ma galulue ma le vilivilita’i ma le finafinau i galuega eseese, peita’i ua tatou fa’agaloina le Atua, ma o le oa fa’alelagi ua lē fa’atāuaina. Tatou te lē o i ai i se tulaga fa’atalitali, ma mataāla. O le fiafia i le lalolagi ma le taufa’asese o oa, ua ufitia ai lo tatou fa’atuatua, ma ua tatou lē fa’ananau atu, ma ua tatou lē fiafia, i le fa’aali mai o lo tatou Fa’aola. Ua tatou matuā taumafai lava i se tulaga faigata ina ia tausia i tatou e i tatou lava. Ua tatou popole ma matuā leai lava se fa’atuatuaga mausali i le Atua. O le to’atele o tagata e popole ma galulue, faufau ma fuafua, ma latou matata’u ai ne’i latou puapuagatia i le lē maua o mea e mana’omia. Latou te lē maua se taimi e tatalo ai po o le auai atu ai fo’i i fa’atasiga fa’aletapuaiga ma, i lo latou popole mo i latou lava, latou te lē tu’ua ai se avanoa mo le Atua Na te tausia i latou. Ma e lē tele se mea e faia e le Ali’i mo i latou, auā latou te lē tu’uina atu se avanoa ia te Ia. E tele tele mea latou te faia mo i latou lava, ae matuā itiiti lava lo latou talitonuga ma lo latou fa’atuatuaga i le Atua.
“O le fiafia i le lalolagi ua matuā mata’utia lona a’afiaga i luga o tagata na fa’atonuina e le Ali’i ina ia mataala ma tatalo e lē aunoa, ne’i Ia afio fa’afuase’i mai ma Ia maua mai i latou o momoe.” – Testimonies for the Church, vol. 2, pp. 195, 196.
Aso Gafua
Setema 9
2. MULIMULI ANE . . . PO UA MATUĀ VAVE TELE MAI?
a. Fa’amatala pe fa’apefea ona masani lava ona faia uiga fa’atauemu i le tele lava o taimi, i le lotolotoi o tagata talitonu o loo ta’utino mai o loo latou fa’atali mo le afio mai o Iesu. Mataio 24:48-51; Fa’ataoto 26:20-22; Roma 1:29-32.
“Fai mai le auauna leaga i totonu o lona loto, ‘E fa’atuai mai lo’u Ali’i.’ Na te lē fai mai o le a lē afio mai Keriso. Na te lē a’amu i le manatu e fa’atatau i Lona afio fa’alua mai. Peita’i i totonu o lona loto ma ana gaioiga ma ana upu, na te fa’ailoa mai ai e fa’apea, ua fa’atuai le afio mai o le Ali’i. Na te tafiesea mai i mafaufau o isi tagata le talitonuga ua vave le afio mai o le Ali’i. O lona a’afiaga e ta’ita’ia ai tagata i le fa’atuai fa’afoliga, lē fa’aeteete. Ua fa’amausaliina i latou i totonu o lo latou fa’alelalolagi ma le oti fa’aleagaga. O tu’inanauga fa’alelalolagi, o manatu agasala, ua fa’atumulia ai le mafaufau. O le auauna leaga ua ia ‘ai ma inu fa’atasi ma ē onanā, ma fa’atasi ma le lalolagi i sa’ili’iliga fiafiaga. Ua ia fasi i ona uso a auauna, ma faitioina ma fa’asalaina i latou o loo fa’amaoni i lo latou Matai.” – The Desire of Ages, p. 635.
b. E fa’apefea ona tatau ona tatou tula’i i le fa’atusatusa atu ia i latou e manatu o le toe afio mai o Keriso e matuā mamao ese atu i le lumana’i? Kolose 3:1-4.
“A’o liliu atu mafaufau o tagata fa’alelalolagi i galuega eseese, o ō tatou mafaufau e tatau ona liliu atu i le lagi; o lo tatou fa’atuatua e tatau ona o’o mamao atu ma atili mamao atu lava i mea lilo ofoofogia o oa fa’alelagi, ma aumaia ai ave tāua fa’alelagi o le malamalama mai i le malumalu fa’alelagi ina ia susulu i totonu o ō tatou loto, e fa’apei ona susulu i luga o foliga o Iesu. O tagata a’amu na latou fa’atauemu i le au paia fa’atalitali, mataala, ma tu’ufesili fa’apea: ‘O fea o i ai le folafolaga o Lona afio mai? Ua outou fa’anoanoa. Ia outou galulue nei fa’atasi ma i matou, ma o le a outou manuia i oa fa’alelalolagi. Ia outou aumaia mea e maua mai, ia outou aumaia tupe, ma ia fa’amamaluina outou e le lalolagi.’ O i latou na fa’atalitali na latou va’ava’ai a’e i luga ma latou tali mai fa’apea: ‘O loo matou mataala.’ Ma o lo latou liliu ese mai i fiafiaga fa’alelalolagi ma le ta’uta’ua fa’alelalolagi, ma le taufa’asese o le oa, o lea ua latou fa’ailoa mai ai o i latou o loo tula’i i lea tulaga. O lo latou mataala ua latou malolosi ai; ua latou fa’ato’ilaloina le paiē ma le alofa fa’apito ma le fiafia i le fa’afifilemu. O afi o puapuaga ua tutuina i luga ia i latou, ma o le taimi o le fa’atalitali e foliga mai e umi. O nisi o taimi latou te mafatia ai, ma ua fa’alotolotolua le fa’atuatua; peita’i na latou toe fa’apotopoto, fa’ato’ilalo lo latou mata’u ma o latou masalosaloga, ma a’o taula’i atu o latou mata aga’i i le lagi, ua latou fai atu i o latou fili: ‘O loo o’u mataala, o loo o’u fa’atali i le toe afio mai o lo’u Ali’i. O le a ou olioli i puapuaga, i tiga, i le mativa” – Testimonies for the Church, vol. 2, pp. 194, 195.
Aso Lua
Setema 10
3. FA’ASALAGA E FA’AAOGAINA AI MALOSI FA’ALENATURA
a. O le a se mea tāua lava na tupu i le tala’aga o le lalolagi o loo masani lava ona lē amanaia ma le lē fa’autauta? Kenese 6:5-8; 7:23; 2 Peteru 3:5, 6.
“A’o le’i fa’aumatiaina le lalolagi tuai e le lolo, sa i ai tane talenia, o tane sa i ai le atamai ma le iloa. Peita’i na i’u ina fa’aleagaina i latou i ō latou manatunatuga, auā na latou tu’uesea le Atua mai i a latou fuafuaga ma a latou filifiliga. Na latou popoto i le faia o le mea e lē’i fa’atonuina lava i latou e le Atua e faia, popoto i le faia o le agasala. Na silafia e le Atua o lenei fa’ata’ita’iga o le a leaga mo i latou o le a fananau mulimuli mai, ma na Ia faia ai loa le fa’ai’uga. E selau lua sefulu tausaga na Ia auina mai ai ia i latou lapata’iga e ala atu i lana auauna o Noa. Peita’i na latou fa’aaogaina le taimi na tu’uina atu ma le alofa ia i latou, i lo latou fai fai upu ai ia Noa. Na latou fa’atauemu ma faitio ia te ia. Na latou taliē ia te ia i lona finafinau uiga ese ma ona lagona malosi tele e fa’atatau i fa’asalaga ia sa ia fa’ailoa mai o le a fa’ataunu’uina mautinoa lava e le Atua. Na latou tautala e fa’atatau i saienisi ma tulafono na puleaina ai le natura. Ona latou taliē fa’atauemu ai lava lea i upu a Noa, ma fa’aigoaina ai o ia o se tagata valea so’ona finafinau tele. Na i’u ina muta le onosa’i o le Atua.” – The SDA Bible Commentary [E. G. White Comments], vol. 1, p. 1090.
b. O le a se mea o loo fa’atali mulimuli mai lava i lenei paneta? 2 Peteru 3:7; Salamo 11:6; 59:13.
“O le manava o le eleele o mea tau ia a le Ali’i, lea sa Ia aumaia ai a’upega na Ia fa’aaogaina i le fa’aumatiaga o le lalolagi tuai. O vai i totonu o le manava o le eleele na puna a’e, ma fa’atasi ma vai mai i le lagi, ina ia fa’ataunu’uina ai le galuega o le fa’aumatiaga. Talu mai lava le lolo, o loo fa’aaoga ai lava e le Atua le vai ma le afi i le lalolagi e avea ma Ana mea faigaluega e fa’aumatia ai aai amio leaga.” – Spiritual Gifts, vol. 3, p. 82.
“O le galuega atoa uma lava a le tamā o pepelo o loo fa’amauina i totonu o tusi tulafono a le lagi, ma o i latou e tu’uina atu i latou i le auaunaga ia Satani, ina ia tu’uina atu ma fa’ailoa atu i tagata pepelo a Satani e ala i poloa’iga ma fa’atinoga, o le a latou maua lo latou taui e tusa ai ma a latou galuega. O le a’a ma lālā o le a fa’aumatiaina e afi o aso mulimuli. O Satani, le ta’ita’i sili o le lē fa’amaoni, o ia o le a’a, ma o ana mea faigaluega uma, o ē o loo a’oa’oina ana pepelo e fa’atatau i le tulafono a le Atua, o lālā ia.” – The SDA Bible Commentary [E. G. White Comments], vol. 4, p. 1184.
Aso Lulu
Setema 11
4. O LE ATUA MAMANA E FA’AVAVAU
a. O le foa’iina mai i le fanau a le Atua o le talitonuga i Ana folafolaga ma le fa’amoemoe mo le olaga e fa’avavau, e fa’apefea ona fa’amatala fa’apu’upu’uina le mana lē mafuatia o lo tatou Atua-foafoa? Salamo 90:4; 2 Peteru 3:8.
“O le tofi na folafolaina e le Atua i Ona tagata, e lē oi i ai i le lalolagi lenei. O Apera’amo e lē’i i ai sana mea totino i le lalolagi, ‘e leai, e leai lava se mea e tusa ma se tulaga vae.’ Galuega 7:5. Sa ia te ia mea e tele lava, ma na ia fa’aaogaina mo le vi’iga o le Atua ma le lelei o ona uso a tagata; peita’i na te lē’i manatu i lenei lalolagi e fa’apea, o sona aiga lea. Na vala’au le Atua ia te ia ina ia tu’ua lona aiga ifo i tupua, fa’atasi ai ma le folafolaga o le laueleele o Kanana e fai mo ia e fa’avavau; peita’i e lē’i maua e Apera’amo, po’o lona atali’i po’o le atali’i o lona atali’i, lenei folafolaga. Ina ua mana’omia e Apera’amo se eleele mo tagata maliliu o lona aiga, sa tatau ona ia fa’atauina, ma sa ia fa’atauina mai ai le fasi fanua mai i tagata o Kanana. O le mea e tasi lava sa patino ia te ia i le Laueleele o le Folafolaga, e na o lena loa-na-eliina i le papa (tu’ugamau) i totonu o le ana o Makapela.
“Peita’i o le upu a le Atua e lē’i to’ilalo; e lē’i fetaia’i fo’i ma lona fa’ataunu’uga mulimuli ina ua nofoia Kanana e tagata Iutaia. ‘O Apera’amo ma lana fanau na fetalaia i ai le folafolaga.’ Kalatia 3:16. O Apera’amo lava ia na mana’omia ina ‘ia ia fa’asoaina le folafolaga. O le fa’ataunu’uga o le folafolaga a le Atua atonu e foliga mai ua leva ona fa’atuai lona fa’ataunu’uina – auā ‘o le aso e tasi e tusa lea ma le afe tausaga i le Alii, o le afe tausaga fo’i e tusa ma le aso e tasi’ (2 Peteru 3:8); atonu e foliga mai ua fa’atuai; peita’i i le taimi filifilia ‘o le a o’o mautinoa mai lava, o le a lē fa’atuai.’ Sapakuka 2:3.” – Patriarchs and Prophets, pp. 169, 170.
b. O le a se mea e tatau ona tatou iloa e fa’atatau i le toe afio mai o Keriso? 2 Peteru 3:9; Nauma 1:3.
“O le umi-ona-puapuaga o le Atua e matua ofoofogia lava. Ua leva ona fa’atali le fa’amasinoga tonu a’o aioi le alofa tunoa i le tagata agasala. . . .
“Ua matuā lē fefe le lalolagi i le soliga o le tulafono a le Atua. Talu ai ona o le umi o lona onosa’i, o lea ua soli ai e tagata Lana pule. Ua latou fa’amalosia e le tasi le isi i le fa’apologaina ma le sauāina o Lona tofi, ma fai mai fa’apea, ‘E fa’apefea ona iloa e le Atua? ma o i ai ea se iloa i Lē Silisiliese?’ Salamo 73:11. Peita’i o loo i ai le laina e lē mafai ona latou la’asia. Ua lata mai le taimi o le a latou ausia ai le gata’aga fa’atagaina. E o’o lava i le taimi lenei, toeitiiti lava a latou sopoia tuaoi o le umi ona puapuaga o le Atua, o le gata’aga o Lona alofa tunoa, ma le gata’aga o Lona alofa mutimutivale. O le a tula’i le Ali’i e ta’uamiotonuina Lona lava mamalu ma Lona vi’iga, ina ia lavea’i Ona tagata, ma taofia le fa’atuputeleina o le amiolētonu.” – Christ’s Object Lessons, pp. 177, 178.
Aso Tofi
Setema 12
5. O SE AVANOA MO LE SALAMŌ E SILI ATU ONA LOLOTO
a. Aisea e mafai ai ona tatou matuā fa’afetai lava mo le umi ona mafatia o le Atua? Salamo 86:12-15.
“O loo naunau le Ali’i e fesoasoani mai ia i tatou, ina ia fa’amalosia ma fa’amanuia mai i tatou; peita’i e tatau ona tatou ui atu i totonu o le auala o le fa’amamāina se’ia o’o ina susunueseina eleelea uma mai i a tatou amio. O tagata ta’ito’atasi uma o le ekalesia o le a tu’uina atu i le ogaumu a’asa, e lē ina ia fa’aumatiaina ai, ae ia fa’amamāina ai.” – Testimonies for the Church, vol. 5, p. 485.
“Aua tou te va’ava’ai atu i tane pe tu’u atu fo’i tou fa’amoemoega ia i latou, ma tou manatu ai fa’apea o i latou e lē mafai ona sese; peita’i ia outou va’ava’ai atu ia Iesu i taimi uma lava. Aua lava ne’i tautalagia se upu o le a lafoina mai ai se faitioga i luga o lo tatou fa’atuatuaga. Ia na o lou Atua lava e fa’aali i ai au agasala lilo. Ia ē ioeina atu ia te ia le fealualua’i solo o lou loto, o Ia na te silafia atoatoa le fofōina o lou ma’i. Afai ua ē sese i lou tuaoi, ia ē ioeina ia te ia lou sese ma fa’ailoa atu fua o lau ioega e ala i lou faia o le toe fuata’iga. Ona ē ole atu loa lea mo le fa’amanuiaga. Ia ē sau i le Atua i le tulaga tonu lava lena e te i ai, ma ia ē fa’atagaina o Ia na te fofōina ou vaivaiga uma. Ia fa’ailoa atu ma le fa’amalosi lou mana’oga i le nofoali’i o le alofa tunoa; ia matuā mae’ae’a le galuega. Ia ē fa’amaoni i au aioiga i le Atua ma lou lava loto. Afai e te sau ia te Ia ma se loto ua salamō moni, o le a Ia foa’i atu ia te oe le manumalo. Ona mafai loa lea ona ē tu’uina atu se molimau matagofie o le sa’olotoga, ma fa’ailoa atu vi’iga o Lē na vala’aueseina mai oe nai le pouliuli i Lona lava malamalama ofoofogia. O le a Ia malamalama ia te oe Na te lē fa’amasinoseseina fo’i oe. O ou uso a tagata e lē mafai ona latou fa’amagaloina oe mai i agasala pe fufuluina fo’i oe mai i amio leaga. O Iesu e na o Ia lava e mafai ona foa’iina atu ia te oe le filemu. Na Ia alofa mai ia te oe ma foa’i mai Ia lava mo oe. O Lona finagalo tele o le alofa ua ‘lagonaina lagona o ō tatou vaivaiga’ O a agasala e lapopo’a tele e lē mafai ai ona Ia fa’amagaloina? o le a se loto e pogisa tele ma fa’apologaina e le agasala e lē mafai ai e Ia ona lavea’i? E alofa tele o Ia, na te lē o sa’ili mo le amiotonu i totonu ia i tatou, peita’i o Lona lava agalelei lē mafuatia o loo Ia fa’amalolo ai lo tatou solomuli i tua, ma alofa sa’oloto mai ai ia i tatou, a’o avea pea i tatou ma tagata agasala. O Ia e ‘telegese Lona to’asa, ae e tele Lona agalelei,’ ‘e umi ona Ia puapuagatia i Lona onosa’i ia i tatou, Na te lē finagalo ina ia fano se tasi, a ia o’o tagata uma i le salamo.’” – Ibid., p. 649.
Aso Faraile
Setema 13
FESILI TOE FA’AMANATU
1. O a uiga o le lalolagi atonu o loo liliueseina ai a’u mai i le Atua?
2. E fa’apefea ona ou agasala i lo’u fasiina o o’u uso a auauna, i se tulaga fa’aleagaga?
3. Aisea e tatau ai ona ou fausiaina a’e se uiga mataala finafinau lava e fa’atatau i le fa’asalaga i le afi o lo o aga’i mai?
4. Fa’amatala le tofi o Aperaamo ma lana fanau (Kalatia 3:29).
5. Aisea e tatau ai ona ou fa’afetai mo lenei tama’i taimi fa’aopoopo – ma o le a fa’apefea ona ou fa’aaogaina?