Back to top

Sabbath Bible Lessons

LESONA MAI I Tusi a Peteru (II)

 <<    >> 
Lesona 5 Sapati, Aokuso 3, 2024

IA FA’AMAUTINOA

MAU TAULOTO: “O lenei, le au uso e, ia atili ai ona faamalolosi outou ia fa’amauina lo outou valaauina ma lo outou filifilia, auā pe a outou faia ia mea tou te le i’u vale ai lava” (2 Peteru 1:10).

“O i latou ua liua moni lava ua tatanu fa’atasi i latou ma Keriso i le fa’atusa o Lona maliu, ma ua toe fa’atuina a’e ai mai i le tu’ugamau suavai i le fa’atusa o Lona toe soifua mai nai le oti, ina ia savavali i le ola fou. O lo latou usita’i fa’amaoni i le upu moni e tatau ai ona latou fa’amautinoaina lo latou vala’auina ma lo latou filifilia.” – The SDA Bible Commentary [E. G. White Comments], vol. 6, p. 1115.

Faitauga Fautuaina:   Testimonies for the Church, vol. 9, 
  pp. 186-188, 191-194 

Ulua’i Aso Iulai 28

1. O SE VALA’AU MO LE VILIVILITA’I

a. O le a le mea e tatau ona sili lona tāua i o tatou olaga kerisiano? 2 Peteru 1:10. Aisea e mana’omia ai i lenei tulaga se satauro i o tatou olaga? Mataio 10:38.

“Ua filifilia e le Atua se uiga silisili ona lelei o le amio; ma o tagata ta’itasi uma lava o le a ausia le tapula’a o Lona mana’oga e ala i le alofa tunoa o Keriso, o le a ia matuā maua se ulufale atu i totonu o le malō o le mamalu. O i latou uma lava o le a ausia lenei tapula’a o le amio, o le a tatau ona ia fa’aaogaina mea ua foa’i mai e le Atua mo lenei sini. Afai e te mana’o e fai mo oe le malologa o loo totoe mo le fanau a le Atua, e tatau ona avea oe o se tagata e galulue fa’atasi ma Ia. Ua filifilia oe ina ia ē amoina le amo a Keriso – ina ia ē tauaveina Lana avega, ina ia ē si’itiaina Lona satauro. E tatau ona ē vilivilita’i ‘ina ia fa’amautinoaina lou vala’auina ma lou filifilia.’ Su’esu’e le Tusi Paia, ma o le a ē iloa ai, e leai se atalii poo se afafine o Atamu ua filifilia ina ia lavea’iina i totonu o le lē usitai i le tulafono a le Atua. Ua fa’alēaoga e le lalolagi le tulafono a le Atua; peita’i o kerisiano ua filifilia i le fa’apaiaina e ala i le usita’i i le upu moni. Ua filifilia i latou ina ia latou tauaveina le satauro, pe afai latou te manana’o latou te paleina le pale.” – Fundamentals of Christian Education, p. 126.

“O lē e inoino i le satauro na te inoino fo’i i le taui ua folafolaina mai i ē e fa’atuatua fa’amaoni.” – Sons and Daughters of God, p. 248.


Aso Gafua Iulai 29

2. TAUIVI MA LE ATUA

a. A’o tatou sa’ili ina ia fa’ato’ilalo vaivaiga o a tatou amio – ma fa’apena ona fa’amautinoa ai lo tatou vala’auina ma lo tatou filifilia – o le a se fa’ata’ita’iga ua foa’iina mai ia i tatou i totonu ia Iesu i le avea o Ia ma Atali’i o le tagata a’o i ai o Ia i luga o le fogaeleele? Eperu 5:7, 8.

“A’o to’a lelei le aai i le filemu, ma na toe fo’i atu le au so’o i o latou aiga mo le malologa, ae e lē’i moe ai Iesu. O ana aioiga fa’alelagi na alu a’e i le taimi lea i Lona Tamā mai i le Mauga o Olive ina ia tausia ona so’o mai i a’afiaga leaga o le a latou fetaia’i i aso ta’itasi i le lalolagi, ma ia fa’amalosia ma saunia Lona lava agaga mo tiute ma tofotofoga o le aso o le a soso’o mai. O le po atoa lava, a’o momoe ona so’o, sa tatalo ai lo latou Faia’oga fa’alelagi. O le sau ma le aisa o le po na pa’ū mai i luga o Lona ao Ia a’o punou i le tatalo. O Lana fa’ata’ita’iga ua tu’ua mai mo Ona so’o.

“O le Tupu o le lagi, a’o Ia galue i Lana auaunaga, sa masani lava ona tatalo finafinau. E lē’i masani ona ia asiasi atu i le mauga o Olive, auā na iloa e Ona so’o o Lona nofoaga lea na sili ona Ia fiafia e afio ese atu i ai, ma sa masani lava ona latou mulimuli atu ai ia te Ia. Na Ia filifilia le ta’aligoligoa o le po, o le a leai ai nisi e fa’alavelave mai. Na mafai e Iesu ona fa’amalōlō i ē mama’i ma toe fa’atutū mai tagata nai le oti. O Ia lava sa avea ma puna o fa’amanuiaga ma le malosi. Na Ia fa’atonu atu i matagi, ma na latou usita’i mai ia te Ia. E lē’i fa’aleagaina o Ia i le amio leaga, o Ia na te lē’i iloa le agasala; peita’i na Ia tatalo, ma na masani lava ona Ia tatalo ma le tagi tele ma loimata. Na Ia tatalo mo Ona so’o ma Ia lava fo’i, ma fa’apena ona Ia silafia ai Ia lava i o tatou mana’oga, o ō tatou vaivaiga, ma o tatou sese, lea e ta’atele lava i le aiga tagata. O Ia o Sē na matuā malosi i le aioi, e lē’i i ai ia te Ia tu’inanauga o lo tatou natura pa’ū fa’aletagata, peita’i na si’omia o Ia i vaivaiga fa’apea, na fa’aosoosoina o Ia i vaega uma lava e fa’apei ona fa’aosoosoina ai i tatou. Na onosa’ia e Iesu le tigā lea sa mana’omia ai le fesoasoani ma le lagolago mai i Lona Tamā.

“O Keriso o Ia o lo tatou Fa’aa’oa’o.” – Testimonies for the Church, vol. 2, pp. 508, 509.

b. Fa’amatala le i’uga o lenei ituaiga olaga tatalo mamana. Galuega 4:13.

“O le olaga o Iesu o se olaga lea o le talitonu fa’alagolago i taimi uma lava, na fa’atumauina e talanoaga i taimi uma lava; ma o Lana auaunaga mo le lagi ma le lalolagi e lē’i i ai se mea na to’ilalo pe sese ai.

“I le avea o ia ma tagata na Ia aioi fa’atauanau ai i le nofoali’i o le Atua, se’ia o’o ina fa’atumulia lona tino tagata i se mana fa’alelagi lea na feso’ota’ia ai le aiga tagata ma le Atua. O Lona mauaina o le ola mai i le Atua, na Ia foa’iina mai ai le ola i tagata.” – Education, pp. 80, 81.


Aso Lua Iulai 30

3. VILIVILITA’I I LE FA’ATUATUA

a. O le a le mea e tupu i so’o se taimi lava tatou te lē fa’atumauina ai le finafinau i taimi uma i le fa’amautinoaina o lo tatou vala’auina ma lo tatou filifilia? Esekielu 33:13. Aumai se fa’ata’ita’iga.

“Ua fa’ailoa mai e le Atua Lona to’asa ia Tavita ona o le tele o ana avā, e ala i Lona auina atu ia te ia o fa’asalaga, ma Ia fa’atagaina ai mea leaga e tula’i a’e mai i lona lava aiga e tete’e ai ia te ia. O le malaia mata’utia na fa’ataga e le Atua e o’o mai i luga o Tavita, o lē, na fa’aigoaina muamua o se tagata e tutusa lona loto ma le loto o le Atua ona o lona fa’amaoni, o le fa’amaoniga lea i augatupulaga e mulimuli mai e iloa ai, o le a lē ta’uamiotonuina lava e le Atua so’o se tasi lava i le solia o Ana poloaiga; ae o le a mautinoa lava Lona fa’asalaina o le tagata agasala, tusa lava poo le a lona amiotonu ma le alofagia o ia e le Atua i le taimi ua mavae a’o latou mulimuli atu ia te Ia i le loto mamā. A liliu ese loa le tagata amiotonu mai i lana amiotonu ma ia faia le amioleaga, o la latou amiotonu i le taimi ua mavae, o le a lē lavea’iina ai i latou mai i le to’asa o le Atua amiotonu ma le paia.” – The Spirit of Prophecy, vol. 1, p. 379.

“E i ai le upu moni e tatau ona taliaina pe a lavea’iina tagata. O le tausiaina o poloa’iga a le Atua, o le ola e fa’avavau lea i lē na te taliaina. Peita’i o loo fa’amanino mai e le Tusi Paia e fa’apea, o i latou sa latou iloa muamua le ala o le ola ma latou olioli ai i le upu moni, o loo lamatia i latou i lo latou pa’u’ū i lo latou fulitua i le Atua, ma leiloa ai i latou. O lea la, o loo i ai le mana’oga o se liuaga ma’oti i le Atua i aso ta’itasi.

“O i latou uma lava o loo sa’ili ina ia fa’atumauina le mataupu o le filifiliga (election), a i ai loa i totonu o le alofa tunoa, ua i ai lava fo’i i taimi uma i totonu o le alofa tunoa, o loo latou faia lenei a’oa’oga sese e tete’e atu ai i le upu manino, ‘Ua fa’apea ona fetalai mai Ieova.’” – The SDA Bible Commentary [E. G. White Comments], vol. 6, pp. 1114, 1115.

b. I se eseesega la, fa’amatala lo tatou uiga e tatau ona i ai – ma aisea e tatau ai ona tatou manatua upu moni sili ona tāua. Esekielu 18:21; 1 Korinito 15:1, 2 (vaega muamua).

“E to’atele tagata latou te manatu o se ‘alofaga e lava lelei mo mea sese sili ona leaga latou te faia, lo latou fai mai ua galo ia i latou. Peita’i, e lē o i ai ea ia i latou, e fa’apei o isi fo’i, tomai fa’alemafaufau? Afai e leai, e tatau la ona latou koleniina o latou mafaufau ina ia latou manatua. O se agasala le galo, o se agasala le fa’atalalē. Afai e te fausiaina se masaniga o le fa’atalalē, e mafai fo’i ona ē fa’atalalē i le fa’aolataga o lou lava agaga ma i’u mulimuli ai loa ina ē iloa, e te lē o sauni mo le malō o le Atua.” – Christ’s Object Lesson, pp. 358, 359.

“Teu lau Tusi Paia ia te oe lava. A ē maua le avanoa, faitau lau Tusi Paia; ia fa’amau upu i totonu o lou mafaufau. E o’o lava i lou savali i le auala, e mafai ona ē faitauina se vaega ma manatunatu i ai, ma fa’apena ona tusia ai i totonu o le mafaufau.” – Steps to Christ, p. 90.


Aso Lulu Iulai 31

4. FILIFILIA E A TATOU FILIFILIGA

a. Afai tatou te usita’i i aiaiga ia e fa’amautinoaina ai i luga lo tatou vala’auina ma lo tatou filifilia, o le a le i’uga? 2 Peteru 1:10 (vaega mulimuli), 11.

“O le tapula’a sili ona maualuga a le Atua mo Lana fanau, e sili atu lona maualuga nai lo le maualuga e mafai ona o’o i ai manatu o le tagata. ‘O lea ia atoatoa ai ona lelei o la outou amio, e pei o lo outou Tamā oi le lagi e atoatoa ona lelei o Ia.’ O lenei fa’atonuga o se folafolaga lea. O le fuafuaga o le fa’aolataga e aofia ai le lavea’iina atoa lava o i tatou mai i le malosi o Satani. E vavae ese e Keriso i taimi uma lava le tagata ua salamo loto momomo mai i le agasala. Na Ia afio mai e fa’aumatia galuega a le ti’apolo, ma ua uma ona Ia faia le auala ina ia mafai ai ona foa’iina mai le Agaga Paia i tagata ta’itasi uma lava e salamō, ina ia tausia o ia ia aua ne’i toe agasala.

“O le meafaigaluega a le ti’apolo taufa’aosooso e lē tatau lava ona toe fa’aigoaina o se ‘alofaga mo se gaioiga sese e tasi. E manumalo lava Satani pe a ia fa’alogo i ē o loo ta’utino mai o i latou o so’o o Keriso, o latou faia ‘alofaga mo le pi’opi’o o a latou amio. O ‘alofaga nei e ta’ita’ia atu ai i le agasala. E leai se ‘alofaga o i ai mo le faia o le agasala. O se uiga paia, o se olaga e fa’apei o Keriso, e mafai ona maua e fanau salamo, talitonu, ta’itasi uma lava a le Atua.” – The Desire of Ages, p. 311.

b. O fa’apefea ona fa’ailoaina mai le filifiliga o le alofa tunoa e ala atu i le malosi o la tatou filifiliga lea o loo fa’ailoaina mai i olaga o Iakopo ma Esau? 1 Peteru 1:2 (vaega muamua); Roma 9:10-14; 11:4, 5.

“O Esau ma Iakopo sa a’oa’oina i la’ua i le iloa e fa’atatau i le Atua, ma o i la’ua uma e to’a lua na sa’oloto e savavali i Ana poloa’iga ma la maua ai Lona finagalo fiafia mai; peita’i la te lē’i filifili uma la te faia lenei fa’atonuga. O le au uso tama e to’a lua na savavali i ala eseese, ma o ō la ala na fa’aauau ona valavala mamao ese lava.

“E lē’i i ai se filifiliga sauā a le Atua na mafua ai ona te’ena Esau mai i fa’amanuiaga o le fa’aolataga. O meaalofa o Lona alofa tunoa e ala mai ia Keriso e foa’i fua mai i tagata uma. E leai se filifiliga peita’i e na o le filifiliga a le tagata lava ia, lea e mafai ona fano ai so’o se tasi. Ua tu’uina mai e le Atua i totonu o Lana Upu aiaiga o le a filifilia ai tagata ta’itasi mo le ola e fa’avavau – o le usita’i lea i Ana poloa’iga, e ala i le fa’atuatua ia Keriso. Ua filifilia mai e le Atua se amio e loto gatasi ma Lana tulafono, ma so’o se tasi o le a ausia le tapula’a o Lona mana’oga, o le a fa’atagaina e ulufale atu i totonu o le malō o le manuia. . . . ‘Amuia i latou e faia Ana poloa’iga, ina ia taga ia i latou le la’au o le ola, ma ia latou ulu atu i le aai i ona faitoto’a.’ Fa’aaliga 22:14. E fa’atatau i le fa’aolataga mulimuli o le tagata, e na o le pau lava lea o le filifiliga o loo fa’ailoa mai i totonu o le upu a le Atua.” – Patriarchs and Prophets, pp. 207, 208.


Aso Tofi Aokuso 1

5. PIPI’I ATU I LĒ E MANUMALO

a. O fa’apefea ona fa’amatala mai e le aposetolo o Paulo lana savaliga aga’i i luga? Filipi 3:12-14.

b. Aisea tatou te iloa ai e mafai ona manumalo i totonu ia Keriso? Filipi 1:6; Iuta 24; 1 Korinito 1:30.

“E lavea’iina i tatou e ala i lo tatou fe’a’ei a’e i sitepu ta’itasi uma o le apefa’i, ma va’ava’ai ia Keriso, ma pipi’i atu ia Keriso, ma la’a atu i sitepu ta’itasi i le maualuga o Keriso, ina ia faia o Ia ma poto ma amiotonu ma le fa’apaiaina ma le fa’aolataga mo i tatou. O le fa’atuatua, amio lelei, iloa, fai fuafua lelei e ala i le pulea ma le fa’afitia ele tagata o ia lava, onosa’i, amioatua, agalelei fa’aleuso, ma le alofa, o sitepu ia o le apefa’i. . . .

“E lē o se mea faigofie le mauaina o le oa tau tele o le ola e fa’avavau. E leai se tasi e mafai ona ia faia lenei tulaga ma tafea fa’atasi atu ai ma le galu o le lalolagi. E tatau ona ia alu ese mai nai le lalolagi ma vavae ese mai ma aua ne’i ia pa’i atu i mea leaga. E leai se tasi e mafai ona gaioi e fa’apei o se tagata fa’alelalolagi e aunoa ma le aveina ifo o ia i lalo e le galu o le lalolagi. E leai fo’i se tasi o le a faia so’o se la’asaga aga’i i luga e aunoa ma taumafaiga finafinau lava. O le tagata o le a mana’o e manumalo e tatau ona ia pipi’i mau atu ia Keriso. E lē tatau ona ia toe tepa i tua, ae ia taula’i ona mata i taimi uma i luga, ma maua ai lea alofa tunoa i lea alofa tunoa. O le vilivilita’i ta’ito’atasi o le tau lea o le saogalemu. O Satani o loo ia ta’alo i le ta’aloga o le olaga mo lou agaga. Aua e te liliu atu i lana itu i se inisi e tasi, ne’i ia manumalo mai ia te oe.

“Afai lava tatou te o’o atu i le lagi, o le a tatou o’o atu i ai ona o lo tatou fa’apipi’iina atu o ō tatou agaga ia Keriso, ma fa’alagolago atu ia te Ia, ma matuā vavae ese atoatoa lava mai i le lalolagi, o ona amioga valea ma ana fa’atosinaga e fa’aseseina ai. E tatau lava ona tatou galulue fa’atasi fa’aleagaga ma agelu fa’alelagi.” – Testimonies for the Church, vol. 6, pp. 147, 148.


Aso Faraile Aukuso 2

FESILI TOE FA’AMANATU

1. O le a le aogā o le maliu o Iesu i lo’u olaga?

2. Aisea e tāua tele ai le malosi o lo’u olaga tatalo i lo’u fa’aolataga?

3. O le a le mafua’aga o le pa’ū o se tagata i fetaia’iga ma fa’aosoosoga?

4. Fa’amatala pe aisea na talia ai Iakopo agasala e le Atua, ae na te’ena Esau.

5. Tauloto nisi o folafolaga e teu loto i le mafaufau pe a finafianu ina ia manumalo.

 <<    >>