Ulua’i Aso
Aukuso 11
1. FA’ATUATUA, AE E LĒ O TALA FATU
a. Aisea na mafai ai ona fa’amausali e Peteru lona talitonuga i le natura atua o Iesu Keriso? Mataio 17:1-7.
“I luga o le mauga, o le malō o le mamalu oi lumana’i na fa’aataina mai i sona tulaga itiiti – o Keriso le Tupu, o Mose o ia o se fa’atusa o le au paia ua toe fa’atuina mai nai le oti, a’o Elia na ia fa’atusalia maia le au paia e aveolaina a’e i le lagi.
“O le au so’o e lē o malamalama i lea va’aiga; peita’i ua latou olioli ona o le Faia’oga onosa’i, Lē e agamalu ma loto maulalo, o Lē na fealua’i solo atu ma toe fo’i mai o se tagata ese e leai sona fesoasoani, ua vi’ia ma fa’amamaluina o Ia e i latou ua fa’amanuiaina e le lagi.” – The Desire of Ages, p. 422.
“O le po atoa lava na fa’aaluina i le mauga; ma a’o oso a’e le la, ona afio ifo lea o Iesu ma ona so’o i le laueleele laugatasi. O le fa’atumulia o le au so’o i manatunatuga, na latou matuā ofo ai lava ma le migao ma gūgū. E o’o lava ia Peteru e lē’i i ai se upu na ia tautala mai ai.” – Ibid., p. 426.
b. O le a se mea na mafai ona fa’ailoa mautinoa atu e Peteru – ma e fa’apefea ona tatau ona tatou fa’ailoa atu, e ala i le fa’atuatua, lana fa’ata’ita’iga loto tele? 2 Peteru 1:16-18.
“E leai se pepelo oi le upu moni. Afai tatou te mulimuli i tala fatu e fafauina ma le pepelo, ua tatou au fa’atasi loa ma le ‘au tau a le fili e tete’e ai i le Atua ma Keriso. . . .
“O so’o se ituaiga mea leaga lava, o loo fa’atali mo se avanoa e osofa’i ai i tatou. O upu fa’avi’ivi’i, o fa’atosinaga i oa ma tofiga ina ia talia faiga leaga, o mailei fa’atosina, o folafolaga o le si’itiaina i tofiga mamalu, o le a sili ona fa’aaogaina ma le finafinau i taimi uma.
“O a mea o loo faia e auauna a le Atua ina ia si’itia ai le pa pupuni o le ‘Ua fa’apea ona fetalai mai o Ieova’ e tete’e atu ai i lenei agasala leaga?” – Selected Messages, bk. 1, p. 194.
Aso Gafua
Aukuso 12
2. O LE A’AFIAGA O VALO’AGA
a. A ta’atele le nunumi, o le a se mea e mafai ona tatou fa’afetai ai, e fa’apei ona fa’ailoa mai i le auala na aumaia ai e Keriso le fa’amoemoe i so’o sa fa’anoanoa i le ala aga’i atu i Emau? Luka 24:15-21, 27, 32; 2 Peteru 1:19.
“O loto o so’o [i le ala aga’i i Emau] na fafaguina a’e. O le fa’atuatua sa toe osofia a’e. Sa toe ‘fanauina i la’ua i totonu o se fa’amoemoe ola’ a’o le’i fa’aalia e Iesu Ia lava ia i la’ua. O Lana sini o le fa’apupulaina lea o ō la malamalama’aga ma ia fa’amausali atu lo la fa’atuatua i luga o le ‘upu mautinoa o valo’aga.’ Na Ia finagalo i le upu moni ina ia maua’a i totonu o ō la mafaufau, e lē gata ona sa lagolagoina e Lana lava molimau, ae ona o le fa’amaoniga lē mafa’afesiligia fo’i na fa’ailoa mai e fa’atusa ma sauniga fai ata o le tulafono fa’afa’atusa, ma valoaga o le Feagaiga Tuai. Na mana’omia mo so’o o Keriso ina ia i ai so latou fa’atuatua poto, e lē mo na o i latou lava, ae ina ia mafai ai fo’i ona latou tauaveina atu le iloa e fa’atatau ia Keriso i le lalolagi. Ma o le la’asaga muamua lava la o le fa’ailoaina atu o lenei iloa, na fa’asino e Iesu le au so’o ia ‘Mose ma le au perofeta uma.’ Na fa’apena le molimau na tu’uina mai e le Fa’aola na toe soifua mai i le aogā ma le tāua o Tusi o le Feagaiga Tuai.” – The Great Controversy, p. 349.
“O le fuafuaga a le [Atua], o i latou ua tofusia i lenei fa’aolataga tele e ala atu ia Iesu Keriso, e tatau ona avea ma Ana misionare. . . .O tagata e tatau ona lapata’ia ina ia sauni mo le fa’asalaga o le a o’o mai. Ia i latou sa nā o tala fatu fafauina ma le pepelo na latou fa’alogologo i ai, o le a tu’uina atu i ai e le Atua se avanoa latou te fa’alogo ai i le upu mautinoa o valo’aga, e lelei ona latou naunau i ai e pei o se lamepa e mumū i le mea pogisa. O le a Ia fa’ailoa mai le upu mautinoa o le upu moni i le malamalama’aga o i latou uma o le a gaua’i i ai; o tagata uma o le a fa’atusatusaina le upu moni ma tala fatu fafauina ma le pepelo ua tu’uina atu ia i latou, e tane o loo fai mai e malamalama i le upu a le Atua ma ua latou agava’a e a’oa’o atu i ē o loo i le pogisa.” – Testimonies for the Church, vol. 2, pp. 631, 632.
b. Ta’u mai se lapata’iga a Paulo ia Timoteo lea e matuā fetaui lelei i le taimi lenei. 1 Timoteo 6:20, 21.
“O le agaga tonu lava o le ifo i tupua fa’apaupau ua matuā ta’atele lava i le taimi lenei, e ui lava ina i lalo o le a’afiaga o su’esu’ega ma a’oa’oga, ua ia fa’afoliga mai i foliga e sili atu ona a’oa’oina ma tosina gofie i ai. O aso ta’itasi e fa’aopoopoina ai fa’amaoniga fa’anoanoa e iloa ai, o le fa’atuatua i le upu mautinoa o valoaga, ua matuā fa’ata’alise lona fa’aitiitia, ma ua suitulaga ai talitonuga fa’ataulaitu ma faiga fa’ataulaitu fa’asatani lea ua taofi fa’atagataotauaina ai mafaufau o tagata.” – Ibid., vol. 5, p. 192.
Aso Lua
Aukuso 13
3. O SE TAULA I O TATOU AGAGA
a. E fa’apefea ona tatou iloa valoaga moni e avea o se taula, o se poutū fa’avae i le fa’atuatua fa’akerisiano? Amosa 3:7; 2 Peteru 1:20, 21.
“O le to’atele, e matuā sili atu le to’atele o tagata, o loo latou fesiligia le moni ma le fa’amaoni o le Tusi Paia. O mafaufauga fa’aletagata ma manatunatuga o le loto fa’aletagata, ua latou lamatiaina le fa’aaliga a le Upu a le Atua, ma o upu ia e tatau ona taliaina o upu na fa’aalia mai, ua si’omia i se ao o mea lilo. E leai se mea o tula’i a’e i laina manino ma le ma’oti, i luga o le papa mausalī. O le tasi lenei o fa’ailoga ma’oti o aso mulimuli.” – Selected Messages, bk. 1, p. 15.
“O loo i ai tane e finafinau ina ia ta’ua i latou o ni tagata na ulua’i amatalia ni a’oa’oga, o loo manatu i latou e sili a’e lo latou poto nai lo upu ua tusia; o lea la, o lo latou poto o le valea lea. Latou te maua ni talitonuga ofoofogia oi le lumana’i, o ni manatu ia o loo fa’aalia ai latou te matuā mamao lava i tua i le malamalama’aga e fa’atatau i le finagalo o le Atua ma Ana fuafuaga. I lo latou sa’ili e fa’amanino pe talatalaina fo’i mea lilo sa natia mai i le vavau mai i tagata, ua fa’apei ai i latou o se tagata o loo a’au vilivilita’i solo i totonu o le lopala, ua lē mafai ona ia fa’asa’olotoina o ia lava, peita’i o loo ia fa’atonu atu i isi tagata i le auala e mafai ai ona latou sao ese mai i le sami lopala o lo o latou i ai. O se fa’atusa fetaui lelei lenei o tane ia ua latou fa’atuina i latou lava ina ia fa’asa’oina mea sese o le Tusi Paia. E leai se tagata e mafai ona ia fa’aleleia atili le Tusi Paia e ala i lona fa’ailoa mai, i ona lava manatu, o le uiga tonu o le manatu na finagalo le Atua Na te fetalaia mai, poo upu fo’i ua fetalaia mai e Ieova.
“O nisi e va’ava’ai mai ia i tatou ma le faitio ma fa’apea mai, ‘Tou te lē manatu ea atonu sa i ai ni mea sese ia i latou sa kopiina po’o i latou fo’i sa fa’aliliuina molimau?’ O nei manatu uma atonu e moni, ma o le mafaufau e matuā pumo’omo’o lava o lea o le a fa’atuai ai ma tautevateva i lenei manatu, o le a matuā sauni lava e tautevateva i mea lilo o le Upu na osofia mai e le Agaga Paia, auā o ō latou mafaufau vaivai e lē mafai ona malamalama i fuafuaga a le Atua.” – Ibid., p. 16.
“E fetalai mai le Atua i tagata i gagana lē atoatoa, ina ia malamalama ai i Ana upu, lagona ia ua fa’aleagaina, ma le va’ai nenefu fa’alelalolagi a tagata fa’alelalolagi. Ua fa’apena ona fa’ailoaina mai le alofa o le Atua. Na te talia tagata pa’u’ū i le tulaga o loo latou i ai. O le Tusi Paia, o lona atoatoa lelei i lona faigofie o loo i ai nei, e lē o tali mai i manatu silisiliese o le Atua; auā o manatu lē mafuatia e lē mafai ona tu’uina atoatoa i totonu o tagata lē atoatoa o loo tauaveina manatu. E aunoa ma le so’ona fa’atelēina o fa’amatalaga a le Tusi Paia, e pei o le manatu o le to’atele o tagata, o manatu malolosi e talepeina i lalo, i luma o le matagofie o le manatu, e ui lava ina filifilia e le tagata tusitusi le gagana e sili ona tāua e fa’ailoa mai ai upu moni o le a’oa’oga e sili atu ona maualuga.” – Ibid., p. 22.
“A taumafai loa tagata e faitio i le Upu a le Atua, ua latou solia eleele paia, ma e sili ai ona latou matata’u ma gatete ma natia lo latou poto e avea o se valea. E lē’i filifilia e le Atua se tagata na te fa’amasino i Lana Upu, ma filifilia ai nisi upu e fa’apea na osofia mai e le Agaga o le Atua, ma latou filifilia ai nisi vaega ma fai ai e lē’i osofiaina e le Agaga Paia, ma fa’alēaogaina ai fo’i nisi vaega e fa’apea e lē’i fa’ailoaina mai e Lona Agaga Paia.” – Ibid., p. 23.
Aso Lulu
Aukuso 14
4. O LE TAUSIGA FOA’I A LE ATUA MO LANA FANAU
a. Fa’amatala se tulaga mata’utia o loo ta’atele i le taimi lenei – ma le auala e tatau ai ona tatou fetaia’i. 2 Peteru 2:1-3; 1 Timoteo 4:1, 2; Teuteronome 6:24, 25.
“E le’i i ai lava se taimi o le a puapuagatia ai le upu moni mai i lona fa’auigaseseina, ta’ufa’atauva’aina, ma ta’useseina e ala i finauga fouvale a tagata, nai lo aso mulimuli nei. Ua aumaia e tane i latou i totonu fa’atasi ai ma a latou a’oa’oga lē talitonu eseese e tele lava, ia ua latou fa’ailoa mai o tulafono mo tagata. O tagata ua fa’amalieina i ni mea fou uiga ese, ma, latou te lē o popoto i lo latou tomai latou te iloa ai le uiga o manatu atonu e fa’amatagofie mai e tagata e fai ma mea lelei. Peita’i o le fa’aigoaina o lenei fa’asesēega e avea ma a’oa’oga matuā lelei tele ma fa’apipi’i atu ai i poloa’iga a le Atua, e lē faia ai ma upu moni. . . .
“E tatau ona tatou fa’alogo i le si’ufofoga o le Atua mai i Lana Upu fa’aalia, le upu mautinoa lea o valoaga. O i latou o le a fa’asilisiliina i latou lava ma sa’ili ai e faia se mea ofoofogia, e sili atu lo latou o mai i se mafaufau poto.” – The SDA Bible Commentary [E. G. White Comments], vol. 6, pp. 1064, 1065.
“O le tulafono a le Atua o le fa’avae lea o toe fuata’iga mausali uma. E tatau ona tatou tu’uina atu i le lalolagi i upu manino ma le ma’oti, le mana’oga o le usita’i i lenei tulafono. O le usita’i i le tulafono a le Atua o le fa’amalosi’aga silisili lava lea i galuega, olaga fuafua faifa’atatau lelei, fa’amaoni, ma feutaga’iga fa’amaoni i le va o le tagata ma le tagata. . . .
“O i latou e gaua’i ma le vilivilita’i i le si’ufofoga o Ieova ma tausi ma le fiafia i Ana poloa’iga, o le a latou i ai i le lotolotoi o le fuainumera o i latou e va’ai i le Atua.” – Testimonies for the Church, vol. 8, p. 199.
b. O a fa’ata’ita’iga fa’aleTusi Paia o loo aumaia e Peteru e fa’ailoa mai ai le mana’oga – ma le mautinoaga – o le lavea’iga alofa a le Atua mo i latou e alolofa ma matata’u ia te Ia? 2 Peteru 2:4-8.
“O tagata o le Atua, o loo lamatia i le malosi taufa’asese ma le sauā lē malolo o le fili o le pouliuli, ma o loo tauivi ma malosi uma lava o le ti’apolo, ua fa’amautinoaina mai ia i latou le leoleoga lē muta a agelu fa’alelagi. E lē tu’uina mai fo’i lena mautinoaga e aunoa ma se mana’oga. Afai ua tu’uina mai e le Atua i Lana fanau le folafolaga o le alofa tunoa ma le puipuiga, ua tu’uina mai ona o loo i ai meafaigaluega malolosi a le ti’apolo e tatau ona fa’afetaia’ia – o meafaigaluega to’atele, finafinau, ma lē malolo i taimi uma, o lo latou ita ma lo latou malosi, e leai se tagata e mafai ona ia lē iloaina pe lē amana’iaina ma le saogalemu.” – The Great Controversy, p. 513.
Aso Tofi
Aukuso 15
5. TEUFATUINA O LO TATOU FA’AOLA
a. O le a le lavea’iga sili ona tāua ua ofo mai e le Atua ia i tatou? 2 Peteru 2:9 (vaega muamua); 1 Korinito 10:13; Salamo 50:15.
“O le a tausi e le Atua i latou uma lava e savavali i le ala o le usita’i; peita’i o le liliu ese mai i le usita’i, o le fealua’i lea ma le lē fefe i eleele o Satani. O iina tatou te mautinoa tatou te pa’u’ū ai. Ua fa’atonu mai le Fa’aola ia i tatou, ‘Ia outou mataala ma tatalo, ne’i tou ulufale atu i le fa’aosoosoga.’ Mareko 14:38. O manatunatuga ma tatalo o le a taofia ai i tatou mai i lo tatou fa’ata’alise atu e aunoa ma fa’atonuga i le ala o le lamatiaga, ma fa’apena ai ona tatau ona lavea’iina i tatou mai i le tele o to’ilalo.
“Ae e lē tatau ona tatou fa’avaivai pe a osofa’ia i tatou e fa’aosoosoga. O le tele o taimi, a tu’uina i tatou i se tulaga e faigata, tatou te masalosalo ai poo le Agaga o le Atua lea o loo ta’ita’iina i tatou. Peita’i o le ta’ita’iga a le Agaga lea na aumaia Iesu i le vao matua ina ia fa’aosoosoina ai e Satani. A aumaia e le Atua i tatou i tofotofoga, e i ai Lana sini e tatau ona fa’ataunu’uina mo lo tatou lelei. E lē’i fa’afoliga le manatu o Iesu i folafolaga a le Atua e ala i Lona alu atu i fa’aosoosoga e aunoa ma le fa’atonuina o Ia. Na te lē’i fa’avaivai fo’i i le leai o se fa’amoemoe ina ua o’o mai le fa’aosoosoga i luga ia te
Ia. E lē tatau fo’i ona tatou manatu fa’apea.” – The Desire of Ages, pp. 126-129
“O le fa’aosoosoga e lē o le agasala lea. O Iesu e paia ma mamā; ae na fa’aosoosoina o Ia i mea uma lava e fa’apei ona fa’aosoosoina ai i tatou, peita’i na fa’aosoosoina o Ia i se malosi ma se mana lea o le a lē vala’auina lava le tagata ina ‘ia ia onosa’ia. I Lona tete’e fa’amanuiaina atu ua Ia tu’ua ai mo i tatou se fa’ata’ita’iga matagofie, ina ia tatou mulimuli ai i Ona la’asaga. Afai tatou te fa’alagolago ia i tatou lava pe fa’amalieina fo’i i tatou i la tatou lava amiotonu, o le a tu’ua i tatou ina ia tatou pa’u’ū i lalo o le malosi o fa’aosoosoga; peita’i afai tatou te va’ava’ai ia Iesu ma talitonu ia te Ia, ua tatou aumaia ai ia i tatou se mana ua na fa’ato’ilaloina le fili i luga o le laueleele o le taua, ma o fa’aosoosoga ta’itasi uma lava, o le a Ia faia ai se auala e lavea’i ai. A sau Satani e pei o se lolo, e tatau ona tatou fa’afetaia’ia ana fa’aosoosoga i le pelu a le Agaga, ma o Iesu o le a avea ma o tatou fesoasoani ma o le a Ia si’itia mo i tatou se tapula’a e tete’e atu ai ia te ia. O le tamā o le pepelo e galulu ma gatete pe a lafoina atu le upu moni a le Atua, i le mana mata’utia lava.” – Testimonies for the Church, vol. 5, p. 426.
Aso Faraile
Aukuso 16
FESILI TOE FA’AMANATU
1. E fa’apefea ona fesoasoani mai ia te a’u le malamalama i valoaga fa’ale-Tusi Paia i aso oi lumana’i?
2. Aisea na fa’asoa atu ai e Iesu valo’aga i le ‘au so’o i le ala aga’i atu i Emau?
3. O a auala o loo sa’ili Satani na te fa’avaivaia ai lo tatou talitonuga i le Tusi Paia?
4. Aisea e tāua tele ai le pipi’i mausali atu i upu e fa’ailoa mai e le Agaga Paia?
5. A osofa’ia i tatou e fa’aosoosoga, o le a le gaioiga e tatau ona tatou manatua tatou te faia?