Ulua’i Aso
Iulai 7
1. O SE UIGA TAUA FA’AKERISIANO
a. O le a se la’asaga e soso’o mai pe a tatou fausia ma le vilivilita’i lo tatou fa’atuatua? 2 Peteru 1:5 (vaega muamua).
“A uma ona tatou maua le fa’atuatua o le tala lelei, o la tatou galuega muamua lava o le sa’ili lea ina ia fa’aopoopo tapula’a lelei ma le mamā, ma fa’apena ona fufuluina ai le mafaufau ma le loto mo le taliaina o le iloa moni.” – Testimonies for the Church, vol. 1, p. 552.
“O se tauiviga faifai pea ina ia mataala i taimi uma lava, ina ia tete’e atu i le ti’apolo; ae e aoga le mauaina e le tagata o le manumalo e tasi ia te ia lava ma malosi o le pouliuli ina ua uma ona ia maua o le isi manumalo. . . .
“A aunoa ma le amio mamā, atoatoa, e leai se tasi e mafai ona si’itia a’e i so’o se tulaga maualuga fa’aaloalogia. Peita’i o finafinauga lelei ma le fiafia i le amiotonu, e lē o ni uiga ia na tu’ufa’asolo mai i o tatou tupu’aga. O le amio e lē mafai ona fa’atauina; e tatau ona fausiaina e ala i taumafaiga mausali ina ia tete’e atu i fa’aosoosoga. O le fausiaina o se amio sa’o o se galuega lea o le olaga atoa lava, ma o le amio lea e tupu a’e mai i manatunatuga e tumu i tatalo e tu’ufa’atasia ma se sini matagofie tele lava. O le amio sili ona lelei e ia te oe, e tatau ona maua ona o le i’uga o au lava taumafaiga. O uo e mafai ona latou fa’alototeleina oe, peita’i e lē mafai ona latou faia le galuega mo oe. O lou mana’ona’o, mapuea, moe miti, o le a lē mafai ona fa’asilisiliina pe fa’aleleia ai fo’i oe. E tatau ona ē a’e i luga. Ia fusi a’e sulugatiti o lou mafaufau, ma ē alu i le galuega fa’atasi ai ma tomai malolosi uma lava o lou loto.” – Fundamentals of Christian Education, p. 87.
Aso Gafua
Iulai 8
2. O LE ILOA E MANA’OMIA MO LE FA’AOLATAGA
a. Fa’amatala le ituaiga iloa ua vala’auina i tatou ina ia tatou ausia i la tatou savaliga a’e i luga o le apefa’i a Peteru. 2 Peteru 1:5 (vaega mulimuli); Ioane 17:3.
“Ua fa’ailoa mai e le aposetolo i ē talitonu, le apefa’i o le atoaga fa’akerisiano, o la’asaga ta’itasi uma lava o le apefa’i lenei, o loo fa’atusa mai ai la’asaga faifai pea i le iloa e fa’atatau i le Atua, ma o le a’e i luga o lenei apefa’i, e leai se taimi e tūtū ai i le la’asaga e tasi. . . .
“O le taliaina e le tagata talitonu o le fa’atuatua o le tala lelei, o le galuega e soso’o ai a le tagata talitonu, o le fa’aopoopo lea o le amio lelei i lana amio, ma fa’apena ona fufuluina ai le loto ma saunia ai le mafaufau mo le taliaina o le iloa e fa’atatau i le Atua. O lenei iloa, o le fa’avae lea o a’oa’oga moni uma lava ma auaunaga moni uma lava. E na o le pau lava lea o le talitā saogalemu e tete’e atu ai i fa’aosoosoga; ma e na o le pau lava fo’i lea o le iloa e mafai ona faia ai le tagata ia fa’apei o le Atua, i le amio. E ala i le iloa e fa’atatau i le Atua ma Lona Alo o Iesu Keriso, e foa’iina mai ai i le tagata talitonu ‘mea uma lava e patino i le ola ma le amio fa’aleatua.’ E leai se meaalofa lelei e taofia mai i lē e naunau moni lava i lona fia maua o le amiotonu a le Atua.” – The Review and Herald, September 19, 1912.
“E tatau ona tatou a’oa’o mai ia Keriso. E tatau ona tatou iloa poo ai o Ia ia i latou ua Ia toe fa’atauina mai. E tatau ona tatou iloa, e ala i le talitonu ia te Ia, o lo tatou avanoa sili ona taua lo tatou tofusia i Lona natura fa’alelagi, ma fa’apena ona tatou sola ese ai mai i le amio leaga oi le lalolagi e ala i le tu’inanau. Ona fufuluina loa lea o i tatou mai i agasala uma, o uiga sese uma o le amio. Tatou te lē mana’omia ina ia taofia se uiga agasala e tasi. . . .
“A’o tatou tofusia i le natura fa’aleatua, o uiga leaga na tatou fananau mai ma i tatou, ma amioga leaga na fausia e i tatou lava, ua vavaeeseina mai i le amio, ma ua faia ai i tatou o se mana ola mo le lelei. O lo tatou su’esu’e i taimi uma e fa’atatau i le Faia’oga Atua, o lo tatou tofusia i aso ta’itasi i Lona natura, tatou te galulue fa’atasi ai ma le Atua i le fa’ato’ilaloina o fa’aosoosoga a Satani. E galue le Atua, ae e galue fo’i le tagata, ina ia tasi le tagata ma Keriso e fa’apei ona tasi Keriso ma le Atua.” – The SDA Bible Commentary [E. G. White Comments], vol. 7, p. 943.
b. Ta’u mai se isi ituaiga iloa e aoga mo le tuputupu a’e fa’akerisiano. Salamo 77:6; 2 Korinito 13:5.
“O le auala e maua ai le fesoasoani mai ia Keriso, e tatau ona tatou iloa lo tatou mana’oga. E tatau ona ia i tatou se iloa moni lava e fa’atatau ia i tatou lava. E na o le tagata lava na te iloa o ia o le tagata agasala, lea e mafai e Keriso ona lavea’i. Se’iloga lava ua tatou iloa le leai atoatoa o so tatou fesoasoani ma tatou lafoa’ia ai lo tatou talitonu ifo ia i tatou lava, o le a tatou taofimau atu loa i le mana o le Atua.” – Testimonies for the Church, vol. 8, p. 316.
Aso Lua
Iulai 9
3. PULEA E LE TAGATA O IA LAVA, AE LĒ O LE LĒ MAFAI ONA PULEA
a. O le a le mataupu e manatunatu i ai faia’oga o le tala lelei e musuia e le Agaga Paia? Galuega 24:24, 25; Filipi 4:5.
“Na ou tautala atu i tagata e tusa ma le itula atoa ma le ‘afa itula e fa’atatau i le apefa’i o le fa’apaiaina a Peteru, e valu ona la’asaga. Na ou tautala e fa’atatau i le ola fuafua lelei ma le tāua o le a’oa’oina e matua o le fa’afitia e le tagata o ia lava, i a latou fanau, ma le pulea e le tagata o ia lava, ma puipuia ai le mana’o o le ‘ai ma le tofo mai i le tu’inanauga ma fa’aleagaina ai le malosi fa’alemafaufau, amio ma le fa’aletino.
“O lesona e fa’atatau i le pulea e le tagata o ia lava ma le fa’afitia e le tagata o ia lava, e tatau ona maua e ala i a’oa’oga, i le olaga tamaitiiti ma le olaga talavou. O le mana’o i le ‘ai e tatau ona taofia ma a’oa’oina, ma o le galuega lenei o matafaioi ua tu’uina mai i matua. O talavou i augātupulaga ua tuana’i, ua avea ma fa’ailoga i tagata.
“Ana fa’apea na faia e matua lo latou tiute i le saunia o le laulau i meaai e lagolagoina ai le ola maloloina o le tino, ma lafoa’ia ai meaai e fa’ama’ia ma fa’aosofia ai tu’inanau leaga, ma latou a’oa’oina ai i le taimi lava lea, le puleaina e le tagata o ia lava i a latou fanau, ma a’oa’oina ai a latou amio ina ia fausia a’e malosi o amioga lelei fa’aleagaga, semanu tatou te lē mana’omia ina ia tau taofiofi le leona o le olaga so’ona fai lē fuafua lelei. A uma ona fausiaina masaniga o le tu’inanauga lē fai fa’atatau lelei, ma tupu a’e fa’atasi ma i latou ma fa’amalosia ai i lo latou malosi, e matuā faigata lava la mo i latou e lē’i koleniina fa’alelei i o latou olaga talavou, ina ia talepe a latou masaniga sese ma a’oa’o ai ina ia taofia i latou lava ma o latou tu’inanauga lē fa’alenatura o le ‘ai. E matuā faigata lava ona a’oa’oina tagata fa’apea ma fautuaina i latou ia latou iloa le tāua o le fai fa’atatau lelei fa’akerisiano, pe a latou o’o atu i le avea ma tagata matua. O lesona o le fai fa’atatau lelei, e tatau ona amatalia i le pepe i totonu o lona moega.” – The Review and Herald, May 11, 1876.
b. O le a le la’asaga e so’so’o mai i le apefa’i – ma aisea fo’i? 2 Peteru 1:6 (vaega muamua).
“E lē’i tu’uina mai e le Atua i le tagata se fa’atagaga na te solia ai tulafono o lona tagata ola. Peita’i o le tagata, e ala i lona gaua’i atu i fa’aosoosoga a Satani ina ia tu’inanau sa’oloto i le lē fai fuafua lelei, ua aumaia ai tomai sili atu ona maualuga ia gaua’i atu i tu’inanauga fa’amanu o le ‘ai ma lagona leaga, ma a pule loa nei tu’inanauga fa’amanu, o le tagata lea sa foafoaina e maulalo teisi ifo nai lo agelu, fa’atasi ai ma ona tomai e mafai ona atia’eina i le tulaga sili ona maualuga, ua gaua’i atu loa i le pule’aga a Satani. Ma e faigofie ona maua e Satani i latou o loo nofo pologa i le ‘ai. E ala i le lē fai fa’atatau lelei i le mana’oga o le ‘ai, e fa’asatauroina ai e nisi le ‘afa, a’o isi latou te fa’asatauroina le lua o vae tolu, o ō latou malosi fa’aletino, mafaufau, ma le fa’aleagaga. O i latou e manana’o i mafaufau manino latou te iloa ai faufauga a Satani, e tatau ona latou taofia o latou mana’oga fa’aletino o le ‘ai i lalo o le pule’aga a manatunatuga poto ma le malosi fai filifiliga o le mafaufau. O le gaioiga sa’o ma le finafinau o malosi e sili atu ona maualuga o le mafaufau, e aoga mo le fa’aatoatoaina o le amio fa’akerisiano.” – The Health Reformer, March 1, 1878.
Aso Lulu
Iulai 10
4. O LE ONOSA’I E LĒ MAFAI ONA MAUA E AUNOA MA LE PULEAINA MA LE FA’AFITIA E LE TAGATA O IA LAVA
a. E fa’apefea ona ta’ita’ia atu e le fai fa’atatau lelei, i le isi uiga tāua o loo soso’o mai o le apefa’i? 2 Peteru 1:6 (vaega ogatotonu); Luka 21:19.
“So’o se masaniga lava poo se fa’atinoga fo’i o le a fa’avaivaia ai neura ma malosi o le mafaufau poo le malosi fa’aletino fo’i, e fa’alēaogaina ai fo’i mo le fa’atinoina o le alofa tunoa lea e soso’o mai i le fai fa’atatau lelei – o le onosa’i lea. . . .
“O se tagata e lē pulea e ia, ia lava, ma lē fa’afitia e ia, ia lava, na te fa’aaogaina mea e osofia ai tu’inanauga – o le pia, uaina, vai inu malosi, ti ma le kofe, fuala’au oona malolosi e lē lagona ai le tiga, tapa’a, poo se tasi lava o nei mea e matuā fa’amanu’alia ai le ola maloloina – e lē mafai ona avea o ia ma tagata onosa’i. O le pulea la ma le fa’afitia e i tatou o i tatou lava, o se la’asaga lea o le apefa’i e tatau ona matuā mausalī ai o tatou vae, a’o le’i mafai ona tatou fa’aopoopoina le alofa tunoa lea, o le onosa’i. I meaai, ofu, galuega, i itula fa’atulafonoina, i fa’amalositino maloloina, e tatau ai ona fa’atulafonoina i tatou e le iloa, lea o lo tatou tiute le mauaina, ina ia mafai ai ona tatou tu’uina i tatou, e ala i taumafaiga finafinau lava, i so’otaga sa’o i le ola ma le soifua maloloina.” – Our High Calling, p. 69.
b. E fa’apefea ona fesoasoani le puleaina ma le fa’afitia o le tagata o ia lava, i le fausiaina a’e o le onosa’i – ma aisea e matuā tāua ai nei uiga e lua i aso mulimuli o le tala’aga o le lalolagi? Fa’aaliga 14:12.
“O le fa’aleagaina o le puta i le so’ona fa’amalieina o le tu’inanau i meaai lē lelei, o le amataga taumasuasua lea o le tele o tofotofoga i le ekalesia. O i latou e a’ai ma galulue lē fai fa’atatau lelei i se uiga valea, latou te tautala fo’i ma gaioi i se uiga valea. O se tagata e lē fai fa’atatau lelei, e lē mafai ona avea o ia ma tagata onosa’i. E lē fa’apea e te inu i ‘ava malolosi ina ia ē lē pulea ma lē fa’afitia ai e oe, oe lava. O le agasala o le lē pulea lelei ma le lē fa’afitia e le tagata o ia lava i le ‘ai, ma le ‘ai so’o, ma le telē tele o le meaai e aina, ma le aina o meaai lololo lē maloloina, e fa’aumatiaina ai gaioiga maloloina a totoga o loo lomiina meaai, e a’afia ai le fai’ai, ma fa’aleagaina ai filifiliga lelei, ma taofia ai manatunatuga ma gaioiga poto, to’a lelei, ma le maloloina. Ma o le mafuaaga lenei o fua e tele o tofotofoga i totonu o le ekalesia. O lea la, o le auala e mafai ai e tagata o le Atua ona i ai i se olaga e taliaina e Ia, e mafai ai ona latou vi’ia o Ia i o latou tino ma o latou agaga o Ana meatotino ia, e tatau ona latou fa’afitia ma le naunauta’i ma le vilivilita’i le so’ona fa’amalieina tu’inanau o lo latou mana’o i le ‘ai, ma fa’atino loa le temeperenise poo le fai fuafua lelei i mea uma lava. Ona mafai loa lea ona latou malamalama i le upu moni i lona matagofie ma lona manino, ma fa’atinoina ai i o latou olaga, ma o se olaga fa’autauta, poto, faamaoni, tatou te lē tu’uina atu ai i fili o lo tatou fa’atuatua se avanoa, latou te faitioina ai le galuega o le upu moni.” – Testimonies for the Church,vol. 1, pp. 618, 619.
Aso Tofi
Iulai 11
5. O LE I’UGA MATAGOFIE O LE ONOSA’I
a. O le a le mea e tatau ona fausiaina a’e i totonu ia i tatou e ala i le fa’atinoina o le onosa’i? 2 Peteru 1:6 (vaega mulimuli).
“O le lē onosa’i e aumaia ai fefinaua’iga ma tu’ua’iga ma le fa’anoanoa; peita’i o le onosa’i na te liligiina mai le vaila’au o le filemu ma le alofa i mea uma lava e tutupu o le olaga i le aiga. A tatou fa’atinoina le alofa tunoa o le onosa’i i isi, o le a latou lafoia mai fo’i lo tatou uiga, ma o le a tatou fa’aputu fa’atasi ma Keriso. O le onosa’i, o le a sa’ili mo le loto gatasi i totonu o le ekalesia, i totonu o le aiga, ma tagata lautele. O lenei alofa tunoa e tatau ona su’iina i totonu o ō tatou olaga. O tagata ta’itasi uma lava, e tatau ona latou la’asia lenei sitepu o le aga’i i luga, ma fa’aopoopo ai le alofa tunoa o le onosa’i i le fa’atuatua, amio lelei, ma le pulea fa’afitia e le tagata o ia lava.
“ ‘Ia fa’aopoopo i le onosa’i, le amioatua.’ O le amioatua o le fua lea o le amio kerisiano. Afai tatou te tumau i le Vine, o le a tatou fuaina mai fua o le Agaga. O le ola o le Vine o le a ia fa’aalia ia lava e ala atu i lālā. E tatau ona ia’i tatou se so’otaga vavalalata ma le māfana ma le lagi, pe afai o ia’i tatou le alofa tunoa o le amioatua. O Iesu e tatau ona avea ma mālō fa’aaloalogia i totonu o ō tatou aiga, o se tasi o ō tatou aiga, pe afai tatou te lafoiaina atu lona fa’atusa ma fa’ailoa atu o i tatou o atali’i ma afafine o Lē Silisiliese. O le tapua’iga o se mea matagofie tele lea i totonu o le aiga. Afai o loo fa’atasi Keriso ma i tatou, o le a tatou lagona fo’i o i tatou o tagata o le aiga o Keriso i le lagi. O le a tatou iloa o loo va’ava’ai mai agelu ia i tatou, ma o ō tatou uiga o le a agalelei ma onosa’i. O le a tatou sauni mo le ulufale atu i lotoā o le lagi, e ala i le fausiaina a’e o le fa’aaloalo ma le amioatua. O a tatou talanoaga o le a paia, ma o ō tatou manatu o le a i ai lea i mea fa’alelagi.
“Na savavali Enoka ma le Atua. Na ia fa’amamaluina le Atua i mea uma lava o le olaga. I totonu o lona aiga ma lana galuega, na ia fesili ai fa’apea, ‘O le a taliaina ea lenei mea e Ieova?’ Ma o lona manatuaina o le Atua, ma lona mulimuli i Lana fautuaga, na liua ai lana amio, ma avea ai loa o ia ma tagata amioatua, o ona ala na fiafia mai i ai le Atua.” – The Review and Herald, February 21, 1888.
Aso Faraile
Iulai 12
FESILI TOE FA’AMANATU
1. Aisea ou te mana’omia ai ina ia ou fausia a’e uiga lelei fa’akerisiano e galue ma gaua’i?
2. E fa’apefea ona mafai ona ou sa’ili ina ia ou iloa atili le Atua – ma aisea e aoga tele ai lenei tulaga i le taimi lenei?
3. O a vaega o le olaga ou te mana’omia ina ia fa’atinoina ai le temeperenise fai fuafua lelei sili atu?
4. Aisea e matuā tāua tele ai le onosa’i i totonu o se lalolagi ua matuā fa’atupulaia ai le uiga sauā ma le fa’amisa?
5. O fea ma e fa’apefea fo’i ona fa’aalia le amioatua, e fa’apei ona fa’ailoa mai e Enoka?