Ulua’i Aso
Setema 1
1. O SE OLEGA I LE MAFAUFAU
a. E fa’apefea ma aisea ua ole mai ai Peteru i le malosi o ō tatou manatunatuga? 2 Peteru 3:1.
“A mafai loa ona sili atu ona malamalama atoatoa tane ma tama’ita’i i le telē tele o le taulaga silisili na faia e le Tupu o le lagi i Lona maliu e sui a’i le tagata, o le a si’itiaina loa ma fa’amamaluina le fuafuaga o le fa’aolataga, ma o ata toe lafoia mai o Kalevario, o le a fafaguina ai lagona alofa, paia, ma le fiafia i totonu o le loto o le kerisiano. O vi’iga i le Atua ma le Tama’i Mamoe o le a i ai i totonu o ō latou loto ma o latou laugutu. O le fa’alialiavale ma le mautinoaga o le tagata ia te ia lava e lē mafai ona ola lauusiusi i totonu o loto o loo latou teufouina i o latou manatunatuga va’aiga o Kalevario. O lenei lalolagi o le a foliga mai e itiiti lava lona aoga ia i latou e fa’atāuaina le tau tele o le toe fa’atauina mai o le tagata, o le toto paia lea o le Alo pele o le Atua. O oa uma lava o le lalolagi e lē lava lo latou aogā e toe fa’atau mai ai se tagata e to’atasi o loo fano. O ai e mafai ona ia fuaina le alofa na lagonaina e Keriso mo se lalolagi ua leiloa a’o Ia tautau i luga o le satauro, ma puapuagatia ai mo agasala a tagata agasala? O lenei alofa na lē’i mafai ona fuatiaina, e lē mafuatia.” – Testimonies for the Church, vol. 2, p. 212.
“Oka, ma’imau e, pe ana tu’uina atu atoa malosi o loo fa’aaogaseseina, i le sini tele e tasi – o oa tamaoaiga ia o le alofa tunoa o le Atua i lenei olaga – semanu oka ni molimau e mafai ona tatou tautauina i puipui o manatunatuga o ō tatou mafaufau, ma toe fa’amanatuina ai alofa tunoa ma le agalelei o le Atua! . . . O le a tauaveina loa fa’atasi ma i tatou le masaniga e avea o se tapula’a tumau, ina ia matuā fa’apututeleina oa fa’aleagaga i le finafinau ma le vilivilita’i, e fa’apei ona galue o tagata fa’apea mo mea fa’alelalolagi ma mea fa’alētumau.ˮ - Our High Calling, p. 188.
Aso Gafua
Setema 2
2. O MEA E TATAU ONA TEUINA I TOTONU O Ō TATOU MAFAUFAU
a. O le a se mea e tatau ona avea ma fa’amuamua tele lava mo i tatou ina ia tatou manatua, ma aisea fo’i? 2 Peteru 3:2; Salamo 119:11.
“O fa’aosoosoga e masani lava ona foliga mai e lē mafai ona te’ena, talu ai, ona o le fa’atalale i le tatalo ma le su’esu’eina o le Tusi Paia, o lē ua fa’aosoosoina e lē mafai ona ia manatua vave folafolaga a le Atua ma fa’afetaia’ia ai Satani i a’upega a le Tusi Paia. Peita’i o agelu o loo si’omiaina i latou o loo naunau ina ia a’oa’oina i latou i mea fa’ale-Atua; ma, i le taimi e matuā mana’omia ai lava le fesoasoani, o le a latou manatua upu moni tonu lava ia e mana’omia. E fa’apena, ‘a sau le fili e fa’apei o se lolo, o le Agaga o le Atua o le a Ia si’itiaina i luga se tapula’a e tete’e atu ai ia te ia.’ Isaia 59:19.
“Na folafola mai Iesu i Ona so’o: ‘O le Fa’amafanafana, o le Agaga Paia lea, lea o le a auina mai e le Tamā i Lo’u Igoa, o le a Ia a’oa’o ia te outou i mea uma lava, ma fa’amanatu mai mea uma i ō outou mafaufau, o mea uma lava ua Ou fai atu ai ia te outou.’ Ioane 14:26. Peita’i o a’oa’oga a Keriso e tatau ona uma ona teuina i totonu o le mafaufau ina ia fa’amanatu mai ai e le Agaga o le Atua i o tatou mafaufau i le taimi o fa’afanoga.ˮ - The Great Controversy, pp. 599, 600.
b. Ta’u mai fa’ata’ita’iga o loo fa’amamafa mai ai le tāua tele o le teuina i o tatou mafaufau o tala’aga ma a’oa’oga o le Tusi Paia. Luka 1:67-70; Galuega 3:20, 21.
“O le Tusi Paia e sili lona matua, e mai anamuā, ma o le tala’aga lea e sili ona atoatoa ua maua e tagata. Na tu’ufouina mai i le vaipuna o le upu moni e fa’avavau, ma i augatupulaga uma, o le aao o le Atua ua Ia tausi fa’atumauina lona mamā. Ua ia fa’amalamalamaina le taimi mamao ua tuana’i, lea e sa’ili tagata ma le lē aogā ina ia latou iloa. E na o totonu lava o le Upu a le Atua tatou te va’aia ai le mana na folasia fa’avae o le eleele ma fofolaina le lagi. Na o le pau lava lea o le tusi tatou te maua ai se fa’amatalaga moni o le amataga o mālō. E na o iinei fo’i o loo aumaia ai se tala’aga o lo tatou aigā tagata e lē’o fa’aleagaina e le fa’alialiavale poo le uiga fa’ailoga-tagata o tagata.” – Education, p. 173.
“O loo mamafa i lo’u mafaufau le mataupu e fa’atatau i le tusia e fa’atatau i tala’aga o le Feagaiga Tuai. Ua ou matuā atuatuvale i lo’u va’ai atu i o’u tuagane ma uso o latou aumaia i totonu o le olaga o aso ta’itasi, upu moni itiiti lava fa’ale-Tusi Paia. O le auala mo i tatou e avea ai ma tagata manumalo, e tatau ona tatou iloa o loo i ai le taua e tatau ona tauina. Tatou te olioli i lo tatou iloaina, e ala i le mana fa’amalosi mai o le alofa tunoa o le Atua, tatou te mautinoa lava tatou te manumalo. E sili atu ona malosi le Atua nai lo malosi uma lava o le fili ua pa’ū.” – The Bible Training School, June 1, 1903.
Aso Lua
Setema 3
3. O SE FA’AILOGA FA’AVALO’AGA UA FA’ATAUNU’UINA
a. O le a se mea o loo tupu i aso mulimuli ina ia lūlū ai le fa’atuatua o le to’atele? 2 Peteru 3:3.
“O le auala ta’atele lava o loo fa’aaogaina i le a’oa’oina o talavou, na te lē ausia le tapula’a o le a’oa’oga moni. O manatu lē talitonu ua tu’ufa’atasia i mataupu o loo tu’uina i totonu o tusi a’oga, ma o poloa’iga a le Atua, ua tu’uina i se malamalama lē mautonu po’o se malamalama lē taliaina fo’i. Ua fa’apena ona masani mafaufau o talavou i manatu e fa’aosooso mai e Satani, ma o masalosaloga ia ua manatunatu i ai, ua avea ma mea moni fa’amautinoaina, ia i latou o loo manatunatu i ai, ma o su’esu’ega fa’asaienitisi ua faia ina ia fa’asese ai le fa’auigaina ma le fa’aleagaina o ana su’esu’ega. O tane ua latou tauaveina i luga ia i latou le avatu fa’amalosia o le upu a le Atua, i luma o fa’amasinoga a tagata e oti, ma ua tu’uina mai ai le fa’asalaga i le Afioga a le Atua e tusa ai ma fua a tagata e oti, ma o le upu moni a le Atua ua faia ina ia foliga mai o se mea lē mautinoa i luga o fa’amaumauga a saienitisi. . . . O le taimi sa tatau ai ona latou fa’aosofia le fa’atuatua i totonu ia i latou sa masalosalo, sa latou ta’utino mai ai lo latou lava lē mautinoa pe moni le upu a le Atua, poo le i’uga fo’i o su’esu’ega fa’asaienisi, lea ua fa’aigoaina sese fa’apea. O i latou na fa’autauta fa’amaoni moni lava, ua faia i latou ina ia fa’avaivaia i lo latou fa’atuatua, ona o le lē mausalī o se filifiliga a i latou na ta’utino mai, o i latou e fa’amatalaina le Tusi Paia ina ua latou fa’amatalaina poloa’iga ola. O Satani ua ia fa’aaogaina le lē mautū o le filifiliga a le mafaufau, ma e ala i mea faigaluega lē va’aia, ua ia saputuina mai ai i totonu ana fa’aseseega, ma fa’anunumiina ai mafaufau o tagata i puao o le masalosalo.” – Fundamentals of Christian Education, pp 328, 329.
b. O le a le apoapoa’iga a Paulo e fa’atatau i lenei tulaga i le taimi lenei? 1 Timoteo 6:20.
“O le lē suia o le natura ua tele lava ina a’oa’oina, ma o talitonuga masalosalo ua taliaina ma le fiafia e i latou ua filifilia e o latou mafaufau le si’omaga o le masalosalo, ona latou te lē’i loto gatasi ma le tulafono paia a le Atua, o le fa’avae lea o Lona mālō i le lagi ma le lalolagi. O ō latou fa’anaunauga fa’alenatura i le agasala na fa’afaigofieina ai mo i latou le filifilia o ala sese, ma latou masalomia ai le fa’amaoni o fa’amaumauga ma tala’aga o le Feagaiga Tuai ma le Feagaiga Fou. O le fa’a’onāina o i latou e a’oa’oga sese, ua latou va’ava’ai ai mo avanoa ta’itasi uma lava ina ia lūlū ai fatu o le masalosalo i totonu o isi mafaufau. O le natura ua si’itiaina i luga a’e o le Atua na faia le natura, ma o le faigofie o le fa’atuatua ua fa’aumatiaina, ma o le fa’avae o le fa’atuatua ua faia ina ia foliga mai e lē manino. O le fa’anunumiina i le masalosalo, o mafaufau o i latou e masalosalo, ua tu’ua ina ia fa’ato’ilaloina i luga o papa o le lē fa’amaoni.” – Ibid., pp. 329, 330.
Aso Lulu
Setema 4
4. O LE AGAGA O VALOAGA UA OSOFA’IA
a. E ese mai i le fa’alēaogaina o le pule a le Tusi Paia, o le a se isi mea o loo fa’atupula’ia le mata’itū i ai o osofa’iga mata’utia a Satani? Fa’aaliga 12:17; 19:10.
“O le fuafuaga a Satani le fa’avaivaia o le fa’atuatua o tagata o le Atua i Molimau. Ona soso’o mai ai lea ma le masalosalo e fa’atatau i vaega sili ona tāua o lo tatou fa’atuatuaga, o poutu ia o la tatou talitonuga, ona masalosalo ai fo’i lea e fa’atatau i le Tusi Paia, ona soso’o ai lea ma le savaliga aga’i i lalo i le fa’afanoga. A masalomia loa ma lafoa’ia Molimau ia sa talitonu muamua i ai, ua iloa loa e Satani o i latou ua fa’aseseina o le a lē fa’amuta ai iinei; ma na te fa’aluaina ai ana taumafaiga se’ia o’o ina ia lafoina atu i latou i le fouvale fa’aaliali, lea e leai sona fofō ma i’u ai i le fa’aumatiaga.” – Testimonies for the Church, vol. 4, p, 211. [Author’s emphasis.]
“O le fa’aseseega mulimuli lava a Satani, o le fa’alēaogaina lea o le molimau a le Agaga o le Atua. ‘A leai se fa’aaliga, e fano le nu’u.’ Fa’ataoto 29:18. O Satani o le a galue ma le poto, i auala eseese ma e ala atu fo’i i mea faigaluega eseese, ina ia lē mausalī le fa’atuatuaga o tagata totoe o le Atua i le molimau moni. O le a ia aumaia i totonu fa’aaliga sese, ina ia ta’ita’iseseina ma nini fa’atasi ai fa’aaliga sese ma fa’aaliga moni, ma fa’apena ona inoino ai tagata, o lea o le a latou manatu ai i mea uma lava o loo tauaveina le igoa o fa’aaliga, o se ituaiga naunauta’iga lē fautuaina; peita’i o tagata fa’amaoni, o lo latou fa’atusatusaina o fa’aaliga sese ma fa’aaliga moni, o le a mafai ai e i latou ona iloa le eseesega i le va o ia vaega.” – The Faith I Live By, p. 296.
b. O le a le mea e tupu pe a amata ona masalosalo i Molimau i latou o loo ta’utino mai e talitonu i le feau a le agelu lona tolu – ma e masani lava, aisea latou te faia ai lenei tulaga? Ioane 3:19, 20.
“Ou te iloa lou lamatiaga. Afai e te lē toe talitonuina molimau, o le a ē tafea ese mai i upu moni o le Tusi Paia. Ua ou fefe i le manatu lea, e to’atele o le a tu’ufesili ma masalosalo, ma i lo’u mafatiaga mo o outou agaga, ou te mana’o ai e lapata’i atu ia te outou. E to’a fia o le a taliaina le lapata’iga? E fa’apei o le tulaga ua outou talitonu ai nei i molimau, e tatau ea ona uia atu e se tasi lou ala, ma fa’asa’o ou sese, o le a ē lagona ea e te sa’oloto atoatoa ina ia talia pe te’ena fo’i so’o se vaega poo le molimau atoa? O le vaega lena o le a sili ona itiiti lou mana’o e talia, o le vaega tonu lava lena e sili ona mana’omia. O le Atua ma Satani e lē galulue fa’atasi lava. O molimau o loo fa’ailoa mai ai le fa’ailoga a le Atua po’o le fa’ailoga a Satani. O se la’au lelei e lē mafai ona ia fuaina mai fua leaga, e lē mafai fo’i e se la’au leaga ona fuaina mai fua lelei. O ō latou fua tou te iloa ai i latou. Ua fetalai le Atua. O ai ua gatete i Lana upu?” – Testimonies for the Church, vol. 5, p. 98.
Aso Tofi
Setema 5
5. TEUFATUINA O FE’AU MO LE ASO LENEI
a. Aisea e tāua tele ai le usita’i i molimau ua auina mai e le Atua i Ona tagata e ala mai i le Agaga o valoaga, aemaise ai lava i aso mulimuli nei? Fa’ata’oto 29:18 (‘afa muamua); Hosea 12:13; 2 Nofoa’iga Tupu 20:20 (‘afa mulimuli).
“Ua vala’au le Atua mo le fa’afouina o le molimau tu’usa’o sa alagaina i tausaga ua mavae. Ua Ia vala’au mo le fa’afouina o le ola fa’aleagaga. O malosi fa’aleagaga o Ona tagata ua leva ona ma’i vaivai, peita’i e tatau ona i ai se toe fa’atuina mai nai le foliga oti. O le tatalo ma le fa’aalia o agasala e tatau ai ona tatou fa’amamā fa’alaulelei le ala tele o le Tupu. A’o tatou faia lenei tulaga, o le mana o le Agaga o le a afio mai ia i tatou. Tatou te mana’omia le malosi fa’apenetekoso. O lenei malosi o le a o’o mai; auā ua uma ona folafola mai le Ali’i Na te auina mai Lona Agaga o le mana lea e manumalo atoa ai.
“O taimi fa’afanoina o loo i o tatou luma. O tagata ta’itasi uma lava o loo i ai se iloa e fa’atatau i le upu moni e tatau ona ala mai, ma tu’uina o ia, o le tino, loto, ma le agaga, i lalo o le koleniga a le Atua. O le fili o loo i luga o ō tatou ala. E tatau ona tatou matuā feala lava i lo tatou leoleo mataala e tete’e atu ai ia te ia. E tatau ona tatou o’ofu atoa i le talita a le Atua. E tatau ona tatou mulimuli i taula’igā ala ua tu’uina mai e ala i le Agaga o Valoaga. E tatau ona tatou alolofa ma usita’i i le upu moni mo le taimi lenei. O lenei tulaga o le a lavea’iina ai i tatou mai i lo tatou taliaina o fa’asesēega malolosi. Ua fetalai mai le Atua ia i tatou e ala mai i Lana upu. Ua Ia fetalai mai ia i tatou e ala mai i molimau i le ekalesia, ma e ala mai fo’i i tusi ua fesoasoani e fa’amanino ai lo tatou tiute mo le taimi lenei ma le tulaga e tatau ona tatou tula’i ai i le taimi lenei. O lapata’iga ua tu’uina mai, o lea laina i lea laina, o lea poloa’iga i lea poloa’iga, e tatau ona taliaina. Afai tatou te lē amana’iaina, o le a se alofaga e mafai ona tatou tu’uina atu?
“Ou te aioi atu ia i latou o loo galulue mo le Atua ina ia aua ne’i latou taliaina a’oa’oga sese e fai ma a’oa’oga fa’amaoni. O loo fa’atali Keriso ina ia fa’amumūina le fa’atuatua ma le alofa i totonu o loto o Ona tagata. Aua lava ne’i taliaina talitonuga sese mai i tagata e tatau ona tula’i mausali i luga o le fa’avae o le upu moni e fa’avavau. Ua vala’au le Atua ia i tatou ina ia tatou taofi mausali i tapula’a fa’avae o loo fa’avaeina i luga o le pule mautinoa.” – Gospel Workers, pp. 307, 308.
Aso Faraile
Setema 6
FESILI TOE FA’AMANATU
1. O a manatunatuga o loo o’u manatunatu i ai e tatau ona suitulaga ai manatunatuga sili atu ona lelei?
2. E fa’apefea ona mafai ona ou sauni i se tulaga silisili lava mo le tofotofoga tele lava o loo soso’o mai, lea e lē mafai ona ou ‘alo mai ai?
3. O a vaega o la’u a’oga o loo faia ae e fete’ena’i ma lo’u fa’atuatuaga?
4. Aisea ua finafinau ai le fili o agaga ina ia fa’alēaogāina Molimau?
5. Aisea e tatau ai ona ou fa’atāuaina ma fa’aaluina taimi e sili atu ona tāua i lo latou su’esu’eina?