Ulua’i Aso
Aukuso 18
1. MATAALA I O TATOU UIGA
a. Na fa’apefea ona fa’asala e le Atu+++a le tuafafine o Mose ona o le anovale loto leaga – ma e fa’apefea ona avea lenei tulaga o se lapata’iga mo le taimi fo’i lenei? Numera 12:1, 2, 6-10; Iakopo 4:11; 2 Peteru 2:9 (vaega lona lua), 10.
“Ana fa’apea e lē a’oa’iina atoatoa le loto leaga ma le loto lē fa’amalieina o Miriama, semanu e i’u i le leaga tele lava. O le ‘anovale fuā loto leaga o le tasi lea o uiga e sili ona fa’apei o uiga o Satani e mafai ona i ai i totonu o le loto fa’aletagata, ma o le tasi lenei o uiga e sili ona leaga i ona a’afiaga. Fai mai le tagata poto, ‘O le lotoa o le sauaga lea; o le ita o le fa’alumaina lea; a’o ai sē e mafai ona tula’i atu i luma o le fuā?’ Fa’ataoto 27:4. O le anovale fuā loto leaga lea na ulua’i mafua ai le fete’ena’iga i le lagi, ma o le fa’amalieina tu’inanau o lenei uiga ua faia ai mea leaga lē mafaitaulia i le lotolotoi o tagata. ‘Auā o le mea e i ai le matau’a ma le misa, o loo i ai fo’i le nunumi ma galuega leaga uma.’ Iakopo 3:16.
“E lē tatau ona manatu o se mea māmā le tautala taufa’aleaga e fa’atatau i isi poo le faia fo’i o i tatou o ni fa’amasino i mafua’aga o a latou fuafuaga ma gaioiga. ‘O lē e fai upu leaga i lona uso, ma fa’amasino i lona uso, ua fai upu leaga o ia i le tulafono, ma fa’amasino i le tulafono: peita’i afai ua ē fa’amasino i le tulafono, e lē o oe o se tagata e faia le tulafono, a’o lē e fa’amasino i ai.’ Iakopo 4:11. E tasi lava le fa’amasino. . . . ma so’o se tasi lava na te tauaveina i luga ia te ia le fa’amasinoina ma le fa’asalaina o ona uso a tagata, ua ia avefa’amalosia i luga ia te ia le tiute ma le aiā e patino i le Atua-foafoa.
“O loo a’oa’o fa’apitoa mai lava e le Tusi Paia ia i tatou ina ia tatou fa’aeteete i lo tatou aumaia o tu’ua’iga i se manatu māmā e fa’atatau ia i latou ua vala’auina e le Atua e galulue e avea ma Ona sui.” – Patriarchs and Prophets, pp. 385, 386.
Aso Gafua
Aukuso 19
2. TALITONUGA FA’AMAUALUGA LĒ FA’AVAEINA
a. E fa’apefea ona lapata’i le Atua i le tagata fa’amaualuga e tautalatala fa’amaualuga i lo latou tu’inanau – aemaise ai lava pe afai latou te taumafai e tolotolo mai i totonu i le lotolotoi o Ona tagata? 2 Peteru 2:11-13.
“A pulea se tagata e le malosi fa’atosina o Satani, ua galo loa le Atua, ma o le tagata lea ua fa’atumulia i fuafuaga leaga, ua vi’ia. O amioga ma fa’atinoga lilo o tu’inanauga maulalo lē mafai ona taofia o le tino, ua fa’atinoina e nei tagata fa’aseseina e avea ma amioga lelei. O le ituaiga lenei o faiga fa’ataulaitu. O le fesili a le aposetolo i le au talitonu i Kalatia e matuā aoga lava ona fesiligia: ‘Kalatia valea e, o ai ea na ia fa’aseseina outou, ina ia - lē usiusita’i outou i le upu moni, lea ua fa’ailoa manino i luma o ō outou mata o
Iesu Keriso ua fa’asatauroina i le lotolotoi o outou?’ O loo i ai lava se malosi taufa’asese i taimi uma i a’oa’oga sese ma tu’inanauga leaga o le tino. O le mafaufau ua matuā fa’aseseina o lea ua lē mafai ai ona manatunatu i mafaufauga poto, ma o se fa’aseseega o loo ta’ita’ieseina ai pea le mafaufau mai i le olaga mamā. O le va’ai fa’aleagaga ua nenefu, ma o tagata e o’o mai i le taimi lea e lē’i fa’aleagaina a latou amio mamā, ua i’u ina nunumi o latou mafaufau i lalo o le uiga taufa’asese lē fa’amaoni o tagata faigaluega a Satani ia o loo fai mai o i latou o avefeau o le malamalama. O le fa’aseseega lenei lea e tu’uina atu ai i nei avefeau le malosi. Afai latou te o mai fa’aaliali ma le lē fefe ma faia fa’aaliali a latou fa’aseseega, o le a te’ena i latou e aunoa ma le fa’atali mo se sekone e tasi; peita’i latou te galulue muamua ina ia latou maua mai loto o tagata ma fa’amausali le talitonuga o tagata i totonu ia i latou e fa’apea, o i latou o tagata paia o le Atua o loo fa’asatauroina e i latou i latou lava. I le avea o i latou ma Ana avefeau fa’apitoa, ona latou amata ai loa lea o la latou galuega faia ma le poto o le tosoeseina o tagata mai i le ala o le fa’amaoni e ala i lo latou taumafai e fa’alēaoga le tulafono a le Atua.” – Testimonies for the Church, vol. 5, pp. 142, 143.
b. O le a le mea e tatau ona tatou taula’i i ai pe afai tatou te fetaia’i ma fa’afanoga fa’apea? Isaia 51:7, 8; Tito 1:15.
“I lenei tupulaga o le amio leaga o loo savalivali solo ai lo tatou fili le ti’apolo, e pei o se leona tagi, e sa’ili nisi na te fa’aumatiaina, ua ou iloa e tatau ona si’itia a’e lo’u leo i lapata’iga. ‘Ia outou mataala ma tatalo, ne’i tou ulufale atu i le fa’aosoosoga.’ E to’atele o loo i ai taleni popoto lava o loo latou tu’uina atu ma le amio leaga i le auaunaga a Satani. O le a le lapata’iga e mafai ona ou tu’uina atu i ni tagata ua ta’utino mai ua latou o ese mai nai le lalolagi ma ua latou tu’ua ana galuega o le pouliuli? . . . O le to’atele o i latou e teufatuina manatunatuga lē mamā, o mafaufauga lē paia, o fa’anaunauga lē fa’apaiaina, ma tu’inanauga maulalo. E inoino le Atua i fua e fuaina mai e se la’au fa’apea. O agelu e mamā ma paia, latou te va’ava’ai mai i olaga o tagata fa’apea ma le inoino, a’o Satani e fiafia. Oka, ma’imau e, pe ana manatunatu tane ma fafine i le mea e maua e ala i le solia o le tulafono a le Atua! O le solitulafono o se fa’alumaina lea i le Atua ma o se malaia lea i le tagata, i lalo o so’o se mea lava e tupu ma mea uma lava e tutupu. E tatau ona tatou manatu i ai fa’apena, tusa lava po’o le a le matagofie mai o lona ufiufi, ae po’o ai fo’i so’o se tagata na te faia le solitulafono.” – Ibid., p. 146.
Aso Lua
Aukuso 20
3. FA’AMASINOINA MO LE MALAMALAMA SILI ATU
a. O fa’apefea ona fa’amatalaina e le Tusi Paia le i’uga o i latou e sa’ili e fa’aumatia tagata o le Atua? 2 Peteru 2:14; 2 Timoteo 3:5-9.
“O le fa’anoanoa ma le olaga pa’ū maulalo e mulimuli atu i le fa’asologa o amioga leaga maulalo o le tino, e lē mafai ona fuatiaina. O le lalolagi ua fa’aleagaina i lalo o tagata o loo nonofo ai. Ua toeitiiti lava a latou fa’atumulia le tumu o la latou amio leaga; peita’i o le agasala lea o le a aumaia ai le fa’asalaga sili ona mamafa, o le fa’atinoina lea o le amio leaga i lalo o le ufiufi o le amioatua. O le Fa’aola o le lalolagi Na te lē’i te’ena lava le salamō moni, tusa lava po’o le a le telē o le agasala; peita’i Na te lafo mai upu malolosi o a’oa’iga i Faresaio ma tagata pepelo. O loo sili atu si fa’amoemoe o lo o i ai mo le tagata agasala fa’aaliali nai lo le vasega lenei.
“ ‘O le mafua’aga lenei [o le lē fiafia lē alofa i le upu moni] o le a auina mai ai e le Atua ia i latou fa’aseseēga malolosi, ina ia latou talitonu ai i se pepelo: ina ia fa’asalaina uma ai i latou e lē’i talitonu i le upu moni, ae na fiafia i le amiolētonu.’ O lenei tane ma i latou na ia fa’aseseina, e lē alolofa e lē fiafia fo’i i le upu moni ae e fiafia i le amiolētonu. Ma o le a se fa’aseseega e sili atu ona malosi e mafai ona o’o mai i luga ia i latou, nai lo le fa’aseseega fa’apea, e leai se mea e to’asa ai le Atua i uiga o tu’inanauga maulalo o le tino ma le mulilua? O loo tele lapata’iga o loo i totonu o le Tusi Paia e fa’atatau i nei agasala.” – Testimonies for the Church, vol. 5, pp. 144, 145.
“I le avea o a’u ma sui faigaluega a Keriso, Ou te aioi atu ia te outou o loo ta’utinoina le upu moni mo le taimi lenei, ina ia outou inoino vave lava i so’o se tagata i le taimi lava e fa’alatalata mai ai i uiga lē mamā, ma ia outou lafoa’ia le mafuta fa’atasi ma i latou e manāvaina mai ni manatunatuga lē mamā. Ia outou inoino i nei agasala-e-fa’aleagaina-ai, i le inoino sili lona malosi. . . .
“A’o fa’atupula’ia pea i totonu o le lalolagi i latou o loo fa’atinoina nei agasala leaga ma o le a latou aumai fa’amalosia i latou i totonu o a tatou ekalesia, ou te lapata’i atu ia te outou ina ia aua ne’i outou fa’atagaina i latou. Ia outou liliu ese mai i le tagata fa’atosina. E ui lava ina ia ta’utino mai o loo ia mulimuli ia Keriso, o ia lava o Satani i le tino tagata.” – Ibid., p. 146.
b. Ta’u mai se lamatiaga fa’apitoa mo i latou e ta’utino mai o loo ia i latou le malamalama sili atu ona tele. Roma 2:21-23.
“O le feau sili ona tāua ua fa’apea ona tu’uina mai i tagata, ua tu’uina mai lea i lenei tino o tagata, ma e mafai ona latou maua se a’afiaga malosi lava pe afai o le a fa’apaiaina ai i latou i le feau lea. Latou te ta’utino mai o loo latou tula’i i luga o le fa’avae maualuga o le upu moni e fa’avavau, ma latou tausia ai poloa’iga uma a le Atua; o lea la, afai latou te tu’inanau i le fa’amalieina o le agasala, afai latou te faia le faita’aga ma le mulilua, e fa’asefuluina le sili atu o le telē ma le leaga o la latou agasala nai lo agasala a vasega ua ou ta’uina atu, o ē e lē o ioeina o loo tumau i luga ia i latou le tulafono a le Atua.” – Ibid., vol. 2, pp. 450, 451.
Aso Lulu
Aukuso 21
4. UA O’O MAI LE TAIMI E LAFOA’I AI A TATOU AGASALA FA’APELEPELEINA!
a. O ai e fa’atusalia i ai i tatou pe afai tatou te tu’inanau pea ma le loto ma’a’a i so’o se masaniga agasala – ma aisea fo’i? 2 Peteru 2:15, 16; Numera 22:9, 12, 21, 27, 28; 31:16.
“O se lapata’iga mata’utia lenei mo tagata o le Atua i le aso lenei, aua ne’i fa’atagaina se uiga lē kerisiano e nofo i totonu o ō latou loto. O se agasala o loo fafagaina e i’u ina avea ma masaniga; ma, a fa’amalosia e ala i le fa’atinoina so’o, e lē umi ae ia tu’uina mai loa se a’afiaga pule, ma aumaia ai ia gaua’i mai i ai malosi uma e sili atu ona lelei. O Palaamo na ia fiafia i le taui o le amiolētonu. O le agasala o le mana’o, lea e fa’aigoaina fa’atasi e le Atua ma le ifo i tupua, na te lē’i te’ena ma fa’ato’ilaloina. O Satani na ia maua le puleaga atoa lava o ia e ala i lenei sese e tasi, lea na pa’ū maulalo ai lana amio.” – The SDA Bible Commentary [E. G. White Comments], vol. 1, p. 1116.
b. O a auala o loo fa’aosoosoina ai kerisiano lē mataala i le amio leaga? 2 Peteru 2:17, 18; Roma 6:12; Efeso 6:12
“O le tagata gugutu o loo i ai le agaga o temoni, na te fai mai ua ia te ia le sa’olotoga tele lava, ma o gagana molemole ma le so’ona fa’atelēina na te sa’ili ai e fa’atosina ma fa’asese tagata lē fa’autauta ina ia latou filifilia le ala va tele o fiafiaga ma tu’inanauga agasala, ae lē o le ala vaiti ma le ala sa’o. O i latou o loo i ai agaga o temoni, latou te fa’aigoaina mana’oga o le tulafono a le Atua o le nofo pologa, ma latou te fai mai o i latou e usita’i i ai, o loo latou ola i se olaga o le mata’u nofo pologa. O upu molemole ma le matagofie latou te vivi’i fa’alialiavale ai i lo latou sa’olotoga, ma sa’ili ai e ufiufi a latou a’oa’oga sese mata’utia i ofu o le amiotonu. Latou te faia soligatulafono sili ona leaga ia manatu i ai e fa’apea o ni fa’amanuiaga ia i le aiga tagata.
“Latou te tatalaina atu i luma o le tagata agasala se faitoto’a lautele e mulimuli ai i fa’aosoosoga a le loto fa’aletino, ma solia ai le tulafono a le Atua, aemaise ai lava le poloa’iga lona fitu. O i latou e tautala i nei upu tetele o le fa’alialiavale loto vi’i, ma manumalo ai i lo latou sa’olotoga i totonu o le agasala, latou te folafolaina atu i ē o loo latou fa’aseseina, le olioliga o le sa’olotoga i se ala o le tete’e i le finagalo fa’aalia o le Atua. O nei tagata fa’aseseina o loo latou i ai fo’i i latou i le nofo pologa sili ona leaga ia Satani ma o loo pulea e lona malosi, ae o loo latou folafolaina atu le sa’olotoga ia i latou o le a lē fefefe e mulimuli i le ala lava lea o le agasala lea ua latou filifilia.
“O upu o le Tusi Paia ua fa’ataunu’uina moni ai lava iinei, o tauaso o loo ta’ita’iina tauaso. auā o lē na te fa’ato’ilaloina se tagata, o ia fo’i na te fa’apologaina le tagata. O nei tagata fa’aseseina o loo latou i ai i lalo o le nofo pologa sili ona fa’amalaiaina i manaoga o temoni. Ua latou fa’atasia atu i latou i malosi o le pouliuli ma ua leai so latou malosi e tete’e atu ai i manaoga o temoni.” – The Review and Herald, April 15, 1875.
Aso Tofi
Aukuso 22
5. FA’AMANUIAINA I A’OA’IGA
a. Fa’amatala le filifiliga ua ia i tatou. 2 Peteru 2:19; Roma 6:16, 19; Fa’ataoto 10:17.
“O [Ioane] na masani lava ona lapata’ia ma fautuaina e le Fa’aola; ma o nei a’oa’iga na ia taliaina. A’o fa’aalia atu le amio a Iesu ia te ia, na va’aia ai e Ioane ona lava vaivaiga, ma na fa’amaulaloina ai o ia e le fa’aaliga. O aso ta’itasi, o le eseesega ma lona lava uiga sauā, na ia va’aia ai le alofa ma le fa’apalepale o Iesu, ma na ia fa’alogo i Ana lesona o le loto maulalo ma le onosa’i. O aso ta’itasi na tosina atu ai lona loto ia Keriso, se’ia o’o ina ia lē toe iloa ia lava ona o lona alofa mo lona Matai. O le mana ma le agalelei, o le mamalu ma le agamalu, o le malosi ma le onosa’i, lea na ia va’aia i le soifuaga o le Alo o le Atua i aso ta’itasi, na fa’atumulia ai lona loto i le alofa naunau. Na ia lafoa’iina atu lona ita loto leaga, finafinau i le fia sili, i le mana liua o Keriso, ma o le alofa fa’alelagi na galuea’iina ai i totonu ia te ia se liuaga o le amio.
“O le eseesega iloga i le fa’apaiaina na galuea’iina i le olaga o Ioane, o le olaga lea o lona uso a so’o, o Iuta. . . . O le tele lava o taimi, a’o ia fa’alogo atu i upu a le Fa’aola, na o’o mai ai ia te ia le talitonuga, peita’i na te lē’i mana’o e fa’amaulalo lona loto pe fa’aali fo’i ana agasala. O lona te’ena o le a’afiaga fa’aleatua, na ia fa’alumaina ai le Matai lea na ia ta’utino mai e alofa i ai. O Ioane na ia fai taua ma le finafinau e tete’e atu i ona sese; peita’i o Iuta na ia lē amanaiaina le malosi fai filifiliga o lona mafaufau ma ia gaua’i atu ai i le fa’aosoosoga. . . .
“O Ioane ma Iuta o fa’atusa ia o i latou e ta’utino mai o i latou o so’o o Keriso. O so’o nei e to’a lua, sa ia i la’ua uma avanoa e su’esu’e ma mulimuli ai i le Fa’aa’oa’o fa’ale-atua. O i la’ua uma sa mafuta vavalalata lava ma Iesu ma sa la maua le avanoa sili ona tāua la te fa’alogo ai i Ana a’oa’oga. O i la’ua ta’itasi sa i ai amioga sese leaga lava o a la amio; ma o i la’ua ta’ito’atasi na mafai ona la maua le alofa tunoa o le Atua lea e liua ai le amio. . . . O le tasi, o lona oti i aso ta’itasi ia te ia lava ma le fa’ato’ilaloina ai o le agasala, na fa’apaiaina ai e ala i le upu moni; a’o le isi, o lona te’ena o le mana e liua ai, o le alofa tunoa ma lona tu’inanau i fa’anaunauga fa’apito, na aumaia ai i le nofo pologa ia Satani.” – The Acts of the Apostles, pp. 557, 558.
Aso Faraile
Aukuso 23
FESILI TOE FA’AMANATU
1. Na fa’apefea ona ono mafai ona sao mai Miriama i le fa’alumaina o le lepela?
2. E fa’apefea ona fa’atatau lelei lava e le lalolagi o le taimi lenei, lapata’iga a Peteru mo i tatou i le taimi nei?
3. I totonu o se lalolagi pa’ū maulalo i le amio leaga, o a auala o le a ma’oti fa’apitoa ai lava tagata o le Atua?
4. O le a le auala e tasi lava e mafai ai ona ou sao mai ai i le i’uga o Palaamo?
5. Fa’amatala le eseesega i uiga, i le va o Ioane agasala ma Iuta agasala.