Ulua’i Aso
Iulai 21
1. MAUALUGA MA SILI ATU NAI LO LAGONA FA’ALENATURA
a. Aisea ua ta’u mai ai le alofa ina ua mavae le agalelei fa’aleuso? 2 Peteru 1:7 (vaega mulimuli); Roma 5:7, 8; Iakopo 3:17.
“E tatau ona tatou alolofa i tagata ona o Keriso. E faigofie i le loto fa’alenatura ona alofa i ni nai tagata to’aitiiti e sili lona fiafia i ai, ma alofa fa’apito ai i nei tagata fa’apitoa to’aitiiti; peita’i ua fa’atonu mai Keriso ia i tatou ina ia tatou alolofa le tasi i le isi e fa’apei ona Ia alofa mai ia i tatou.” – Testimonies to Ministers, p. 156.
b. O le a le mea o loo feso’ota’i atu e Iesu i le atoatoaga? Mataio 5:43-48; Luka 6:36; Kolose 3:14.
“Na ofo tagata i le mamā ma le mamalu o le amio a lo tatou Fa’aola, a’o Lona alofa lē fa’apito ma Lona agalelei agamalu, na manumaloina mai o latou loto. O Ia o le fa’aaliga atoa o le lelei atoatoa.” – Gospel Workers, p. 73. [1892 edition.]
“Aua le teufatuina se lagona fia pule fa’amaualuga, ma ē manatu ai e sili atu oe nai lo isi. ‘Ia fa’aeteete lē o loo manatu o loo ia tū ne’i pa’ū.’ O le filemu ma le malologa o le a o’o mai ia te oe a’o ē aumaia lou loto i le gaua’i atu i le finagalo o Keriso. O le a pule loa le alofa o Keriso i totonu o le loto.” – Messages to Young People, p. 73.
Aso Gafua
Iulai 22
2. O LE AMIO FA’ALELAGI UA FOA’IINA MAI
a. Fa’amatala le loloto o le uiga o se kerisiano moni e fa’atatau i isi. Salamo 101:2; Filipi 2:1-4.
“O le ita, osofia gofie o le a fa’afilemuina ma fa’ato’ilaloina e le suau’u o le alofa tunoa o Keriso. O le lagonaina o agasala ua fa’amagaloina, o le a aumaia ai lena filemu e silisili nai lo malamalama’aga uma. O le a i ai le taumafaiga finafinau lava ina ia manumalo mai i mea uma lava e tete’e i le atoatoaga fa’akerisiano. O fe’eseesea’iga o le a mou ese atu. O lē na sa’ili’ili masei muamua ia i latou i ona itu uma, o le a ia iloa, o sese e matuā sili atu ona tetele o loo i ai lea i lana lava amio.” – Messages to Young People, p. 73.
b. O le a le auala e tasi lava e mafai ai ona tumau le ituaiga uiga lea o loo fa’amatalaina i luga, i totonu o loto o i tatou ta’ito’atasi? Filipi 2:5-8; 1 Korinito 2:16.
“O le alofa o le tagata ia te ia lava lea e fa’aumatiaina ai lo tatou filemu. A’o ola atoa le tagata tuai, o lea tatou te tula’i ai ma sauni i taimi uma lava e puipuia a’u mai i le fa’alumaina ma upu faifai mai; peita’i a tatou feoti loa, ma ua natia lo tatou ola fa’atasi ma Keriso i totonu i le Atua, o le a lē tigā o tatou loto ona o uiga fa’atalalē mai po o le lē amanaia mai fo’i o i tatou e tagata. O le a tatou tutuli i upu faifai mai ma o le a tatou tauaso i fa’atauemuga ma upu fa’alumaluma mai. . . .
“O le filemu o Keriso, o se filemu lea i taimi uma lava ma e tumau. E lē fa’alagolago i so’o se mea lava e tupu i le olaga, po’o le tele o oa fa’alelalolagi poo le tele fo’i o uo fa’alelalolagi. O Keriso o le vai puna lea o vai ola, ma o le fiafia e aumaia mai ia te Ia, e lē mafai ona muta.
“O le agamalu o Keriso, e fa’aalia i totonu o le aiga, o le a fa’afiafiaina ai tagata o le aiga; e lē fa’aosofia ai ni finauga, e lē toe tautalagia mai ai se tali ita, peita’i e fa’afilemuina ai le ita tele ma fa’asalalau atu ai se uiga agamalu e lagonaina e i latou uma lava oi totonu o lona li’o fiafia. So’o se nofoaga lava e teufatuina ai le agamalu o Keriso, e faia ai lava aiga oi le fogaeleele o se vaega o le aiga tele e tasi i lugā.
“O le a matuā sili atu mo i tatou lo tatou puapuaga i lalo o tu’ua’iga sese, nai lo lo tatou faia ia i tatou lava o le sauāga i lo tatou taui ma sui atu i o tatou fili. O le agaga o le ita ma le taui ma sui na ulua’i amata ia Satani, ma e na o le leaga lava e mafai ona aumaia ai i luga o lē na te teufatuina. O le loto maulalo, lena agamalu, o le fua lea o le tumau i totonu ia Keriso, o le mea lilo moni lea o le fa’amanuiaga. ‘O le a Ia fa’amatagofieina ē e agamalu i le fa’aolataga.’” – Thoughts From the Mount of Blessing, pp. 16, 17.
Aso Lua
Iulai 23
3. ALOFA: ALOFA MONI FA’AFEAGAI MA LE ALOFA SESE
a. Fa’amatala le alofa moni ua sauni le Atua e foa’i mai ia i latou uma o ē naunau e taofimau moni lava – ma teufatuina loloto lava lea alofa moni. Mataio 5:6; 1 Korinito 13:4-8.
“O le auala mo le ekalesia e manuia ai, e tatau ona i ai se taumafaiga su’esu’eina e ona tagatā ekalesia, ina ia latou teufatuina le la’au tāua lava o le alofa. Ia faia auala uma ina ia mafai ai ona tupu lauolaola i totonu o le loto. O kerisiano moni ta’itasi uma lava o le a ia fausiaina a’e i totonu o lona olaga uiga o lenei alofa fa’alelagi; o le a ia fa’aalia se uiga o le fa’apalepale, o le loto foa’i, ma se sa’olotoga mai i le anovale ma le fuā loto leaga. O lenei amio ua fausiaina a’e i upu ma gaioiga, o le a lē tuliesea tagata, o le a lē fa’afaigatā fo’i ona talanoa i ai tagata, lē tali leleia tagata, ma lē ano i naunauta’iga o isi. O le tagata na te teuteuina le la’au tāua o le alofa, o le a ia fa’afitia o ia e ia lava, ma o le a ia lē lafoa’ia lona puleaina o ia e ia lava, e tusa lava pe a fa’aosoina mai lona ita e se isi tagata. O le a ia lē tu’ua’iina atu mafua’aga sese ma faufauga leaga i sini a isi tagata, peita’i o le a matuā loloto lona fa’anoanoa ona o le agasala pe a iloa i so’o se tasi lava o so’o o Keriso.
“E lē mitamitavale le alofa. O se uiga agamalu; e lē osofia ai lava se tagata ina ia gugutu ma fa’alialiavale, ina ia fa’afefeteina o ia lava. O le alofa mo le Atua ma o tatou uso a tagata, o le a lē fa’aalia i gaioiga fa’ata’alise fa’atautala po o le ta’ita’iina ai fo’i o i tatou ina ia tatou fia pule, sa’ili’ili masei, poo le fia fai fa’atonuga atu ai fo’i i isi. O le alofa e lē fa’afefeteina. O le loto o loo pule aoao ai le alofa, o le a ta’ita’iina atu i se uiga agamalu, fa’aaloalo, mutimutivale o le amio aga’i atu i isi, tusa lava pe fetaui ma o tatou manatu pe leai fo’i, pe latou te fa’aaloalo mai ia i tatou pe leai fo’i. O le alofa o se tapula’a gaioi lea; e fa’atumauina ai i taimi uma le lelei o isi i o tatou luma, ma fa’apena ona taofia ai i tatou mai i gaioiga lē lelei ne’i tatou to’ilalo i la tatou sini i le manumaloina mai o agaga ia Keriso. O le alofa na te lē sa’ilia ana lava mea. O le a ia lē fautuaina tagata ina ia latou sa’ilia lo latou lava filemu ma le so’ona fa’amalieina o i latou lava. O le fa’aaloalo lea tatou te tu’uina ia te a’u lea e masani lava ona fa’aleagaina ai le tuputupu a’e o le alofa.” – Testimonies for the Church, vol. 5, pp. 123, 124.
b. O fa’apefea ona lapata’ia i tatou e fa’atatau i le alofa sese? Iakopo 2:19; Iuta 11-13.
“O Elder B-----t na foliga mai o ia o se tane paia. E tele ana upu na tautalagia e fa’atatau i le alofa. O lona talanoa e fa’atatau i le fa’atuatua na ia fai mai ai, ‘Na pau lava le mea e tatau ona tatou faia o le talitonu lea, so’o se mea lava la tatou te ole atu ai i le Atua, o le a foa’iina mai.’ Na tali atu Bro. White, ‘O fa’amanuiaga o folafolaga e foa’iina mai i aiaiga. Ioane 15:7: Afai tou te tumau i totonu ia te A’u ma tumau fo’i A’u upu i totonu ia te outou, so’o se mea tou te ole atu ai, o le a foa’iina mai ia te outou. O lou manatu e fa’atatau i le fa’atuatua, e gaogaoi’i e fa’apei o se paelo teu falaoamata e leai ni ona ufiufi i ona itu e lua. Ma e tusa ai la ma le alofa moni, o ia o se peresona ma’ale’ale lava, na te lē la’a atu lava i fafo atu o le ala o le upu moni fa’ale-Tusi Paia.’” – Spiritual Gifts, vol. 2, pp. 46, 47.
Aso Lulu
Iulai 24
4. O SE MATAUPU TAUA TELE
a. O le a le tāua mo i tatou ina ia tatou taumasuasua i alofa tunoa fa’akerisiano uma lava o loo tusia mai o ni la’asaga ia i le apefa’i a Peteru? 2 Peteru 1:8.
“Ia taumasuasua ma ia i ai alofa tunoa fa’akerisiano i totonu ia te outou. Avatu i lou Fa’aola ou lagona silisili ma sili ona paia. Ia tu’uina atu le usita’i atoatoa i Lona finagalo. O le a Ia lē talia se mea e itiiti ifo nai lo lenei. Aua ne’i liliueseina oe mai i lou fa’amaoni mausali i tauemuga ma upu faifai a i latou ua tu’uina atu o latou mafaufau i le fa’amaualuga fa’alialiavale. Mulimuli i lou Fa’aola i le lotolotoi o ripoti leaga ma ripoti lelei; ia ē manatu o le olioli atoa, ma o se mamalu paia, lou tauaveina o le satauro o Keriso. E alofa Iesu ia te oe. Na Ia maliu mo oe. Se’ivagana ua ē sa’ili e te auauna ia te Ia ma ou lagona alofa lē vaeluaina, o le a ē lē manumalo i le fa’aatoatoaina o le fa’apaiaina i le mata’u ia te Ia, ma o le a una’iina oe ina ia ē fa’alogo mulimuli atu lava i upu mata’utia fa’apea, O ese atu ia.” – Testimonies for the Church, vol. 2, p. 237.
b. I le lalolagi popole o le taimi lenei, o le a se mea o loo masani ona tatou lē amana’ia? Pese a Solomona 2:15.
“O loo ē pagatia i popolega, avega, ma tiute fa’ata’alise; peita’i o le sili atu o le tele o le popole i luga ia te oe, ma o le sili atu o le mamafa o avega e tatau ona ē tauaveina, o le sili atu fo’i lena o le telē o lou mana’omia o le fesoasoani fa’alelagi. O Iesu o le a avea ma ou fesoasoani. E te mana’omia i taimi uma lava, le malamalama o le ola e fa’amalamalamaina ai lou lava ala, ona lafoia atu loa lea o ona ave fa’aleatua i luga o isi. O le galuega a le Atua, o se atoaga atoatoa ona lelei lea, auā e atoatoa ona lelei i ona vaega uma lava. O le va’ava’ai toto’a mae’ae’a fa’aeteete i mea ia e fa’aigoaina e le lalolagi o mea iti, lea e faia ai le matagofie tele ma le fa’amanuiaina o le olaga. O galuega iti o le alofa, o upu itiiti o le agalelei, o gaioiga iti o le fa’afitia e le tagata o ia lava, o se fa’aleleia atili ma le poto o avanoa laiti, o le fausiaina a’e ma le finafinau o taleni itiiti, e ta’uta’ua ai tagata i le silafaga a le Atua. Afai e faia ma le fa’amaoni na mea iti, afai e i ai nei alofa tunoa i totonu ia te oe, ma taumasuasua, o le a fa’aatoatoaina ai oe i galuega lelei uma.
“E lē lava lou mana’o e te foa’i se vaega tele mai i au tupe i le galuega a le Atua. Ua Ia valaa’u mo se tuuina atu atoatoa o ou malosi uma lava. O lo outou taofia mai o outou lava, o le mea sese lea o lou olaga. Atonu e te manatu e faigata tele ia te oe le fa’atumauina o se so’otaga vavalalata ma le Atua, peitai o lau galuega o le a fa’asefuluina lona faigata pe afai e te lē faia lenei tulaga. . . .
“Ua vala’au le Atua mo le tu’uina atu fa’apaiaina atoatoa o oe atoa lava, ma, so’o se mea lava e itiiti ifo nai lo lenei, o le a Ia lē talia. O le sili atu o le faigata o lou tulaga, o le sili atu foi lena o lou mana’omia o Iesu.” – Ibid., vol. 4, pp. 543, 544.
Aso Tofi
Iulai 25
5. MATA’UTIA LE LEAGA O LE FA’AGALO = TAUASO
a. Afai e lē o i ai ia i tatou so’o se tasi lava o alofa tunoa fa’akerisiano, o le a le mea ua tupu? 2 Peteru 1:9; Fa’aaliga 2:4.
“O le tagata e lē a’e i luga o le apefa’i o le savaliga ma fa’aopoopo ai le alofa tunoa i le alofa tunoa, ‘e tauaso o ia, ma e lē mafai ona va’ai mamao ese atu,’ na te lē iloa, o lona lē la’asia o nei la’asaga fa’amanuiaina i le aga’i a’e i luga o le apefa’i i sitepu ta’itasi, i le tuputupu a’e i le alofa tunoa ma le iloa e fa’atatau i lo tatou Ali’i o Iesu Keriso, na te lē o tu’uina o ia i se tulaga e mafai ona sulugia ai o ia e le malamalama o le Atua o loo i luga o le apefa’i. Talu ai ona na te lē o fa’aopoopoina le alofa tunoa i le alofa tunoa, ua ia fa’agaloina ai mana’oga o le Atua i luga ia te ia, ma sa tatau ona ia maua le fa’amagaloga o agasala e ala i le usita’i i mana’oga o le Atua. O loo i ai o ia i le tulaga o se tagata agasala i luma o le Atua. Afai o lo o ia te ia alofa tunoa o Keriso, o le a ia fa’atinoina ma fa’ateleina nei alofa tunoa, peita’i afai na te lē fuaina mai fua i galuega lelei mo le vi’iga o le Atua, ona tumau ai lava lea o ia i se tulaga tauaso ma le lē malamalama, fa’amalieina tu’inanau o ona lava mana’oga, ma le agasala. E ‘lē mafai ona ia va’ai mamao ese atu.’ O ona mata o loo taula’i atu i luga o le fogaeleele, ae lē o le Atua i luga o le apefa’i.
“O lenei vasega, atonu e i ai o latou fa’amanuiaga fa’alelalolagi peita’i, e leai so latou va’ai fa’aleagaga i le avanoa sili ona taua ma fa’amanuiaga o le ola i totonu o le malamalama lea e susulu mai i le Atua i luga o le apefa’i. Latou te lē iloa mea e mo lo latou filemu. E lē mafai ona latou va’ai atu i tua i se va’ai manino fa’aleagaga, auā latou te lē va’ai e ala atu i le malamalama o le lagi. Na latou olioli muamua i le alofa o le Atua; sa latou salamo mai i a latou agasala ma tu’uina mai i latou ina ia avea ma auauna a Iesu Keriso, peita’i ua latou fa’agaloina atoa lava tautoga na latou faia i le Atua i lo latou papatisoga – o tiute paia uma lava na latou tauaveina ina ia latou sa’ili ai mo le mamalu, vi’iga, ma le tino ola e fa’avavau.” – Manuscript Releases, vol. 19, pp. 350, 351.
Aso Faraile
Iulai 26
FESILI TOE FA’AMANATU
1. Aisea, ma, o a ituaiga mea e tutupu e tula’i mai, o loo lamatia ai a’u i le alofa fa’apito lē tonu?
2. O a ituaiga aiaiga e tauau ina to’ilalo ai lo’u uiga foa’i?
3. E fa’apefea ona mafai ona tatou iloa le eseesega i le va o le alofa moni mai i le alofa pepelo/sese?
4. O a uiga alofa iti o lo’o o’u fa’atalalē i ai?
5. Aisea o loo o’u lē atoatoa ai pea i le alofa – ma aisea e tāua tele ai lenei tulaga?