Taulaga Sapati Muamua mo se Fale Tapua’i, A’oga, ma se Ofisa i Liberia

O nisi o taimi e fa’aigoaina ai Liberia o se tasi o tuaoi mulimuli o Aferika, o se atunu’u mafanafana o vaomatua i le talafatai i sisifo o le konetineta o Aferika, e tuaoi atu ia Sierra Leone, Ivory Coast, Guinea, ma le Atlantic Ocean. I le lotolotoi o le faitau aofa’i o le sili atu ma le 5 miliona tagata, o le 85.3% latou te ta’utinoina le fa’atuatuaga Kerisiano (o le to’atele lava o i latou o Porotesano, e aofia ai Tagata lotu Aso Lona Fitu), o le 12.6% latou te ta’utinoina le tapua’iga Islam, 1.5% latou te lē ta’utinoina ni tapua’iga, ma le 0.6% latou te tausia tapua’iga fa’aleaganu’u.

O Liberia o se faigāmālō a tagata ua sili ona leva i totonu o Aferika, o loo taumafai pea e toe fausiaina a’e mai i le 14 tausaga o le taua sili ona leaga i le va o ona tagata (1989-2003) lea na fa’aumatiaina ai le fa’atulagaga fa’avae o lenei mālō, ma e fa’avasegaina o se tasi o atunuu e 10 e sili ona matitiva i le lalolagi. O fa’ato’aga na fa’aumatiaina, ma o le auivi fa’avae ma fale faigaluega na fa’atafunaina.

I le lotolotoi o le faigata, i le 2011, o le au uso i Liberia na tosina atu i mataupu fa’ale-Tusi Paia a le Seventh Day Adventist Reform Movement e ala atu i le upega tafā’ilagi a le Koneferenisi Aoao a le Fa’agaioiga Toe Fuata’i Aso Fitu O Le Toe Afio Mai, www.sdarm.org, ma o le galuega, na fa’avaeina iinei i le 2012. Talu mai lena tausaga, na fa’atupula’ia a’e ai mai i le aai laumua o Monrovia aga’i atu i le 3 o itumalo e 15 o Liberia.

E ui lava ina muta le fa’afitauli i le va o tagata, o ma’ila’ila o ona manu’a o loo mafai pea ona va’aia i le atunu’u atoa. O le fa’atulagaga atoa o lona tamaoa’iga ua malepe, ma e masani lava ona faigata ona maua se galuega iinei pe afai e lē ta’utinoina e se tagata lona fa’amaoni atu i se pātī fa’apolokiki. O mea ua tutupu o loo matuā fa’avaivaia ai lava, ae o loo aga’i pea i luma lo matou fa’atuatua.

O le fausiaina a’e o le galuega i Liberia, o loo i ai se mana’oga vave mo nofoaga autu ma se fale e tapua’i ai ma fa’aleleia ai a matou galuega fa’amisionare mo le togafitiga o ma’i. E mana’omia fo’i le faia o se a’oga maualalo mo a matou fanau o loo fetaia’i ma faigata ona e tatau ona latou misia su’ega ma vasega fa’aopoopo o loo fa’atulagaina e faia i le Sapati.

I le 2019, na foa’i mai ai ma le alofa e se tuagane (ua maliu nei) se fanua e tu’uina atu mo le fausiaina o se a’oga, falema’i, ma se ofisa. O le amataina la o le fausiaina o se fale tapua’i ma nei galuega tatau, ua fa’amanuiaina ai i matou i se eka o le laueleele i Nyanforla (Collin Farm) i le itumalo i lower Bong County, ma se isi fasi eleele e tusa ma le ¼ eka i Monrovia.

I lenei la malamalama’aga, o lea ua matou ole atu ai ma le agalelei i o tatou uso ma tuafafine uma i le lalolagi ina ia fesoasoani mai ia i matou i le Taulaga Sapati Muamua ina ia mafai ai e i matou ona fa’ataunu’uina sini e mana’omia ina ia fausia a’e ai le galuega a le Atua i Liberia. Matou te ulua’i fa’afetai atu ia te outou!

O ō outou uso ma tuafafine mai i Liberia